1 KORINTI 6
6
Mo'ungke moleoa a mia anu nahi dompompe'ala-ala
6:1-11
1Nde hinaoke te'asa mia i olomiu, anu tewala teposisalaakono mia susua, mosia mo'ungke moleoa a mia anu nahi domementee, ka komba a mia anu memempori? 2Ke nahi imento'orioke, nine mia memempori ira mebitarao wawontolino? Ka tewala pobitarano wawontolino kongko a ngkaemiu, nahi imempolioke mebitarao kara-kara anu nahina pengkonaano? 3Nahi imento'orioke, nine kita mebitara ira mala'eka? Gaagi tamoako mongkona tumuwuto sompo-sompo oleo. 4Maupo kanandio, tewala asalakono komiu mebitarao mongkona pepotuwu, impeweengakonoke ndi ondae anu nahi domentinudu a laro bawaa? 5Ka kupauo mongkona andio ka imemokoko'ii. Nahinake te'asa mia i olomiu anu monto'ori, anu polio bitarao kara-karado mpepaekompono? 6Hinaoke pepaekompo anu aasa mo'ungke moleoa a mpepaekompo anu susua, ka tendeano a mia anu nahi dompompe'ala-ala? 7Da hinao koa kara-kara i olomiu anu asa mia ka anu susua mengkaaomo mentenangi komiu. Tembio ka nahi lalumiupo memarasaiako molengkua? Tembio ka nahi lalumiupo memarugi? 8Sine omiu isa'a mpoweweu molengku ka omiu isa'a anu mpopokorugi, ka anu kanatuu imeweweuo a mpepaekompomiu. 9Ke nahi imento'orioke, nine mia anu nahi domemoleo nahi ira mpohawe tia a laro Poparentaa-Do Ue Ala?
Si ntepopo'oo! Mia mebelesu, mpesomba a lahumoa, mia mpososabo, salabai, tama mewowaliako tama, 10anu mponako, mia memodoko, mara molangu, anu momposebe ka anu mompopo'oo nahi ira mpohawe tia a laro Poparentaa-Do Ue Ala. 11Ka ba opia mia i olomiu kanandiomo i ndi'upua. Sine impeweengakonomo koroimiu ka iwino'ohi, mempinokomempori komiumo, mempinokomentee komiumo a nee-Do Ue Yesu Kerisituu ka a Mpenaa-Do Ue Alato.
Patudu mongkona pebelesua
6:12-20
12 #
1Kor. 10:23
Luwuakoano nahina ku'inontoako, sine komba luwuno mentudu. Luwuakoano nahina ku'inontoako, sine nahi kupo'ineeo koroiku ipe'atao hapamo koa. 13Kaanga onaemo tiano kompo ka kompo tiano kaanga: sine oruano Ira umoninio Ue Ala. Sine koroi komba tiano pebelesua, tendeano tia-Do i Ue, ka Ondae i Ue tiano koroi. 14Ondae Ue Ala anu wangu Ira i Ue, Ira wangu kita mbo'u hangano pabawa-Do. 15Nahi imento'orioke, nine koroimiu onaemo parewa ngkoroi-Do i Kerisituu? Aku umalaoke parewa ngkoroi-Do i Kerisituu ka kupeweengakono a mpebelesua? Poore ntu'u naahi! 16#Teg. 2:24 Ke nahi imento'orioke, nine isema anu mompe'asaako beine belesu, gagi me'asa ngkoroiakono? Hangano, kanandiomo pauno Wunta Mempori, ”Oruano ira gagi me'asa ihi.” 17Sine isema anu me'asaako Ira i Ue, gagi me'asa mpenaako Ira. 18Impoko'olaio koroimiu inso a mpebelesua! Sompo hala susua anu wineweuno mia, komba gagi a ngkoroino. Sine mia anu mebelesu mokontehalao koroino onaeno. 19#1Kor. 3:16; 2Kor. 6:16 Ke nahi imento'orioke, nine koroimiu onaemo raha-Do Penaa Mempori anu mo'ia i laromiu, Penaa Mempori anu hinawemiu inso ndi Ondae Ue Ala, — ka nine omiu komba omiu isa'a mpe'ueo? 20Hangano me'inoli komiumo ka olino lesoomo inowahi: Onaemo pu'uno ka impelangkaiako Ira Ue Ala koroimiu!
S'ha seleccionat:
1 KORINTI 6: XMZ
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió