Matiwu 19
19
Yiwa Sau Ar Kǝra Kǝdlǝ Mala
(Markusu 10:1-12)
1Yesu kuɗǝna ndǝr kau, kǝ ji piyari Galili, ba ji maˈyi a ndu ˈyiˈyi Yahudi kǝra a biyar ya dǝl Urdǝnu. 2Dlamir nji gangǝ nu nyi, ba ji shilǝgǝbiya njira ǝnga shilgǝ a ndǝna. 3Ənggau, kǝ alenyi njir Farisi shili aga nda sa dzǝbiya Yesu, ndǝ yiwa nyi, ndǝ na, “Amaya, dlaɗǝ Musa na, abǝr a ɗar tsaˈa anǝ ndǝ ja kǝdlǝna mala nyi ariya kalar sǝ ya?”
4Kǝ Yesu shaɗǝwa nda, ji na, “Aˈyi hyi saya jigana wa, abǝr, tsu kaɗǝu, Hyal aˈyi ‘mǝliya nda sal ǝnga mala’ wa? 5Kǝ ji ɓǝra na, abǝr ‘Ariya abangau, ndǝ sal wu piyari dǝnyi ǝnga mǝnyi, nda ɗa sǝ zǝmǝ ǝnga mala nyi, nanda mǝthlǝ ndu ɗa ar viya ndǝ zǝmǝu.’ 6Tsu nda aˈyi nji pampamǝ mǝthlǝ mai, ama kumǝr dzǝ zǝmǝu. Agabangǝ sǝra Hyal mbiya, ndǝ a sara pǝlna mai.”
7Kǝ ndǝ na anǝ nyi, “Kariya, mi ngǝ ɗa Musa nana a gwu lǝkakaɗǝ nyi, abǝr, a ɗar tsaˈa sal ja nǝ nyi lǝkakaɗǝ nǝ sakida kǝdlau anǝ mala nya?”
8Kǝ Yesu shaɗǝwa nda, “Ara ɓaɓalkura ɗǝfuwa hyi ngǝ Musa sǝya hyi lagu, ama aˈyi abangǝ ngǝ Hyal mǝliya tanggǝrma mai. 9Yu na anǝ hyi, kalar ndǝra kǝdlǝna mala nyi, ma aˈyi ji mbari nyi a vǝr dlǝnga sal mai, kǝ ji ɓǝra hǝri vanyi mala, a ɗar ja ndǝ sǝsu.”
10Kǝ zǝmbǝlma nyi ˈyar na anǝ nyi, “Ma abangǝ nga nyi wu pama sal ǝnga mala, kuji kǝ ndǝ a nggya gǝra hǝ mala.”
11Kǝ Yesu shaɗǝwa nda, ji na, “Aˈyi patǝr nji ngǝ wu sǝni hǝnggǝri ǝnga culi ndǝr kǝ mai, kǝl njira Hyal dlǝwar nda. 12Ariya alenyi nji ɗa mǝciˈu sal ara nji yabiya nda abangau. Ama alenyi nji tsu, nji ngǝ mǝliya nda ndǝ ɗa mǝciˈu sal. Ənga alenyi nji tsu ngǝ mǝliya kǝrnda mǝciˈu sal ariya ndu yiwu tǝlkur Hyal kǝra wu ɗǝfuwa nda. Kalar ndǝra wu sǝni mbar naja ka highiɓau, bǝgǝ ja dlǝwuri.”
Yesu Fǝnggǝr Nyi Barka Anǝ Wazha
(Markusu 10:13-16; Luka 18:15-17)
13Kǝ nji shili ǝnga wazha yiɗǝɗǝ anǝ Yesu aga ja sa fǝr tsa ja ar nda ǝnga ja kǝdi Hyal anǝ nda. Ama kǝ zǝmbǝlma nyi ˈyar kughiya njira dla ǝnga wazha kau.
14Ama kǝ Yesu nar nda, “Hya piyari wazha yiɗǝɗǝ nda shili ǝgya yau, hya sara ka nda mai, ara tǝlkur Hyal nǝ culi nji kǝra ǝnggǝr nanda ngau.” 15Kǝ ji fǝr tsi nǝ barka ar nda, ba ji maˈyi.
