Hébreux 10
10
1Ndongi na mitôma na mige mimabaka n’Ajuif misaba gégoni sapie samane mandé na Nzambé. Mine miaô te ga gédinadina géenanô n’omanda géndé na bôbé na misatubéda na vede mane mavigani. Mitômamie na migemie mine misaba na ngudi gôétsimaméda môma anyôngéô éwesea na vandé Nzambé. ?Mingaba na ngudi nayee? Gô miangô môma amadeekeda digondoku môpuma na môpuma gédundé. 2Ane amaneegeda Nzambé gô mônongo ône, mbe amagôgéduku kukepo gô ébévee éaô ahngô mbe ahsiniké éyanza ébégô ébévani ta n’evo, na mbe asiômbé édeekeda ôgondokue. 3Ivô digondokuye dimadeekedu gôébangôéda ahngô ébévee éaô, éma n’ema. 4Menyani mbe nzina yataba na yapagasa disibé na ngudi ta na pesu, gôénôtôa môma ébévee éedi.
5T’ebandô gô ndéône émabaka Jésus mbe aviga na gô tsina, amavovo na Nzambé mbe:
Ewe ôsabuta éétsô ôgondoku, na ôsabuta éétsô ôbiia.
Ivô ômakônzéa me ôtô.
6Ewe ôsatsôkéa digondoku yanyama dibéku gô gévumbéô sogondoku.
Ewe ôsatsôkéa digondoku diitsô gôénôtôa môma ébévee éedi.
7T’ebandô, me Christ navovo mbe: Ah Nzambé, me nangôô.
Navigi gôéyanza éne ényôngéô éwe.
Mônongovo gamatendu gôndé me gô Matendeo Moo.
8Jésus amapanga évovo mbe: Ewe ôsabuta éétsô ôgondoku na ôbiia. Osabuta na nyama dibéku gô gévumbéô sogondoku, na ôgondoku ôétsô gôénôtôa môma énévee éedi. Ewe ôsatsôkéa yangô. Tambô digondokuye dine dimeetsô gôégôbeda mitôma miamuene Nzambé. 9Vane oomba évovo mbe: Ah Nzambé, me nangôô. Navigi gôéyanza éne ényôngéô éwe. Gô éne tôéna gakina Nzambé digondoku dimeetsô va mbeego na adiviaganéda n’ogondoku aamuene Christ. 10Gôébégô Jésus‐Christ amadugéda éne émanyôngéô Nzambé. Wa n’anyô tôgôgédu mabégô metso mabévani g’ôgondokue ômadeekedangô, te ôtô edi amuene kukepo gôndé muetso.
11Adeekedi adigondoku muetso andé mitie pitsi yetso gôéyanza éne ématômu ahngô. Kuka yetso adeekeda digondokuye te mônongovo. Ivô yangô disaba na ngudi gôénôtôa môma ébévee éedi. 12Géé amuene Christ amadeekeda ôgondoku ôvo amôbô na môbô, gôénôtôa môma ébévee éedi. Vamamanangô éadeekeda amadigaa gô géeyo gémôgôô saNzambé. 13Deo noo Jésus andé wangô gôéenéa éne éngayanza Nzambé gôésugéda adudeoe wedi aka gétukéô samakôdô medi. 14Vane tôena mbe gô ngudi yogondoku ôvo, Christ amatsimaméda va mbene aNzambé môbô na môbô ane amagôgédu ébévee éamitéma miaô, ti eembe asaba n’oési.
15Gédidi SaNzambé gétônigôa te nane. Gépanga étônigôa éne émavovo Kumu mbe:
16Nôeni, évambee éamôbaé éngavamba me n’oma aIsraël.
Vangabuéa ndéône, me Kumu nangakuya mige na mitôma miami gô mitéma miaô.
Nangamitenda gô matasa maô.
17Vane amoomba évovo mbe: Tsangadôtanganéda ébévee éaô na diésiye yaô. 18Na gô pie, ôkô ébévee ésingéô kokoo, kumu amangô asangôômbadô édeekeda ôngondoku gôénôtôu mangô.
