Thlǝr 3
3
Biturusu Shilǝgǝbiya Ndǝ Kukurɓǝu
1Vanyi pǝci Biturusu ǝnga Yahwana nda vǝr maˈyi a ndu ki Hyal aga nda nda kǝdi Hyal nǝ saka makǝr nǝ wagǝu. 2Ənggǝra ndǝ thlǝwa vi ta, ndǝ aˈyi kǝra nji ya nyi kukurɓǝu, cumu nju hǝr nyi a shili ar miya ki Hyal kǝra nju ngga ǝnga miya ki Gumaguma aga sa kǝdiyau ara njir gwu ki Hyal. 3Ənggǝra ji lari Biturusu ǝnga Yahwana a vǝr yiwu nda gwa, ba ji kǝdi nda, aga nda nǝ nyi gǝnna.
4Biturusu ǝnga Yahwana tsamǝ nyi tusu gǝra hǝna li, kǝ Biturusu na anǝ nyi, “Tsamǝ ˈya!” 5Kǝ ndǝ kǝ hǝr hangǝkala ja a ndǝgya nda, ju nggani ju uya gǝnna ara nda. 6Kǝ Biturusu na anǝ nyi, “Gǝnna aˈyi ara yi mai. Ama sǝra aˈyi ara yau, ca nga yu nǝ ngau. Wu thlǝmǝr Yesu Kǝrsiti ndǝr Nazǝratu, hyaˈari ga ɓau!”
7Kǝ Biturusu mbari tsi mazǝma ja, ba ji dlǝwari nyi ji hyaˈari. Aga zǝmǝ kǝ hiya ndǝ kǝ ǝnga hwahwanga ja uya dǝnama ba ji ɗa jamǝu. 8Ji hyaˈari ǝnga vǝl ar hiya ja, ba ji dzǝguya ɓau! Ju ɓau, ju vǝl ǝnga ju fal Hyal. Kǝ ji maˈyi ǝnga nda a gwu ki Hyal. 9Patǝr nji lari nyi ja vǝr ɓau, ǝnga ndǝ nggari ja vǝr fal Hyal. 10Ənggǝra ndǝ tsamǝri abǝr ndǝ kukurɓǝ ndǝr kǝdi ta nju fǝ a miya ki Hyal kǝra nja ngga ǝnga miya ki Gumaguma ta ngau, ba sǝ kǝ ɗarkǝr kau, ɗa sǝ dǝdǝgur anǝ nda gagaɗau.
Biturusu Ndǝr Anǝ Nji Wu Ki Hyal
11Ənggǝra ndǝr kǝdi kǝ sǝɓǝya Biturusu ǝnga Yahwana, kǝ ndǝ dzǝgwa shili ǝnga hwi a shili ar vira nja ngga ǝnga dalaɓagǝu nǝ Solomanu, sǝra ɗa nǝ nda sǝ dǝdǝgur patǝ nda. 12Ənggǝra Biturusu lari abangau, kǝ ji na anǝ nda, “Kariya, njir Izirayila, ara mi ngǝ sǝ kǝ ɗa sǝ dǝdǝgur anǝ hya? Ara mi nga hyu tsamǝ ˈya ǝnggǝr ǝnga dǝnamar ˈya ba ǝnga cicikur ˈya nga ˈyi mǝliya ndǝ ka ɓa?
13Hyal nǝ Ibrahimu ǝnga Ishaku ǝnga Yakubu, Hyal nǝ dǝrmǝn ˈyar, ngǝ lǝr kadakadarkur anǝ mafa nyi Yesu. Naja ngǝ Yesu kǝra hyi lǝri aga nja tsǝya, ǝnga hyi piyari nyi wu mwar Bilatusu, alaga ta, a yiwur ja, ja sǝya nyi.
14Hyi piyari ndǝ cicau ǝnga ndǝ tsapǝu, hyi yiwa aga nja nǝ hyi ndǝr tsa ndau. 15Hyi tsǝya ndǝra dla ǝnga pi, ama kǝ Hyal hyaˈana nyi sara vir tau. Naˈya ma sakida nǝ sǝ kǝ ngau. 16Ənga mbǝrsa wu thlǝmǝr Yesu, ngǝ ndǝ kǝ hyu sǝni ǝnga hyu lari kǝ ɗa jamǝu. Thlǝmǝr Yesu ǝnga mbǝrsa kǝra dla lagu nyi ngǝ mǝliya ndǝ kǝ jamǝu, ǝnggǝr kǝra hyu lari patǝ kau.
17“Kabangǝkau, zamǝ ɗa ˈyar, a sǝni yau, hyi mǝl sǝˈyar kǝ ara gǝra sǝnkur, abangǝ tsu ngǝ njir tǝɗǝmwa anǝ hyi. 18Ama abangǝ ngǝ Hyal nyabiya sǝra ji nana lagu miya nabiˈyar patǝu, abǝr kǝl Kǝrsiti nyi lari ɓwaɓwatǝˈyar kau. 19Kabangǝkau, hya tubi, hya sha shili ara Hyal aga ja sa cina hyi bikǝr hyi. Ma hyi mǝl abangau, pǝci nǝ cakǝ dǝnama wu mambǝlǝr hyi wu nda shili sara ara Thlagǝu, 20ǝnga ju nda sǝwa Yesu, Kǝrsiti kǝra ji caɗǝbiya hyi.
21Naja, ju dumwa ǝnga nggya a dǝmǝlmau, kǝl pǝci kǝra Hyal wu nda shabiya kalar sǝ ǝnggǝra ja ɗǝɗǝmǝu, ǝnggǝra ji mǝliya alkawal tsu kaɗǝ lagu nabi nyi ˈyar cicau. 22Ara Musa na, ‘Hyal Thlagǝr hyi wu nda sǝwa hyi nabi ǝnggǝr nayau, sara wu nji gǝ hyi. A ɗar tsaˈa hya sǝya nyi himi anǝ kalar sǝra ju na anǝ hyi.’ 23Kǝ Musa ɓǝra na, ‘Kalar ndǝra gǝra sǝya nyi himi anǝ nabi kau, nju hǝbiya nyi sara wu pama nji gǝ Hyal.’
24“Ənga jiri, dzǝguya ar Samuyalu ba shili ar patǝr nabi kǝra shili wu yukuɗu, a ndǝr nda ar kǝra sǝra a vǝr ɗa ǝshina kau. 25Nahyi culi nabiˈyar ta ngau, ǝnga nahyi aˈyi wu kalar alkawal mbamba kǝra Hyal mǝliya ǝnga ǝjir hyi. Ara ji na anǝ Ibrahimu, ‘Lagu culi ngau ngǝ patǝr njir duniya wu nda uya barka.’ 26Ənggǝra Hyal sǝwa mafa nyi, Yesu, kǝ ji sǝwa nyi tanggǝrma anǝ hyi njir Izirayila, aga ja sa fǝnggǝr hyi barka lagur shabiya bama hyi sara ara bikǝr hyi.”
©2024 Initiative for the Translation and Development of African Languages and Margi Tiwi Nga Təm