Thlǝr 2
2
Shidar Mambǝl Cicau
1Ar pǝci kǝra lardur nǝ Pentikosu shili, njir nu patǝ kaɓǝ ar vi zǝmǝu. 2Kukuthlǝ kǝ ɗahǝ shida sara a dǝmǝlmǝ ǝnggǝr majigwal, ji sa nyabiya huɗa ki kǝra nda vǝr nggya a gwa. 3Kǝ ndǝ lari vanyi sǝ ǝnggǝr kyara uˈu shida ka sa tǝtǝlnakǝr a dar kǝra nda patǝu. 4Kǝ Mambǝl Cici nyana kalar ndǝra a ndǝna, ndǝ dzǝgwa ndǝr wu miya pampamǝ ǝnggǝra Mambǝl Cici lǝbiya nda.
5Ar pǝci ta, alenyi njir Yahudiya kǝra wu hivǝr Hyal aˈyi gangǝ sarar ˈyiˈyi pampamǝ gangǝu, kǝra a vǝr nggya a vwu Urshalima. 6Ar pǝci kǝra ndǝ nggar naja ka huɗa ɗahǝu, kǝ dlami kaɓau, ndu tsamǝ sǝ dǝdǝgur, ara kalar ndǝ wu pama nda a vǝr nggari njir nu nda vǝr ndǝr ǝnga miyar nda.
7Kǝ ɗa sǝ dǝdǝgur gagaɗǝ anǝ nda, kǝ ndǝ yiwa, ndǝ na, “Kariya, aˈyi njir Galili ngǝ nji kǝ patǝ wa? 8Ya, abari nga ˈya vǝr nggari kalar ndǝ a vǝr ndǝr ǝnga miyar ˈya ka?
9Kǝja naˈya njir Partiyasu ngau, ǝnga njir Medesu, ǝnga njir Ilamatu, ǝnga njir Masopotomiya, ba ǝnga njir ˈyiˈyir Yahudiya, ǝnga njir ˈyiˈyir Kapadokiya, ba njir ˈyiˈyir Pontusu, ǝnga njir ˈyiˈyir Asǝya, 10ba njir ˈyiˈyir Fǝrjiya, ǝnga njir ˈyiˈyir Pamǝfiliya, ba njir ˈyiˈyir Masaru, ǝnga njir batitiya ˈyiˈyir Libiya kǝra lǝhǝ a dzǝr Sayirini, patǝ ǝkkǝˈyi mǝthlǝpi nji sara wu Roma, 11njir Yahudiya, ǝnga njira sha shili wu mbǝrsa nǝ njir Yahudiya, ǝnga njir Kǝretunu, ǝnga njir Arapǝu. Patǝ mǝn wu nggari sǝra nda vǝr na ǝnga miyar mǝn sǝ dǝdǝgurˈyar kǝra Hyal mǝlna.”
12Kǝ sǝ kǝ ɗa sǝ dǝdǝgur anǝ nda, ǝnga ndǝ jiɓa, ndu na, “Sǝr mi nga abanga?” Ndu yiwa kǝrnda.
13Ama alenyi nji wu pama dlami wu ndǝr nǝ diɗa nda, ndu na, “Padlǝ nga ndǝ nyi ǝni.”
Biturusu Tǝtǝlna Ndǝr Hyal Anǝ Dlami
14Kǝ Biturusu hyaˈari daɓǝ ǝnga cama sǝsǝ ˈyar kumo a sǝrtangǝu, ji ndǝr anǝ nda ǝnga ɗahǝ dǝdǝgalǝu, ji na. “Sǝya mǝ himi mǝnahǝu, nji gǝ ˈya njir ˈyiˈyir Yahudi ǝnga patǝr njira a vǝr nggya wu Urshalima, nggara mau ǝnga hya nggabiya sǝra ya vǝr na kau. 15Hya sara nggani abǝr padlǝ ngǝ nji kǝ nyi ǝni mai. Aˈyi saka ǝdlǝ nǝ mudlǝ ngǝ wacu wa? 16Awau, sǝra nabi Joyalu nana tsu kaɗǝ ta ngau, abǝr,
17“Hyal na,
‘Ar pǝcir kuɗiyar duniya,
Yu sa pǝnggǝr nyi
Mambǝl ɗa a gyar kǝra nji patǝu.
