Matiwu 23
23
Yesu Kughiya Malǝmǝ Dlaɗǝ ˈYar Ənga Njir Farisi
(Markusu 12:38-39; Luka 11:43,46; 20:45-47)
1Kǝ Yesu nar nyi anǝ dlamir nji ǝnga zǝmbǝlma nyi ˈyar, 2“Malǝmǝ dlaɗǝ ˈyar ǝnga njir Farisi nanda ngǝ ǝnga dǝnama nǝ highiɓǝ dlaɗǝ nǝ Musa. 3Agabangǝ hya nggya njir ɓǝla kalar sǝra ndu na. Ama hya sara mǝl sǝra ndu mǝl mai, ariya nandu ɓǝlari sǝra ndu highiɓǝ mai. 4Ndu mbiya kar tǝdǝɓǝu kǝra dzadzau ara hau ba nda fǝr nyi ar papadla nji, ama nanda ǝnga kǝrnda nandu fǝ alaga zǝr tsa nda aga dlǝwa nda mai.
5“Ndu mǝl sǝr mǝla nda patǝ aga nja na. Ndu mbǝ pǝrki nǝ fǝ ndǝr Hyal dlaɓǝ ǝnga takulagǝu ba ǝnga nggusǝri nǝ ha ǝgya fǝlangǝ dzǝgamǝu.
6“Ndu yiwu nja nǝ nda vir nggya kadakadarkur wu mini, ǝnga sǝr nggya kǝra a ndiya ǝnga mǝnahǝu wu umbwa daɓǝ dzǝˈyar nǝ njir Yahudiya. 7Ndu yiwu nja usa nda ar sugu, ǝnga ndu yiwu tsu nja ngga nda ǝnga ‘Malǝmǝ.’
8“Ama nja kyaga ngga hyi ǝnga ‘Malǝmǝ’ mai, ariya Malǝmǝ zǝmǝ nga ja ara hyi wacu, ǝnga zamǝ nga hyi patǝu. 9Hya sara ngga ndǝr duniya ǝnga ‘Tada’ mai, ariya Tada zǝmǝ nga ja ara hyi, naja ngǝ ndǝra a dǝmǝlmau. 10Ətsu, nja kyaga ngga hyi ǝnga ‘Tarki’ mai, ariya Tarki zǝmǝ ngǝ ara hyi, naja ngǝ Kǝrsiti. 11Ndadǝgal kǝra wu pama hyi, ja ɗa ǝnggǝr mafar hyi. 12Kalar ndǝra wu ha kǝrnyi, nju nda tina nyi. Ama ndǝra tina kǝrnyi tsu, nju nda hana nyi.
13“Sǝr tǝhuɗǝ anǝ hyi malǝmǝ dlaɗǝ ˈyar ǝnga njir Farisi, njir kwaɗashima! Hyi dari nyi lagur vwu tǝlkur Hyal anǝ nji. Nahyi ǝnga kǝrhyi nahyi vwu mai, ǝnga nahyi piyari nyi lagu tsu anǝ njira a vǝr yiwu nda vwu mai. 14Sǝr tǝhuɗǝ anǝ hyi malǝmǝ dlaɗǝ ˈyar ǝnga njir Farisi, nahyi njir kwaɗashima! Hyu mbǝtǝbiya kar mathlǝkǝˈyi tǝsal ǝnga hya dzǝgwa mǝliya kǝdi Hyal tugu aga nja na. Agabangau, Hyal wu nda nǝ hyi ɓwaɓwatǝ gagaɗau.#23:14 Alenyi tsǝfǝ ɗǝɗǝmǝ aˈyi ǝnga naja ka cifǝ mai.
15“Sǝr tǝhuɗǝ anǝ hyi malǝmǝ dlaɗǝ ˈyar ǝnga njir Farisi, njir kwaɗashima! Hyu maˈyi baˈa a biyar ya mǝlmǝ ǝnga a biyar ya dǝl, aga hya kǝzǝya alaga zǝmbǝlma pathlǝu kǝra wu nu hyi. Ama tsu ndǝra hyi uya, ba hya mǝliya nyi fǝrkafǝrka zǝr uˈur kǝtsa a ndiya hyi.
16“Sǝr tǝhuɗǝ anǝ hyi, nji lǝfǝ nǝ tǝɗǝmwa. Hyu na, ‘Ma ndǝra sǝm fǝla ǝnga ki Hyal, naji ndzana sǝ mai. Ama ndǝra sǝm fǝla ǝnga ǝndzau nǝ ki Hyal, sǝm fǝla nyi a mbar nyi ri.’ 17Nji thlǝkǝlǝmǝu, nji lǝfau! Mani ngǝ a ndiya ǝnga dǝgala, ǝndzau ǝndǝga ki Hyal kǝra mǝliya ǝndzǝ kǝ cica? 18Hya vǝr na tsu, ‘Ma ndǝra sǝm fǝla ǝnga bagadi nǝ nggyi sau, naji ndzana sǝ mai. Ama ndǝra sǝm fǝla ǝnga sǝra nji lǝri, sǝm fǝla nyi a mbar nyi ri.’ 19Nji lǝfau! Mani ngǝ a ndiya ǝnga dǝgala? Sǝra nji lǝri ǝndǝga bagadi kǝra mǝliya sǝra nji lǝri kǝ cica?
