Matiwu 22
22
Karapau Ar Kǝra Mini Nǝ Hǝ Dzau
(Luka 14:15-24)
1Yesu ɓǝra ndǝr anǝ nda ǝnga karapǝˈyar, 2“Nja na, tǝlkur Hyal ǝnggǝr vanyi tǝl kǝra pabǝri nyi mini nǝ hǝ mala anǝ zǝr nyi nga nyi. 3Ji sǝwa mafa nyi ˈyar aga nda nda nggari njira nji nggǝya a shili wu mini kau, ama ba ndǝ nggǝl ara shili.
4“Kǝ ji ɓǝra sǝwa alenyi njir mǝl thlǝr nyi ˈyar a nda nǝ njira ji nggǝya, ji na, ‘Nar nda mau, abǝr, sǝ aˈyi kǝra shiwangǝ mai, a fuwar yi sǝ patǝ wu lagu. A tsiyar yi gyaliˈyar ǝnga thla pampamǝ nggǝnggǝthlau, sǝr sǝm tsu a tari. Shila mau, patǝ a shili wu mini kau.’
5“Ama nandǝ sǝya nyi himi mai. Kǝ kalar ndǝ maˈyi sǝ nyi a nda mǝl sǝr kǝrnyi. Vanyi ndǝ maˈyi a gwar fa nyi, ǝnga vanyi ndǝ tsu, a ndar sugu. 6Kǝ alenyi nji mbar mafa nyi ˈyar, ba ndǝ dǝgǝ nda, kǝl ta ndǝ tsǝya nda. 7Kǝ huɗa tǝl kǝ ndzǝ gagaɗau. Kǝ ji sǝwa soja nyi ˈyar aga nda nda sana njir tsa mafa nyi ˈyar kau, ǝnga nda nggyina mǝlmǝr nda.
8“Kǝ ji nar nyi anǝ mafa nyi ˈyar, ‘Kǝja pǝcir mini a shiliri, kǝja njira yi nggǝya aˈyi kyaga aga shili mai. 9Maˈya mau a ndu huɗa giwa, kalar ndǝra hyi thlǝwa hya nggar nyi a shili wu mini kau.’ 10Kǝ mafa nyi ˈyar biya ndǝ maˈyi a ndu huɗa giwa, ndǝ nda nggǝya kalar ndǝra ndǝ thlǝwa, nji ɗǝmwaˈyi ǝnga nji mǝnahǝu a shili ar vir mini kau. Kǝ vi kǝ nyi caɓǝu ǝnga mǝthlǝpi kǝra nji nggǝya.
11“Ar pǝci kǝra tǝl shila tsamǝ mǝthlǝpi kǝra nji nggǝya, kǝ ji thlǝwa vanyi ndǝ kǝra gǝra ǝnga kar nǝ mini ar dza ja. 12Kǝ ji na anǝ nyi, ‘Bazhi, lagu mani nga gǝ shili ǝngga gǝra ǝnga lǝgutǝ nǝ mini ar dza ga?’ Ama sǝ aˈyi kǝra nda nyi wu sǝni na mai.
13“Kǝ tǝl nar nyi anǝ njir mǝl thlǝr nyi, ‘Mbiya nya mau tsi daɓǝ ǝnga hi, ba hya vakana nyi a biya a biyu kuthlǝu, vira nju vwa tiwi ǝnga sǝlǝm ba ǝnga ɗǝ hir!’
14“Ariya njira nji ngga gangǝu, ama nji ɗǝɗǝmǝ yiɗawu.”
Yiwa Sau Ar Kǝra Ki Budau Anǝ Kayisaru
(Markusu 12:13-17; Luka 20:20-26)
15Kǝ njir Farisi biya mbiya miya lagu kǝra nda sǝni mbari Yesu lagur sǝra ju na. 16Kǝ ndǝ sǝwa zǝmbǝlmar nda ˈyar ǝnga njira nju ngga nda njir nu Hirudusu. “Malǝmǝ,” ǝngwar nda, “ˈYu sǝni abǝr nagǝ ndǝ jijiri ngau, ǝnga gu highiɓǝ lagu Hyal ǝnga jiri. Nagu tazhira mai, ariya patǝr nji kakalǝ nga nda wu mwa ngau. 17Nar ˈya ja, a ɗar tsaˈa ˈya ki budau anǝ Kayisaru ǝndǝga awau?”
18Ama ara Yesu wu sǝni ɗǝnga ɗǝmwaˈyir nda, kǝ ji na, “Nahyi njir kwaɗashima, ara mi nga hyu ngga lǝbam anǝ ɗa? 19Canǝ ɗa mǝ gǝnna kǝra nju ki budǝ ǝni.” Kǝ ndǝ hǝbiya nyi kwaɓa, 20kǝ ji yiwa nda, “Amaya, bama wa, ǝnga thlǝmǝr wa, ngǝ ar kwaɓa ka?”
21“Bama Kayisaru ǝnga thlǝmǝr Kayisaru,” ǝngwar nda.
“Ma abangǝ ja,” ǝngwar ja, “Hya nǝ nyi anǝ Kayisaru sǝra nǝ Kayisaru, anǝ Hyal tsu sǝra nǝ Hyal.”
22Ta ndǝ nggari abangau, ba ɗa sǝ dǝdǝgur anǝ nda. Agabangau, ba ndǝ piyari nyi ba ndǝ maˈyi sǝr nda.
