Matiwu 18
18
Wa Ngǝ A Ndiya Ənga Dǝgala?
(Markusu 9:33-37; Luka 9:46-48)
1Ar pǝci ta ngǝ zǝmbǝlma nyi ˈyar shili ǝgya ja ndǝ sa yiwa nyi, “Kariya, wa nga ndiya ǝnga dǝgalǝ wu tǝlkur Hyala?” 2Kǝ Yesu nggar vanyi zǝr kushu, kǝ ji sa taˈyina nyi wu mwar nji patǝu. 3Kǝ ji na anǝ nda, “Yu nar hyi jirkura nyi, kǝl hyi shabiya ɗǝfuwa hyi, hya ɗa ǝnggǝr wazha yiɗǝɗǝu, nahyu sǝni uya gwa wu tǝlkur Hyal mai. 4Ama kalar ndǝra hǝya kǝra ja, ji shabiya kǝrnyi ǝnggǝr zǝr kushu kau, naja nga ndiya ǝnga dǝgalǝ wu tǝlkur Hyal.
5“Kalar ndǝra dlǝwuri zǝr kushu ǝnggǝr kǝ wu thlǝmǝ ɗa, nayi nga ji dlǝwuri. 6Ama tsu, kalar ndǝra mǝliya pathlǝu wu pama wazha yiɗǝɗǝ kau, kǝra hǝnggǝri ǝnga yau ja thlǝr hi, wu ndiya anǝ ndǝ kǝ nja mbiya bǝra ar fǝlanga ja, ba nja vakuwa nyi a gwar tsadau ba ja lau.
7“Sǝr tǝhuɗǝ anǝ duniya ara ju mǝliya nja thlǝ hi! Sǝr thlǝ hiˈyar kǝ a ɗar kǝl nda shili, ama sǝr tǝhuɗǝ anǝ njira sǝˈyar kǝ wu shili lagur nda. 8Ma tsa gau ǝndǝga hiya gǝ ngǝ wu fuwa ngǝ ga mǝl bikau, kuji ga thlana ba ga vakana nyi naɗǝu. A ndiya ǝnga mǝnahǝu anǝ ngau ga uya pi gǝra kuɗau ǝnga hi ǝndǝga tsi papathlǝu a mwara nja vakuwa ngǝ a gwu uˈur kǝtsa gǝra kuɗau ǝnga tsi ba hiya gǝ gyapǝu. 9Ma tsu, liya gǝ wu fuwa ngǝ wu bikau, tǝkuɗǝbiya ga vakana. A ndiya ǝnga mǝnahǝu anǝ ngau ga uya pi gǝra kuɗau ǝnga li zǝmǝu, a mwara nja vakuwa ngau a gwu uˈur kǝtsa ǝnga li mǝthlǝu.
Karapau Ar Kǝra Tǝmahǝu Sasa
(Luka 15:3-7)
10“Hya hangǝkal hya sara diɗa alaga pathlǝu wu pama wazha yiɗǝɗǝ kau. Ara yu nar hyi abǝr waladir nda ˈyar wu nggya cumu wu mwar Dǝɗa kǝra a dǝmǝlmau. 11Ariya Zǝr Ndǝ shili aga sa mbǝɗa nji sasa.#18:11 Alenyi tsǝfǝ ɗǝɗǝmǝ aˈyi ǝnga naja ka cifǝ mai.
12“Mi ngǝ ɗǝngar hyi ar kǝra ndǝr ka? Nja na, ma ndǝ ǝnga tǝmahǝ gharu, kǝ zǝma nyi sanakǝr, aˈyi ju piyari ǝdlǝkumunyi apǝ ǝdlǝ kau, a gwar tagǝu, ba ja maˈyi a nda gal pathlǝ kǝra sa kǝ wa? 13Ma ja nǝr nyi ri, jiri nga yu na anǝ hyi, ju nyabiya dzǝ ǝnga caguli ariya pathla tǝmahǝ kǝra ji nǝr kǝ a ndiya ǝdlǝkumunyi apǝ ǝdlǝ ta gǝra sa ta. 14Abangǝ nga nyi tsu, aˈyi yiwur huɗa Dǝrhyi kǝra a dǝmǝlmǝ ngau, aga pathlǝ wu pama wazha yiɗǝɗǝ kǝ a sanakǝr mai.
Zamǝ Kǝra Mǝliya Ngǝ Bikau
(Luka 17:3)
15“Ma zamǝ ngǝ mǝliya ngǝ bikau, maˈyi ga nda thlǝwa nyi zhizhi nyi ba ga nar nyi bikǝ kǝra ji mǝliya wu pama hyi mǝthlǝ hyi. Ma ji sǝya ngǝ himi, a shabiya nyir gau. 16Ama ma naja aˈyi sǝya ngǝ himi mai, nggari ndǝ pathlǝ alaga nji mǝthlǝ ba hya ɓǝra nda thlǝwa nyi. Aga sǝra ga na, nji mǝthlǝ alaga nji makǝru nda ɗa sakida nyi. 17Ma ji nggǝl ara sǝ himi nda tsu, ba hya hǝr nyi a ndǝgya daɓǝ dzǝ njir nu. Ma naja aˈyi sǝ himi nda tsu mai, ba hya hǝri nyi ar viya ndǝra gǝra sǝni Hyal alaga ndǝr bikǝ ndǝra gǝra tubi.