Tôweséni na gôndé Nzambé
19Endé te nane ana aTétee agô mbumu éaNzambé. Gô ngudi yanzina yaJésus wa n’anyô tôndé ngu gôéengéa na gô tsongo éadisambô ééndô mbe gédigaa saNzambé. 20Jésus amatôpadéa nzéa éamanza ésikiakô na mbeego. Nzéa nene te éamonyo na éôta gô môkanda ombô ômabaka gô eba aNzambé. Ombô ône ômakakô gômabetu ôtô aJésus. 21Wa n’anyô tôndé na môdeekedi adigondoku te môsungéyi môvôni, na angô te pene agô mbumu éaNzambé. 22Tambô tôweséni na gôndé Nzambé na mitéma miamavôma. Na tômôétsa mitéma gébé na paga gô mabégô medi metso. Buedi mbe mitéma miasô n’anyô mibaké mimagôgéani kabaga mianga miamitéma miasô mibéva. Na buéyé na yôtô yasô n’anyô diôvôu na meba masaba na mbugé na tsengesenge. 23Tôsimbédéni pepe éne étôtendédani na éne étôéékédani. Tôsoongôa étsuma paga gôndé Nzambé na éne émavangéa angô wa n’anyô. 24Tôkasôanéni wa n’anyôene na wa n’anyôene gôéôtéa ényôngananéô na gôéôtéa éyanza mane mamisôba. 25Tômbiatsika éwanyéa gô eba aNzambé. Tômbiaba gandé avo amadeka gésima sagévigé na gô eba aNzambé. Géé wa n’anyô buedi mbe tôdenganô gôékasôana wa n’anyôene. Tôôtéa éénda nana veena wa n’anyô mbe nyee agénikéô saKumu ôwesea.
26Okô wa n’anyô tômani éôkô mabégô mapie, tôômba éénda mane masanyôngéô Nzambé n’osôbee asô n’anyô, gôsabadô wene ôgondoku ôngoongôa étônôtôa ébévee éne. 27Okô tôdigéyi n’osôbee asô gô mabégô mabévani gôsabadô yene ébégô, te gomo ôtévo gô éne éngabuéani. Ene éngabuéani te môtsundu ôvôni aNzambé na soto géseemakani gékeneo gôndé adudeo aNzambé. 28Va mbeego muetso amookua mige mimabaka na Moïse, ahmasosedu. Okô ahngô abé n’oési gômanigôa mabangiye dibaé ditatô, amayôhu géenanô ngeba. 29Tambô tasani gôndé ône eenza Jésus, Muana ANzambé. Tasani gôndé ône eenda mbe nzina dimaaga gôévambéda angô na Nzambé na gôégôgéda angô môtéma disaba na tsoongo. Na angô dôta adeta Gédidi sangeba yaNzambé. ?Gôndé angô éngaba nayee? Tôsabômu mbe tsôgôône yaô éngootéa na éne éandéô éaMoïse. 30Wa n’anyô tôsabômu ône amavovo mbe: One avéndani, te me. One avénda môma na akôndéga événda, te me. Amavovo dôta mbe: Amuene Kumu angatsundéda omedi. 31Endé ti édagani gôétsôpu na mogo maNzambé ône asawani.
32Bangôani mane mamabuéa gôndé anye. V’ebandô vameengéa gévede saNzambé na gôndé anye nômeena ti maguga mavôni, ivô nômasipa gétsiké gévedege. 33Dipo kuka nômadetu na nômabômôu va mbene oma. Dipo kuka nômadenganô gôésipéda akanyô amatubédu maguga mane. 34Nômawanyeda moonga na maguga mameena asi tsôgôô. Vamawatô anye ôkitie wanyô ava tsina anye nômatsôkéa gôébégô nôsibômu mbe: We tôndé na wene ôkiti ôôtéa ényepa n’one n’angô te amôbô na môbô ôsangagôgani. 35Tambô sipani gamasipanye v’ebandô gébé na buétsé. Môsenda ôvôni ôkeneo gôndé anye nôsipani. 36Buedi mbe nôyanza na mavôma mane manyôngéô Nzambé. Vane nôngadiia éne émavanga angô gôndé anye. 37Endé te gatôtanga gô Matendeo MaNzambé mbe:
Gôsanéa vipesu viandéô, ti vipesu.
One eendô mbe angaviga, na gô pie angaviga.
Asangaamba éviga.
38Buéyé vane, ône andé n’etsimama va miso mami adônga te gôétsangô Nzambé môtémee gémôtsumé paga.
Ivô ône anika ngima, me tsangeena gényônga n’edi.
39Wa n’anyô tôsaba gô géômbé sane anika ngima gôékea gôédimbana. Wa n’anyô tôndéké gôéténdéda. Nzambé gébé na paga na tôndéké gô nzéa éagéobogeo.
S'ha seleccionat:
Hébreux 10: TSV
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Alliance Biblique du Gabon (Bible Society in Gabon) 1983