Yiwa Sau Ar Kǝra Hyaˈari Sara Vir Tau
(Markusu 12:18-27; Luka 20:27-40)
23Tsu ar pǝci ta, njir Sadusi, njira na abǝr hyaˈari sara vir tau aˈyi mai, shili ara Yesu, ndǝ sa yiwa nyi. 24“Malǝmǝ,” ǝngwar nda, “Musa nar ˈya abǝr ma sal tau gǝra ya ǝnga mala nyi, ba zamǝ nyi a hǝri mala nyi kǝ aga ja yabiya nyi wazha a gwa. 25Kabangǝkǝ wu pama ˈya, zamǝˈyar aˈyi mǝɗǝfau. Nda dǝgala nda hǝr mala, ba ji tǝ gǝra ya zǝr. Kǝ ji piyari mala kǝ anǝ zamǝ nyi. 26Abangǝ nga nyi ɗa ǝnga zamǝ nyi nǝ mǝthlǝkura nyi, ǝnga nǝ makǝrkura nyi, baˈanǝ nǝ mǝɗǝfǝkura nyi kau. 27Ayukuɗa nyi patǝu, kǝ mala nyi tǝ tsu. 28Ma nji hyaˈari sara vir tau, mala wa nga ju nda ɗa wu pama nda? Ariya patǝkura nda a hǝr nyi ri nda aga mala.”
29Yesu shaɗǝwa nda, ji na, “Ɗǝngar hyi aˈyi tsatsaˈa mai, ara nahyu sǝni sǝra tsǝtsǝfǝ wu ndǝr Hyal tsǝtsǝfǝ mai ǝnga nahyu sǝni dǝnama nǝ Hyal mai. 30Ar pǝcir hyaˈari sara vir tau, shili wu hǝ mala mai, mathlǝkǝˈyi tsu nju lǝ anǝ shili mai, ama ndu nda ɗa ǝnggǝr waladiˈyar a dǝmǝlmau. 31Ar kǝra hyaˈari sara vir tau, aˈyi hyi jigana sǝra Hyal nana anǝ hyi wa?, 32‘Nayi ngǝ Hyal nǝ Ibrahimu, ǝnga Hyal nǝ Ishaku ba ǝnga Hyal nǝ Yakubu.’ Aˈyi ja Hyal nǝ nji tǝtǝ mai, ama Hyal nǝ njira ǝnga pi.”
33Ənggǝra dlamir nji nggari abangau, ba highiɓa nyi ɗa sǝ dǝdǝgur anǝ nda.
Dlaɗǝ Kǝra A Ndiya Ənga Dǝgalǝu
(Markusu 12:28-34; Luka 10:25-28)
34Ta njir Farisi nggari abǝr Yesu a haɗiyari miya njir Sadusi, ba njir Farisi kaɓiya dzǝ ba ndǝ shili ǝgya Yesu. 35Pathlǝu wu pama nda, malǝmǝ sǝn dlaɗau, sa dzǝ Yesu ǝnga naja ka yiwa sau.
36“Malǝmǝ, dlaɗǝ mani ngǝ a ndiya patǝr dlaɗǝ ǝnga dǝgala?” 37Yesu shaɗǝwa nyi, ji na, “ ‘Ga yiwu Hyal Thlagǝ ngau ǝnga ɗǝfuwa gǝ papatǝu, ǝnga piya gǝ papatǝu, ba ǝnga ɗǝnga ngǝ papatǝu.’ 38Naja kǝ ngǝ dlaɗǝ nǝ tanggǝrma, naja ngǝ a ndiya ǝnga dǝgalǝu. 39Minu nyi ǝnggǝr naja nga nyi, ‘Ga yiwu tǝwul ngau ǝnggǝr kǝrngau.’ 40Patǝr dlaɗau ǝnga highiɓǝ nǝ nabiˈyar ar dlaɗǝˈyar kǝ mǝthlǝ kǝ nga ndǝ taˈyau.”
Yiwa Sau Ar Kǝra Kǝrsiti
(Markusu 12:35-37; Luka 20:41-44)
41Ar pǝci kǝra njir Farisi daɓǝya dzǝ ar vi zǝmǝu, kǝ Yesu yiwa nda, 42“Amaya, mi ngǝ ɗǝngar hyi ar kǝra Kǝrsiti ya? Zǝr wa nga ja?”
“Zǝr Dawuda,” ǝngwar nda.
43Kǝ Yesu na anǝ nda, “Ya lagu mani ngǝ Dawuda wu ndǝr lagu Mambǝl, ju ngga nyi ǝnga ‘Thlagǝ’ ka? Ariya ji na,
44“ ‘Thlagǝ na anǝ Thlagǝ ɗa,
“Nggya lagu mazǝma yau, kǝl yi fiya dawa ngau ǝgya kiɗa hiya gau.” ’
45Ma Dawuda ngga nyi ǝnga ‘Thlagǝu,’ lagu mani nga ji ɓǝra ɗa zǝr nya?” 46Ndǝ aˈyi kǝra uya sǝr shaɗǝwa mai. Mbari ar pǝci ta ndǝ aˈyi ǝnga ɗǝfu yiwa nyi sǝ mai.
©2024 Initiative for the Translation and Development of African Languages and Margi Tiwi Nga Təm