18“Jiri nga yu na anǝ hyi, kalar sǝra hyi mbiya wu duniya mbamba nga nyi a dǝmǝlmau, ǝnga kalar sǝra hyi pǝlna wu duniya pǝpǝl nga nyi a dǝmǝlmǝ ǝtsu.
19“Yu ɓǝra na anǝ hyi, kalar sǝra nji mǝthlǝ hǝnggǝri ndu kǝdiyau wu duniya, Dǝɗa kǝra a dǝmǝlmau wu nda mǝliya nda. 20Ənga hya sǝni abǝr kalar vira nji mǝthlǝ alaga makǝr kaɓǝ ari wu thlǝmǝ ɗa, aˈyi yi wu pama nda.”
Karapau Ar Kǝra Mafa Kǝra Gǝra Ənga Tǝhuɗǝu
21Kǝ Biturusu shili ji sa yiwa Yesu, “Thlagǝu, aga yiɗawu nga ya kyaga tǝfǝbiya zamǝ ɗa ma ji ndzana ɗa huɗa ya? A ɗa aga mǝɗǝfǝ ya?”
22Əngwar Yesu, “Awau, aˈyi aga mǝɗǝfǝ mai, ama mǝɗǝfǝ mǝɗǝfau, ar vi mǝɗǝfǝkumunyi.
23“Agabangau, nja na, nju gǝlabiya tǝlkur Hyal ǝnga vanyi tǝl kǝra ngga mafa nyi ˈyar kǝra ǝnga gǝnna nyi patǝ wu tsa nda aga nda nar nyi sǝra wu tsa nda patǝu. 24Ənggǝra nja vǝr lǝ anǝ nyi sǝra ɓau, kǝ nji shili ǝnga vanyi ndǝ kǝra ǝnga mǝl gangǝ kǝra ji gǝra sǝni kina wu nggyabiya nyi. 25Ta ji tǝwa ara kina gǝnna nyi, kǝ thlagǝr ki kǝ sǝwa aga nja ɗǝlna sǝ nyi patǝu, ǝkkǝˈyi mala nyi ba wazha nyi aga ja kina mǝla nyi ǝni.
26“Kǝ mafa kǝ uzhau wu mwar tǝl kau, ju kǝdi nyi, ‘Usi Alvari, tǝhuɗǝ ǝgya yau, yu kina ngǝ patǝu.’ 27Kǝ thlagǝr ki kǝ tǝhuɗǝ ǝgya ja, ba ji tǝfǝbiya nyi mǝl kǝra ju nu nyi patǝ ba ji maˈyi.
28“Ta ji biya sara wu mwar tǝl ta, ba ji thlǝwa kuvwa nyi mafa kǝra ju nu nyi mǝl nǝ gǝnna kushu. Kǝ ji mbar nyi ǝgya fǝlangǝ nga ja, ji na, ‘Kina ɗa mǝl ɗa kabangǝkau.’
29“Kǝ kuvwa nyi mafa kǝ ɓǝliya undi ju kǝdi nyi, ‘Tǝhuɗǝ ǝgya yau, yu kina ngǝ mǝl ngǝ patǝu.’
30“Ama kǝ ndǝ kǝ nggǝl ara nggar kǝdi nyi, kǝl ta ji fuwa nyi wu fursǝna kǝl ma ji kina nyi mǝl nyi patǝu. 31Ta alenyi mafaˈyar nggari abangau, ba huɗa nda ndzǝ gagaɗau. Kǝ ndǝ maˈyi ka nda nar nyi anǝ thlagǝr ki ta, sǝra ɗarkǝr patǝu.
32“Kǝ thlagǝr ki kǝ nggar mafa nyi, ji na, ‘Nagǝ mafa shishi. Yi tǝfǝbiya ngǝ mǝl kǝra wu dza gǝ patǝu, ariya gǝ kǝdi ɗa aga ya tǝfǝbiya ngau. 33Aˈyi ɗa tsaˈa ga tǝhuɗǝ ǝgya mafa kuvwa ngǝ wa, ǝnggǝr kǝra yi tǝhuɗǝ ǝgya gǝ ta wa?’ 34Kǝ sǝ kǝ ndzana huɗa thlagǝr ki kǝ gagaɗau, kǝ ji sǝwa nja fuwa nyi a gwu fursǝna aga nja nǝ nyi ɓwaɓwatǝu, kǝl ma ji kina gǝnna kǝra ju nu nyi patǝu.
35“Abangǝ tsu ngǝ Dǝɗa kǝra a dǝmǝlmau wu nda mǝl anǝ kalar ndǝra wu pama hyi ma hyi gǝra tǝfǝbiya zamǝr hyi ǝnga kwamǝr hyi sara wu ɗǝfuwa hyi.”
©2024 Initiative for the Translation and Development of African Languages and Margi Tiwi Nga Təm