Hébreux 9
9
Nzambé aneegedu gô tsina, na aneegedu g’ôba
1Evamba éamapanga éamôma na Nzambé émabaka na mabégôme mamatôma Nzambé gô mônongo ônganeegedu angô gô ebedi agébandé ava tsina. 2Eba agébandé ômasaaô. One ôvôni ômatetu mbe tungune éneegedu Nzambé. Wangô gômadegenganô gévumbéô sadambi na dôta tabudé émadigaa mipemba mimadeekedu na gôndé Nzambé. 3Va ngima amôkanda ombô gômadenganô tsongo éadisambô ééndô mbe gédigaa saNzambé. 4Gô tungu nene gômabaka gétumbéô samôyombo ambônga éamôsôba. Gétumbéôge gémakônzu na dodo. Gômabaka dôta gégaa gévôni gémakônzu na dodo gématetuku mbe gésuégéô sevamba. Gô gatse agégaage gômasuégu gépede gémakônzu na dodo gôékenea ôkabô amôyakô ômaagéda Nzambé g’ôba gô tsenge émagasani. Gômasuégu dôta na môtunga aAaron, ône ômabuéda nzôbé na miônda. Na gômakeneo mataé mabaé mamatenda Nzambé ôgie wedi ômavambangô n’omedi. 5Va ngongo agégaa géne gômabaka gégoni gémapakôni sasi g’ôba. Gégonige gématubédaka mbe Nzambé andéké éva. Papaye y’asi g’ôba dimawanya gôépika tungu émeenanô ngeba yaNzambé. Te tungu émadeekedu ôgondoku ôsingéa môma kokoo gô mabégô medi mabévani. Ivô gôsaba ndéô gôénigôa metso mane.
6Vamakônzu eba ône nane, adeekedi adigondoku ameengéa pitsi yetso gô ebee amapanga ôvôni gôéyanza éyanzee éaô, gékôndé ta na pitsi épo. 7Ivô gô eba amôbaé ava ngenge gômeengéa te pene adeekedi adigondoku amuene. Ameengéa gô môpumovo kukepo. Ameengéa gône amatsua nzina yanyama gôédeekeda yangô na gôndé Nzambé. Amaduka kokoo gô mabégô mabévani maamuene, na mane moma muetso mamayanzahngô g’ôdungé. 8Vane Gédidi SaNzambé gétôtubéda mbe, vagébaka ebee ôvôni amapanga, gôsaba nzéa gôndé oma abobo gôéengéa na gô tsongo éadisambô édigaa Nzambé gô eba ava ngenge. 9Dine te ndongi ditôongu deo noo. Ndongiye te mbe, dibiia diitsa môma na gôndé Nzambé na dôta nzina yanyama dideekedu na gôndé Nzambé disaba na ngudi yeôvôa môtémee wetso amôma, ône abuta éneegeda Nzambé gô gésôgage géne. 10Gô évambee éambeego éne, gômadenganô mabégô mamiyakô na mane manyuôni, na mane meesôga gôégôgéda môma na pingô yamige na mitôma. Oma amanyepedu va mbene aNzambé gô gékeneo samabégôme mane ngu na ndéône émaviga Christ gôétôtubéda nyene nzéa.
11Na amuene Christ amaviga gôéba môdeekedi môvôni adigondoku môsungéyi akinde oma. Digondokuye te mane mamisôba mandéké n’asô n’anyô deo noo. Eba agébandé ôdigaangô Nzambé ootéa ényepa na ootéa ôvôni n’one ambeego. Ebee adeo noo ôsisaaô na môma na ôsaba n’evamba na tsinane édué émakanôni. 12Christ ône amasevou na Nzambé ameengéa kukepo gôndé muetso gô tungu ééndô mbe, tsongo éadisambô édigaa Nzambé. Asiingéé na nzina yataba vo dine yapagasa gôédeekeda Nzambé yangô. Ameengéa gôédeekeda nzinaye yedi amuene gôétôoboo môbô na môbô. 13Va mbeego ane amookua mitôma na mige miaNzambé, yôtô yaô dimagôgéa vamasôgu yangô na nzina yataba na dine yapagasa. Na dimasôgu dôta na mooto anyama dimabékuni. 14Okô mbe nzina yanyama dimaba na ngudi nane, tambô tasani ngudi diôtéani dindé gô nzina yaJésus‐Christ. Amaadeekeda amuene ôgondoku agébé n’oési. Nzina yedi digôgéda mianga miamitéma miasô n’anyô gômbe mikebanganô na ésima ébévani ésangamana ngudi yasô. Na vane tôngaba na ngudi gôéyanzéa Nzambé Kumu amonyo.