Wazha shiliˈyir hyi ǝnga kuˈyir hyi ndu nda na ndǝrhaha.
Wazha baduwari nǝr hyi wu nda ɗa njir lari mǝtakǝr,
ǝnga njira nggurǝmǝr hyi ndu
nda hǝ shuni pampamǝu.
18Ar pǝci ta tsu,
yu nda pǝnggǝr nyi mambǝl ɗa a gyar kǝra mafa ɗa ˈyar nǝ shili
ǝnga mathlǝkǝˈyi ǝnga ndu nda ɗa
njir ha ndǝr Hyal.
19Yu nda mǝliya
sǝ dǝdǝgur a ɗa a dǝmǝlmau
ǝnga mǝtsamǝˈyar
tsu ngǝ wu duniya,
ca ngǝ mashi ǝnga uˈu
ǝnga dlama nǝ ˈyar
kyakyar sitǝu.
20Pǝci wu nda ɗa
kyakyar sitǝu
ǝnga hya wu nda shabiya
dzǝ dǝzǝ ǝnggǝr mashi
kadivira pǝci dǝgalǝ
gagaɗǝ nǝ Thlagǝu,
a dzǝgwa shili.
21Ama kalar ndǝra
ngga thlǝmǝr Thlagǝu,
ju nda uya mbǝɗau.’
22“Njir Yahudiya, nggara mau! Ar babal ngǝ Hyal cabiya hyi abǝr naja ngǝ sǝwa Yesu ndǝr Nazǝratu, lagur sǝ dǝdǝgurˈyar ǝnga sǝˈyar kǝra gǝra saya ɗa kǝra ji mǝlna, ǝnggǝr kǝra hyu sǝni patǝu. 23Hyal ǝnga kǝrnyi ngǝ nǝ hyi ndǝ kau, ǝnggǝra ju yiwu, ba nga sǝni nyi nga ji fuwa wu lagu tsu kaɗǝu. Nahyi ba ǝnga dlǝwa dzǝ nǝ nji ɗǝmwaˈyu, ba hyi tsǝya nyi lagur dlakǝya nyi ar wu dladlakau. 24Ama kǝ Hyal hyaˈana nyi sara vir tau, ji pǝliya nyi sara wu ɓwaɓwatǝ nǝ tau, ara tǝ aˈyi ǝnga dǝnama sǝɓǝya nyi mai. 25Tǝl Dawuda na ar kǝra ja abǝr:
“ ‘Yu lari Thlagǝ
cumu wu mwa ɗa.
Naja ar lagu mazǝma yau,
agabangau, nayu kǝnggǝɗǝr dzǝ mai.
26Agabangau, ɗǝfuwa yi pipida,
ba ǝnga miya yau, nga ya vǝr fal nyi.
Dza yi tsu,
ju nggya ǝnga fǝrkǝr,
27ara nagǝ aˈyi wu
piyar ɗa wu hu mai,
ǝnga tsu naga piyari Ndǝ Cici ngau,
ja ɗiya wu hu mai.
28A mǝliya ɗar gǝ
yi sǝnibiya lagur pi,
ǝnga gǝ nyabiya ɗa
ǝnga caguli wu mwa ngau.’
29“Taguˈyi, yu sǝni nar hyi gǝra nga kǝpal abǝr ǝjir mǝn Dawuda a tǝri ja ǝnga nji haɗǝna nyi. Kǝja hu nyi aˈyi ǝkkǝˈyi mǝn baˈanǝ ǝshina. 30Ama naja nabi ngau, ǝnga ju sǝni alkawal kǝra Hyal mǝliya nyi daɓǝ ǝnga sǝm fǝla abǝr naja aˈyi wu tini uya ǝji nyi ar tsǝkafǝ tǝlkur nyi mai. 31Dawuda naja vǝr lari sǝra a vǝr shili a dumwa, ca nga ju ndǝr ar kǝra hyaˈari Kǝrsiti sara vir tau. Ju na abǝr Hyal wu nda piyari nyi ǝnga nji tǝtǝ mai, ǝnga tsu dza ja aˈyi wu nda ɗiya wu hu mai.
