Roma 7
7
Hǝ Dzǝ Ngǝ Wu Cabiya Sǝra Wu Pama Njir Nu Ənga Kǝrsiti
1Aˈyi hyu sǝni wa, zamǝˈyar, ariya ya vǝr ndǝr kau anǝ njira wu sǝni dlaɗau, abǝr dlaɗau aˈyi ja ǝnga dǝnama wacu ar kǝra ndǝra ǝnga pi wa? 2Taˈyi nja na, mala kǝra ǝnga sal, ǝgya kiɗa sal nyi nga ja, ma aˈyi ja ǝnga pi. Ama ma sal kǝ tau, a ɗar ja ar kǝrnyi, tsu ja aˈyi ǝgya kiɗa dlaɗǝ nǝ hǝ dzǝ mai. 3Agabangau, ma ji hǝr vanyi sal, ma tsu sal nyi aˈyi ǝnga pi, nju ngga nyi ǝnga mala dlǝnga sal. Ama ma sal nyi a tǝri, a ɗar ja ar kǝrnyi, tsu ja aˈyi ǝgya kiɗa dlaɗǝ ǝnga aˈyi ja mala dlǝnga sal mai, alaga ma ji ɓǝra hǝr vanyi sal.
4Abangǝ tsu, zamǝ ɗa ˈyar, a tǝr hyi anǝ dlaɗau, lagur dza Kǝrsiti, aga hya sǝni ɗa nǝ vanyi ndau, naja ndǝra hyaˈari sara vir tau, aga mǝna daɓaga pǝ wazha anǝ Hyal. 5Ariya ar pǝcira mǝna vǝr nggya wu ndǝndǝkur, dlaɗǝ dumwa ǝnga hyaˈana sunar mǝn. Sunar mǝn kǝ tsu dumwa ǝnga mǝl thlǝr wu dza mǝn, ǝtsu patǝr thlǝr mǝn ndu yabiya mǝn tau. 6Ama kabangǝkau, a tǝr mǝn sara ara sǝra sǝɓǝya mǝn, kǝ mǝn ɗa kambǝr dlaɗau aga mǝna mǝl thlǝr wu lagu mafǝliyangǝ nǝ Mambǝl, aˈyi wu lagu hahal kǝra tsǝtsǝfǝ ta mai.
Papa Ənga Bikau
7Mi nga mǝna na ja? Dlaɗǝ ya, bikǝ ya? Pakatǝu, awau! Ənga jiri nayi saya sǝnibiya bikǝ mai, kǝl lagu dlaɗau. Maja bǝr dlaɗa nyi gǝra nda na, “A sara ga suna mai,” nayu nda sǝnibiya sǝra nja na ǝnga suna mai. 8Ama ariya sǝra dlaɗǝ nana, ca ngǝ bikǝ uya vir nggyar nda wu yau, ba ndǝ dzǝgwa yabiya kalar culi sunasuna. Ara ma aˈyi daɓǝ ǝnga dlaɗǝ mai, bikǝ ǝnggǝr tǝtǝ nga ja.
9Tsu ɗǝɗǝmǝ mbǝmbǝɗǝ nga yau, ta yi gǝra sǝni dlaɗau. Ama ta yi sǝnibiya hǝˈu dlaɗau, ba bikǝ hyaˈari ǝnga pi, ba yi tau. 10A sǝnibiyar yau, abǝr dlaɗǝ kǝra a kyaga shili ǝnga pi a dlari ja ǝnga tǝ anǝ ɗa. 11Ara bikǝ uya kǝrnyi lagu dlaɗau, ba ji nggutana ɗa yi mǝl sǝra aˈyi tsaˈa mai, lagu ta ba ji tsǝya ɗa.