20Nggara mǝ ja, kalar ndǝra sǝm fǝla ǝnga bagadi nǝ Hyal, a sǝmkur ja fǝla ǝni ba sǝra a dari patǝu. 21Kalar ndǝra sǝm fǝla ǝnga ki Hyal tsu, a sǝmkur ja fǝla ǝni ǝnga ndǝra a vǝr nggya a gwa. 22Kalar ndǝra sǝm fǝla ǝnga dǝmǝlmau, a sǝmkur ja fǝla ǝnga tsǝkafǝ Hyal ǝnga ndǝra a vǝr nggya a dari.
23“Sǝr tǝhuɗǝ anǝ hyi, malǝmǝ dlaɗǝ ˈyar ǝnga njir Farisi, njir kwaɗashima! Hyu hǝbiya nyi anǝ Hyal pathlǝu wu sǝ kumo nǝ kwanjaɗi, ǝnga nggajiji, ba culi kanggǝranggahyiu. Ama kǝ hyi piyari dlaɗǝ kǝra a ndiya ǝnga mǝnahǝu, ca ngǝ mǝl sǝra tsaˈa, ba tǝhuɗǝu, ba tsaˈa miya takur. Hya kyaga mǝl thlǝr ǝnga sǝˈyar kau, aˈyi kǝl hya piyari alenyi sǝ mai. 24Nahyi njir tǝɗǝmwa lǝfau, hyu tsǝbiya favǝ wu ˈyimi a sara hya tasiya, ama kǝja hya dzǝgwa tasiyari dlǝgwam.
25“Sǝr tǝhuɗǝ anǝ hyi, malǝmǝ dlaɗǝ ˈyar ǝnga njir Farisi, njir kwaɗashima! Hyi cina dagǝrya cala ǝnga cala wu, ama huɗa nyi nyinyi ǝnga dlǝrbau ǝnga suna. 26Nahyi Farisi nji lǝfau! Hya kyaga cina huɗa cala ǝnga cala wu kwatahǝu, kadivira ya nyi a ɗa camǝ tsu.
27“Sǝr tǝhuɗǝ anǝ hyi, malǝmǝ dlaɗǝ ˈyar ǝnga njir Farisi, njir kwaɗashima! Ənggǝr hu kǝra nji pabǝri ya nyi pǝrtǝ nga hyi. Kǝra sara biya, nju lari nyi gumaguma, ama a vwu huɗa nyi, nyinyi nga nyi ǝnga ɗǝhi nji ɗiɗiya ǝnga kalar sǝ diyadiyaɓǝu. 28Lagu zǝmǝ nga hyi, nju lari hyi a biya ǝnggǝr nji tsapǝu, ama a vwu huɗa hyi njir kwaɗashima ǝnga njira gǝra ɓǝla ndǝr Hyal nga hyi.
29“Sǝr tǝhuɗǝ anǝ hyi, malǝmǝ dlaɗǝ ˈyar ǝnga njir Farisi, njir kwaɗashima! Hyi hǝriya nyi hu anǝ nabiˈyar ǝnga hyi ɓathlǝya dza hu nji tsapǝu. 30Ənga hyu na, ‘Maja bǝr aˈyi ˈya ar pǝcir ǝjir ˈya, ˈyi wu nda fuwa tsi wu pǝ mashi nǝ nabiˈyar mai.’ 31Lagu kǝ nga hyi cabiya abǝr nahyi ngǝ culi njira tsǝya nabiˈyar.
32Hya nyabiya tsǝla bikǝ nǝ ǝjir hyi kǝja! 33“Nahyi pabǝˈyar! Wazha mǝtsapa! Lagu mani nga hyu nda kǝtiya kǝrhyi ara numa nǝ uˈur kǝtsa? 34Agabangau, yu sǝwa hyi nabiˈyar ǝnga njir sǝni sau ba malǝmǝˈyar. Wu pama nda hyu nda tsǝya, ǝnga hyu dlakǝya alenyi njir nda ar wu dladlakau. Alenyi nji tsu hyu nda dǝgǝ nda ǝnga wuɗa wu umbwa daɓǝ dzǝˈyar nǝ njir Yahudiya, ǝnga hyu nǝ nda ɓwaɓwatǝ ǝnga hya kǝdlǝbiya nda sara wu mǝlmǝ pampamǝu.
35Agabangau, a dar kǝra hyi ngǝ mashi nji tsapǝu patǝ kǝra nji tsǝya wu duniya, mbari ar mashi Habila ndǝ tsapǝu baˈa shili ar mashi Zakariya zǝr Berikiya, ndǝra hyi tsǝya wu pama vi cici wu ki Hyal ǝnga bagadi. 36Yu nar hyi ǝnga jiri, numa nǝ sǝˈyar kǝ patǝu wu ɗa ǝnga njir zamanǝ ǝshina kau.”
Yesu Uya Huɗathla Ar Kǝra Urshalima
37“Əm, Urshalima, Urshalima! Ndǝr tsa nabiˈyar, ǝnga ndǝr vavaka njira Hyal sǝwa ngǝ a shili ǝnga tsǝka kǝl ta gǝ dlǝna nda! Aga yiɗau nga yu yiwu ya fǝri tsa yi ar dza nji ngǝ pata, ǝnggǝr kǝra mǝya tǝka wu tsǝm wazha nyi ǝgya ja, ama nahyi piyari ɗa mai! 38Lara mǝ gǝyi, kǝja kir hyi a nggyari huɗǝfi. 39Yu na anǝ hyi, tsu hyu ɓǝra lari ɗa mai, kǝl hyi nda na, ‘Barka anǝ ndǝra wu shili wu thlǝmǝr Thlagǝu.’ ”
©2024 Initiative for the Translation and Development of African Languages and Margi Tiwi Nga Təm