Zǝr Baduwari Ndǝr Gǝnna
(Markusu 10:17-31; Luka 18:18-30)
16Kǝ vanyi ndǝ shili ara Yesu, ji sa yiwa nyi, “Malǝmǝ, mi ngǝ sǝ mǝnahǝu kǝra ya kyaga mǝl aga ya uya pi gǝra kuɗa?”
17Kǝ Yesu na anǝ nyi, “Ara mi nga gu yiwa ɗa ar kǝra sǝ mǝnaha? Ndǝ mǝnahǝ aˈyi mai kǝl Hyal wacu. Ma gu yiwu ga uya pi kǝra gǝra kuɗau, kǝl ga ɓǝlari dlaɗǝˈyar kau.”
18Əngwar ja anǝ Yesu, “Amaya, dlaɗǝ mana wu liya nya?” Kǝ Yesu na anǝ nyi, “ ‘Ga sara tsa ndǝ mai. Ga sara mǝl sǝsukur mai. Ga sara hǝl mai. Ga sara thla fati ar kǝra ndǝ mai. 19Ga gǝnggǝr nyi sǝli anǝ dǝngau ǝnga mǝngau. Ga dzǝgwa yiwu kuvwa ngau ǝnggǝr kǝrngau.’ ”
20Kǝ zǝr baduwari ta na anǝ nyi, “A ɓǝlar yi sǝˈyar kǝ patǝ tsu yi zǝr kushu. Mi ngǝ sǝra hya?”
21Yesu nar nyi, “Ma gu yiwu ga ɗa ndǝ tsapǝu, ga maˈyi ga nda ɗǝlna patǝr sǝra ara gau, ba ga tǝkǝna gǝnna nyi anǝ nji ɗaɗali, gu uya akkǝri a dǝmǝlmau. Ba ga dzǝgwa shili aga ga sa nu ɗa.”
22Ənggǝra zǝr baduwari kǝ nggari abangau, kǝ ji maˈyi ǝnga huɗǝ kyakyaru, ara naja ndǝr bǝrba gagaɗau.
23Kǝ Yesu nar nyi anǝ zǝmbǝlma nyi ˈyar, “Yu nar hyi jiri, dzadzau nga nyi anǝ ndǝr gǝnna ja gwu tǝlkur Hyal. 24Ətsu yu nar hyi abǝr a ndiya ǝnga ɓatsǝ anǝ dlǝgwam ja tǝrabiya wu liya libǝra a mwara ndǝr gǝnna ja uya gwu tǝlkur Hyal.”
25Ta zǝmbǝlma nyi ˈyar nggari abangau, kǝ ɗa sǝ dǝdǝgur anǝ nda, kǝ ndǝ na, “Ya, ma abangau, wa ngǝ wu sǝni uya mbǝɗa?”
26Kǝ Yesu tsamǝ nda, ji na, “Anǝ ndau sǝ gǝra ɗa ngau, ama anǝ Hyal kalar sau sǝr ɗa ngau.”
27Kǝ Biturusu shaɗǝwa, ji na, “Kǝja ˈya piyari sǝ patǝ ˈyi nu ngau, mi ngǝ sǝra ˈyu nda uya?”
28Yesu shaɗǝwa nda, ji na, “Yu nar hyi jirkura nyi, ar pǝcir nggyabiya kǝra wu nda shili, pǝci kǝra Zǝr Ndǝ wu sa nggya ar tsǝkafǝ nǝ kadakadarkur nyi, nahyi njira wu nu ɗa, nahyi ngǝ wu nda nggya ar tsǝkafǝ nǝ tǝlkur kǝra kumo apǝ mǝthlǝu, hyu mǝl numa anǝ miya umbwa njir Izirayila kumo apǝ mǝthlǝu. 29Ənga tsu kalar ndǝra piyari ki, alaga zamǝˈyar, alaga kwamǝˈyar, alaga tada, alaga ama ba alaga wazha, alaga fa ariya yau, ju nda uya bwata gharu gharu ǝnga pi kǝra gǝra kuɗau. 30Ama nji gangǝu kǝra tanggǝrma wu nda ɗa njir yukuɗu, ǝnga njir yukuɗǝ tsu ndu nda ɗa nji tanggǝrma.
©2024 Initiative for the Translation and Development of African Languages and Margi Tiwi Nga Təm