12Agabangau, dlaɗǝ ǝnga kǝrnyi cici nga ja, sǝr ɓǝla nyi tsu cici nga ja, tsapǝ nga ja, ba tsaˈa nga ja. 13Agabangau, gu nggani sǝr ɓǝla kǝra tsaˈa kau, a sǝni shili ǝnga tǝ anǝ ɗa ya? Awau, alaga kushu! Ama aga nja daɓaga sǝnibiya sǝra bikau, bikǝ a vǝr mǝl thlǝr ǝnga sǝra tsaˈa kǝra wu shili ǝnga tǝ ɗa, aga lagur dlaɗau, bikǝ ja ɗa sǝ didiɗi gagaɗau.
14A sǝni mǝn abǝr dlaɗǝ sara ara Mambǝl Cici nga nyi, ama nayi ndapi ngau, kǝra nji ɗǝlna ɗa ǝgya kiɗa mafakur nǝ bikau. 15Nayi aˈyi nggabiya sǝra yu mǝl mai. Ariya sǝra yu yiwu ya mǝl ca nga yu mǝl mai. Ama sǝra shishir dza yi piyari ca nga yu mǝl. 16Ma tsu sǝra yu mǝl ca ngǝ sǝra yi gǝra yiwu ya mǝl, a hǝnggǝr yau abǝr dlaɗa nyi sǝ tsatsaˈa ngau. 17Sǝra aˈyi, aˈyi nayi ǝnga kǝrɗa ngǝ wu mǝl sǝ kǝ mai, ama bikǝ kǝra a vǝr nggya wu yau.
18A sǝni yau, abǝr sǝ tsaˈa aˈyi kǝra wu nggya wu yi mai, kǝra wu nggyabiya nǝ ndǝndǝkur ɗa. Ariya cimǝ nǝ mǝl sǝra tsaˈa aˈyi wu yau, ama dǝnama nǝ mǝl abangǝ aˈyi ara yi mai. 19Ariya sǝra yu mǝl aˈyi sǝ tsaˈa kǝra yu yiwu ya mǝl ngǝ mai, awau, sǝ ɗǝmwaˈyi kǝra yi gǝra yiwu ya mǝl kau, ca nga yu dumwa ǝnga mǝl. 20Ya, ma yi mǝl sǝra gǝra yu yiwu ya mǝl, aˈyi nayi ǝnga kǝrɗa ngǝ wu mǝl sǝ kǝ mai, ama bikǝ kǝra a vǝr nggya wu yau.
21Kǝ yi thlǝwa dlaɗǝ kau a vǝr mǝl thlǝr wu yau, abǝr ma yu yiwu ya mǝl tsaˈa, kǝja ɗǝmwaˈyikur taˈyi a dumwa ɗa. 22Ariya a vwu ɗǝfuwa yau, ya vǝr caguli ǝnga dlaɗǝ Hyal, 23ama kǝ yi lar vanyi dlaɗau, a vǝr mǝl thlǝr nyi wu dza yau, ja vǝr papa ǝnga dlaɗǝ nǝ ɗǝnga ɗa. Ba ji mǝliya ɗa yi ɗa ndǝr fursǝna nǝ dlaɗǝ nǝ bikau, kǝra a vǝr mǝl thlǝr wu dza yi kau.
24Kara nggǝrau ɗa! Ndǝra nja tǝhuɗǝ ǝgya ja nga yau! Wa ngǝ wu nda kǝtiya ɗa sara ara dzǝ kǝra wu shili ǝnga tǝ ka? 25Usaku anǝ Hyal ariya ji kǝtiya ɗa lagur Yesu Kǝrsiti Thlagǝr mǝn! Agabangau, nayi ǝnga kǝrɗa, wu ɗǝnga ɗa, yu nggya mafa nǝ dlaɗǝ Hyal, ama wu kumǝr dzǝ nǝ ndǝndǝkur yu nggya mafa nǝ dlaɗǝ bikau.
©2024 Initiative for the Translation and Development of African Languages and Margi Tiwi Nga Təm