15Nôeni ébégô émasevou Christ gôéba môsungéyi gôétôvambéda na Nzambé gô évambee éamôbaé. Andéké môsungéyi awa n’anyô tômabambéô na Nzambé gôédiia ôkiti ag’ôba ômavangéa Nzambé mbe: Te mikuanya mianyô. Wa n’anyô tôngoongôa édiia ôkitie ône gôébégô môvo amawa. Owee ône ôyuua oma muetso gô môtsundu ebévee éaô émadigaahngô gô évambee éambeego.
16Môma agédôngaka atsika ôgi gangakabô mikuana miokitie wedi. Môma nône madeo asiwa, ôkitie wedi ôsangakabô. 17Ogi ômatsika môma ôsaba na ngudi kumu okitie agédôngaka. Ogie ôndé na ngudi, te amawa. 18T’ebandô évamba éamapanga éambeego ésibé na ngudi, nzinaye madeo disiaaga. 19Bangôani éne émeenda Moïse. Amatema môtie gôénigôa géômbége gémakôvanani, ndongi na mitôma na mige mimeetsa Nzambé. Vane amatsuéta môtabé agéétété gééndô mbe hysope, na dôta mikodi mianyonge éatsoo, gô nzina yapagasa dimagésu na meba. Amamuaka migandamie mimatendu mige na mitôma miaNzambé na amamuaka na géômbége kukepo na nzinaye. 20Vane Moïse amapandôéda mbe: Nzina yedi diitsa ngudi gô évamba éanyô na Nzambé mbe nôsipa gô éangô. 21Na Moïse amamuaka nzina gô ebee agébandé na gô éôma éetso éneegedu Nzambé. 22Gô mitôma miaNzambé, éetso égôgédu te na nzina. Ebévee éamôma ésasingéô kokoo, buétsé te gô ngudi yanzina dimaagani.
Jésus amaadeekeda amuene ôgondoku gôénôtôa môma mabégô medi mabévani
23Eba agébandé aNzambé na éôma éetso émabaka wangô émasaaô gôékanéga mane mapie mag’ôba. Gôébégô ebee ône agébandé te ava tsina. Na ômagôgédu na nzina dimamuaka Moïse. Ivô ône apie ôndé g’ôba ôgôgédu n’ogôndôku ôvôni kaka anyama. 24Gôébégô Christ asiengéé gô tsongo éadisambô édigaa Nzambé émasaaô na môma mbe Christ adeekeda amuene gône. Eba ôsaa môma gôéneegeda Nzambé te makanégéda mone apie ag’ôba. Jésus ameengéa na g’ôba gôéadeekeda amuene te gôétôsungéa va mbene aNzambé deo noo. 25Va mbeego tsesu yadeekedi adigondoku ameengéa mipuma mietso na nzina yanyama na gô tsongo éadisambô édigaa Nzambé. Ivô Christ asiindé nane. Asiengé amuene kuka diyekani. 26Mbe émabaka nane, Christ mbe ameengéa kuka diyekani bandôa gômakanô tsina n’oba. Menyani mbe, vamawesea ndéône mbe tsengene émabungana, Christ amatsiga kukepo gôndé muetso gôéadeekeda amuene ôgondoku gôébusua ébévee éoma muetso. 27Emakitsô mbe: Môma na môma angawa te éta épo, na va mbene owa angatsundédu na Nzambé. 28Te mônongovo dôta émavangô mbe Christ amaadeekeda amuene ôgondoku kukepo gôénôtôa ébévee éoma ayekani. Na angaviga kukane éamôbaé kaka gôébusua ébévee, ivo te gôéengéda gô géobogeo ane andé gôémôenéani.
S'ha seleccionat:
Hébreux 9: TSV
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Alliance Biblique du Gabon (Bible Society in Gabon) 1983