Hébreux 7
7
Melchisédek amabaka môtômi môvôni na môsungéyi oma
1Melchisédek te mômôgôô amabaka môtômi amôsenge ôéndô mbe Salem. Amabaka dôta môdeekedi adigondoku gôéyanzéa Nzambé, Kumu angudi yetso. Nyovo Abraham amaviga amamana égenya ébadie na atômie ayekani. Na te Abraham amadiia gô éangô. Na Melchisédek amakea gôéwanyéda angô, na ameetsa Abraham mate. 2Vane Abraham amamôétsa ôkabô okiti ômadiiangô. Gô nzima na nzima yoma, Melchisédek ameetsô sôma gévo gévo. Ina aMelchisédek événdégéô te mbe, Môtômi atôma gépenganédé mabégô. Va ngongone vane, angô te môtômi amôsenge aSalem. Evéndégéô te mbe, Môtômi agétabé, asaba na diyunga. 3Ebandô éaMelchisédek ésamenyanganô mbe tétedi simbe, yeedi simbe. Obôtue wedi, n’owee wedi ôsamenyanganô. Agono n’amuene Muana ANzambé, andé môdeekedi adigondoku môsungéyi amôbô na môbô.
4Tasani gamabakangô môma môvôni. Amuene Abraham tétene oma aNzambé muetso, amamôétsa ôkabô aene émadiiangô gô ébadi. Gô nzima na nzima yoma ameetsa Melchisédek sôma gévo gévo. 5Tôsabômu mbe ana aLévi, te ahngô adeekedi adigondoku, ameetsô ôtômu gôéduka ana aIsraël muetso, môma na môma ôkabôe waô. Gô nzima épo épo ayuua sôma gévo gévo. Asi mubu éaLévi amaduka anee atétee n’aô. Angô muetso tétene yaô te Abraham. 6Ivô gôndé Melchisédek ésibaké nane, angô kaka muana aLévi. Buéyé mbe nane, Abraham ameetsa angô ôkabô okitie wedi. Gô nzima épo épo amamôétsa sôma gévo gévo, angô gébé môsi mbumu éaAbraham. Na vane Melchisédek ameetsa mate gôndé Abraham, môma môvôni amavangéa Nzambé ôvanga ôvôni. 7Tambô, ôné eetsa mate ootéa n’otômu na ône eetsiôni. 8Adeekedi adigendoku amabongo g’ôkiti amôma ôkabôe waô, gô nzima épo épo, sôma gévo gévo. Anguene te oma angawani. Géé Melchisédek, amabongo ôkabôe wedi angô môma amonyo gatôtanga gô Matendeo MaNzambé. 9Vane tôongôa évovo mbe vameetsa Abraham Melchisédek ôkabôe wedi te na Lévi muetso andé gôémôétsa ôkabôe, buéyé mbe Lévi te géômbé sane eetsiôni. 10Vamawanyédu Abraham na Melchisédek, émabaka te Lévi madeo asibôtu, ivô amabaka gandé g’ôtô atétedi Abraham.
11Gédeekedéô sadigondoku gémabandôa na Lévi na sangô te étsinee éamige mimakitséa Nzambé ana aIsraël. Ivô oma asiôngôé éobou gô ngudi yadeekedi adigondoku, angô ana Aaron. T’ebandô Nzambé amatôma muene môdeekedi adigondoku amôbô na môbô môsungéyi gô mônongo ômabandôa na Melchisédek. 12Vakoga mônongoe ôsungéô môma va mbene aNzambé, tambô na étsinee éamige miaNzambé éngakoga. 13Endé te nane, Kumu asô n’anyô Jésus asibaké môsi ébôta éasungéyi. Gô ébôta éaJésus madeo gôsibé môdeekedi adigondoku gôéyanzéa Nzambé va gévumbéô sadigondoku. 14Wa n’anyô tôsabômu mbe Kumu Jésus te môsi ébôta éaJuda. Ebôtee éne ésitetu na Môïse mbe éangô éngaba asungéyi oma va mbene aNzambé.
Môvo môsungéyi agono na Melchisédek
15Oôkôni dôta éne étônigôa na vede mônongovo gamabaka Jésus. Gômaviga môsungéyine amôbaé, amagono na Melchisédek. 16One amôbaé aseengédu gô ngudi yamôma gô éyanzee éamôdeekedi adigondoku na éamôsungéyi oma. Ameengédu gô éyanzee éne gô ngudi yamonyo amôbô na môbô. 17Te gatôtanga gô Matendeo MaNzambé mbe:
Ewe ôngaba môdeekedi adigondoku môsungéyi akinde oma môbô na môbô
Mônongovo gamabandôa Melchisédek.
18Vane tôena mbe mônongo ambeego ômeengédu môma gô éyanzee éne, ômatsikô gôébégô angô ôsibé na ngudi na ôsibé na tsoongo. 19Mige na mitôma miaMoïse misibé na ngudi gôényepeda na gôédugéda monyo amôma. Ivô tômeetsô wene mônongo gôényepedu na gôédugédu. Gô ngudi yamônongo amôbaé tôwesea na gôndé Nzambé gôévamba n’edi.
20Nzambé amasongéa inedi mbe: Môsungéyine amôbaé angayanza môbô na môbô. Adeekedi adigondoku ambeego ameengéa gô éyanzee éaô gésongéé nane. 21Ivô Jésus ameetsô éyanza éedi éamôsungéyi vamasongéa Nzambé mbe:
Kumu amamana ésongéa, na asangakoa môtémedi.
Ewe môbô na môbô te môdeekedi adigondoku,
Môsungéyi akinde oma va mbene aNzambé.
22T’ebandô Jésus te ône atôvambéda yene évamba éôtéa ényepa n’ene éambeego.
23Na gôndéké na éene ébégô. Adeekedi adigondoku ambeego amayeka. Ahngô oma amawa, na ahsiôngôé éomba éyanza. 24Ivô Jésus andé monyo môbô na môbô na éyanzee éedi gôétôsungéa va mbene aNzambé ésakoga na ésangeetsô muene. 25T’ebandô Jésus andé na ngudi gôétôoboo deo noo, ngu na gô mbene n’okendô. Angô oboo ane aviga na gôndé Nzambé gô inedi gôébégô andé monyo môbô na môbô gôévovo na Nzambé gôésungéa omee ane.
26Jésus te môdeekedi môvôni adigondoku. Mbeka angô, wa n’anyô oma mbe tôsaba na tsoongo. Andé n’etsimama éetso. Asaba n’ebéva. Asaba na ébégô ébévani ta n’evo. Amaaganédu n’oma abévani gôétômbu na gô ngongo gômadigédu angô. 27Jésus asagono na adeekedi adigondoku ambeego. Asadeekeda pitsi yetso ôgondoku gô mabégô mabévani maamuene na gô mabégô mabévani moma muetso gameenda akedi va mbeego. Amadeekeda Nzambé ôgondoku ôvôni te kukepo. Ogondokue ône te ôtôe aamuene Jésus. 28Mitôma mimatôma Moïse mimeengéda oma gôéba adeekedi adigondoku. Omee ane te oma asanyepani ava tsina gandé wa n’anyô. Ivô ôgi aNzambé, na môsongie wedi ômasevoa Muana ANzambé, angô Kumu estimama môbô na môbô, gôéba môdeekedi môvôni adigondoku, môsungéyi oma.
S'ha seleccionat:
Hébreux 7: TSV
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Alliance Biblique du Gabon (Bible Society in Gabon) 1983