32“Hyal a hyaˈanari Yesu kǝ sara vir tau. Namǝn patǝ ngǝ sakida naja ka sau. 33Kabangǝkau, naja vǝr nggya wu kadakadarkur a dǝmǝlmau, ar tsi mazǝma Hyal. Ta ɗa a dlǝwuri ja Mambǝl Cici kǝra Tada hǝr alkawala nyi, ji dzǝgwa pǝnggǝr nyi a gyar nji Mambǝl Cicau, ǝnggǝra hya vǝr lari ǝnga hya vǝr nggari ǝshina kau. 34Ara Dawuda ǝnga kǝrnyi saya tǝrabiya a dǝmǝlmǝ mai, ama ji na,
“ ‘Thlagǝ na anǝ Thlagǝ ɗa,
“Nggya ar tsi mazǝma yau,
35kǝl yi fiya dawa ngǝ ˈyar
a gyi gya
kiɗa hiya gau.” ’
36“Agabangǝ bǝgǝ patǝr njir Izirayila sǝni abǝr, Hyal a mǝliyari Yesu kǝra hyi dlakǝya gyapǝu Thlagǝu ǝnga Kǝrsiti!”
37Ənggǝra nji kǝ nggar ndǝr kau, ba ndǝr kǝ tsaviya ɗǝfuwa nda, kǝ ndǝ na anǝ Biturusu ǝnga alenyi cama sǝsǝ ˈyar, “Zamǝˈyar, mi nga ˈya mǝla?”
38Biturusu shaɗǝwa, “Hya tubi nja mǝliya hyi baɓǝtizǝma, anǝ kalar ndǝ wu pama hyi wu thlǝmǝr Yesu Kǝrsiti, aga hya uya nja tǝfǝbiya hyi bikǝr hyi. Ba hya dlǝwuri lǝ nǝ Mambǝl Cicau kurthlǝu. 39Alkawal kǝ anǝ hyi ǝnga wazhar hyi ǝnga njira tsu a biyar tagǝu. Alkawal kau, Hyal Thlagǝr mǝn mǝliya anǝ patǝr njira ju nda ngga anǝ kǝrnyi.” 40Biturusu kughiya nda ǝnga ndǝr pampamǝ gangǝu, ji kǝdi nda ǝnga dǝnama, ji na, “Kǝtiya mǝ kǝrhyi sara ara ɓwaɓwatǝ kǝra a vǝr shili ar kǝra nji ɗǝmwaˈyu, njir duniya nǝ kabangǝkau.”
41Njira hǝnggǝri ǝnga ndǝr Biturusu, ba nji mǝliya nda baɓǝtizǝma. Njir nu kǝra cakau a kari nda nji dubu makǝr ar pǝci ta.
Daɓǝr Kǝr Nǝ Njir Nu
42Patǝr njir nu ndǝ lǝr kǝrnda wu highiɓǝ nǝ cama sǝsǝ ˈyar ǝnga daɓǝ dzau, ǝnga ndu sǝm sǝr sǝm nǝ yiwukur ba ǝnga kǝdi Hyal.
43Kǝ hivǝr mbar nji patǝu, ara sǝ dǝdǝgur pampamǝ gangǝ kǝra Hyal mǝliya lagu cama sǝsǝ ˈyar. 44Patǝr njir nu wu daɓau ar vi zǝmǝu, ǝnga ndu tǝkǝ sǝra ara nda wu pamǝu. 45Ndu ɗǝlna sǝra aˈyi ara nda, ba nda nǝ nyi gǝnna nyi anǝ njira gǝra ǝnga sau. 46Kalar pǝci ndu dumwa ǝnga kaɓau wu ki Hyal ǝnga huɗǝ zǝmǝu. Ndǝ ɓǝɓǝlǝwa ndu tǝkǝ macikǝl a ndu ki ǝnga ndu sǝm sǝr sǝm ar vi zǝmǝ ǝnga caguli ba ǝnga huɗǝ zǝmǝu. 47Nda vǝr fal Hyal ǝnga ndu nggar mǝsahǝkur ǝnga mayiwakur nǝ nji patǝu. Kalar pǝci Thlagǝ a vǝr cakǝri gangǝkura njira uya mbǝɗau.
©2024 Initiative for the Translation and Development of African Languages and Margi Tiwi Nga Təm