Hébreux 6
6
1Mabégô mamapanga mameekédu môma mokumu aNzambé tômanéni mangô gôéwesea na gô mavo. Tôtsôpéni mane magô mbene. Môsaayi eba asangoonôa édigaa g’ôbôga ôtévo. Na wa n’anyô te mônongovo. Tômani ésiga ôbôgee, angô te meekédume mamapanga. Na mangô te mbe môma asangoongôa ényepeda amuene gôékoa môtémedi gôéba wene mônongo. Na mbe môma eetsa Nzambé môtémedi wetso gétsumé angô paga. 2Na meekédume mabatemeye na mane magétsakégéô samogome. Na mbe mabégô magékundugéô sane amawani, na môtsundu amôbô na môbô aNzambé. 3Oôkani. Tôwesekeni na gô mavo mabégô. Na te éne éngeenda we gô gésangô gegé ôkô Nzambé atôwedéé.
4?Gôndé ane anika ngima na gô midigédi miaô mibévani miambeego mimabakangô ékegea nayee? Vamapanga amasinga gévede saNzambé gédigaa gôndé angô. Ene émeetsô wa n’anyô na Nzambé ameebémba na amavamba na Gédidi SaNzambé. 5Gô mitéma miaô ahmookô mbe Mane Mamavovo Nzambé manyepa. Amookô na ameena anguene ngudi yaNzambé yokumu agô tsenge évigani. 6Buéyé gamabakahngô nane, anika te nikaga. Na oomba édigaa gô mane maô mambeego. Ti gôndé ahngô gôénika ékoa mitéma miaô na gôndé Nzambé géndégégé. Gôébégô andé gôéomba ébôkéda Jésus Muana ANzambé gô gésumu sowa, gôémôdetéda v’ekanga.
7Totone éamôsôba te éne émina meba mayekani mambuua gôékandéda môyakô gôndé môgaabine ambôtône. Mate maNzambé mandéké gô toto nene. 8Ivô totone ésaba na tsoongo te éne ékandéda kavanga na seenge. Ene ékandéda yangô étumbu te tumbugu. Totone éne éngadoku na Nzambé.
9Omami amôtéma, buéyé mbe veevéda we eekédi tôevéda anye nane, tôsaba na mikebanganô gôndé anye. Tôena gakeanye gô nzéane éamôsôba, éne éagéobogeo saNzambé. 10Nzambé asoongôa épenganéda tsembô yedi na ôséngu edi. Andé n’oséngu gô éne éyanzanye, na gô ényônganéô éndé n’anye gôéwedéa asi mbumu éedi gô inedi ngu na deo noo. 11We eekédi tônyôngéô mbe anye, môma na môma nôsanganzeegeda géviôviôge géne ngu na v’ekôdéô éamionyo mianyô. Buta mbe mane maténdéda anye nômadiia. 12We tôsanyôngéô mbe anye nôkoga gôédigaa n’ombuéa gô monyoe wanyô. Tônyôngéô mbe anye nôba na môvinéné gôétsa mitéma mianyô gébé na paga mônongovo gameenda akanyô ane amoota gô mbene. Ahngô amadiia éne émavanga Nzambé gôndé ahngô.
Mane mamavanga Nzambé masakogani
13Vamavangana Nzambé n’Abraham, Nzambé amasongéa gô ina amuene Nzambé. Gôébégô gôsaba muene ootéa ngudi yaNzambé mbe angasongéa gô inedi. 14Nzambé ameetsa Abraham ôvanga mbe: Nangagôétsa mate. Mateme te mbe nangeetsa éwe mbumu éyekani. 15Abraham amabaka na môvinéné gôéenéa ôvangee ômavangéô angô na Nzambé. Na amoodiia. 16Vasongéa môma ateta ina one ootéa ngudiye yamuene asongéani. Vane akedi asangadôtsuma angô paga na ébégôe ékôdéa te vane. 17Tambô ébandô éamôsongia aNzambé ésaba nane. Nzambé amasongéa va mbene aAbraham gôémômenyeda mbe Nzambé asavovo na buembe gôékoa matasa medi. 18Vane tômenya mbe Nzambé amatôvangéa ôvanga edi na amatôsongéa inedi. Mabégô mema mabaé, Nzambé asangoongôa ékoa mangô gôépata. T’ebandô wa n’anyô tômeengéa gôésomo gôndé angô. Tôsinga gébé na paga éne émavangéa angô wa n’anyô éamane mangatôdiiani. 19Gandé môsi mbôngône n’etaé égunya angô gô mbéyi gôésipéda mbôngône, te gasipédu mitéma miasô n’anyô na divanga yaNzambé. Divanga yedi te étaé ésapupani, na ésakandanganani ésipéda wa n’anyô. Vavamba wa n’anyô na Nzambé gô géétséô samitéma tôéngédu n’edi na gô gégidaa saNzambé, te tsongo éadisambô éndé gô gatse ebedi. 20Tsongo nene éndé gô ngima amôkanda ôvôni émeengéa Jésus gôndé wa n’anyô, we madeo tôsiengédu. Amakoga môdeekedi adigondoku, môsungéyi môvôni amôbô na môbô, gamabandôa Melchisédek.
S'ha seleccionat:
Hébreux 6: TSV
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Alliance Biblique du Gabon (Bible Society in Gabon) 1983