Romye 13
13
Koddə həmi njiya
1Nagi ndo ma a vədə nəngɨn a koddə yə həmi njiya tən myee ka gətə a nə ɓwaare, gəkɨlə Həmɨnpwa nə və həmi njiyangɨn gətə təna ɗa həmne a nəngəm. 2Gə-angɨn nagi ndo ma ushi yə həmi njiya ndaa koddərən, mangɨn ushi sa Həmɨnpwa a kangdən, wule ma ɗaasə ɓa ɗɨmə nəngɨn ɓashitə. 3Nzə-ɗa sə pepeye kat aa dɨ gəə kala yə həmi njiya, myee dɨ ɗa sa hashi-hashi nə kala ɓawa gərən. Na tee mwi atɨ kala yə həmi njiya a gu, zə ɗa sa pepe, yə həmi njiya mgban ɓa humow. 4Gələ tenə kɨse da Həmɨnpwa tən ɓa ɗəw səfeme. Hye kana ɗa səhase, naa kala gu, tənaa kɨt sungwa takale a nə ɓaa. Həmɨnpwa nə lyentɨrən gə təna ɗa ji-ɗa səhase sɨgbəɗye. 5Səngɨn nə ɗa mbak-mbak mya koddə yə həmi njiya aa gəkɨlə kala ɓashita Həmɨnpwa ɓəmbə, gəkɨlə səɗə-yedi pepeye.
6Gə ləngɨn ɓə kana ɓwaare ta mbwa taa shemtə, gə yə həmi njiya nə ji-lyenta Həmɨnpwa ndi ma vərən lyentɨ nidə ɓwaare mba-dɨ-mba. 7Gə-angɨn vəmə nagi ndo ma kat sa kana kan. Anda taa shemti mya dɨ koɗu, zə mbwa taa shemtɨngɨn, anda sa kana mya mbwa yə həmi njiya nə, zə mbwarən, anda tikɨsti, zə bɨldə tikɨstə, anda fukadəha, zə fukadəha.
Mwomsə gə bətə sɨka
8Ɓe kiire aa bə nəngəwnə, a pɨrgə kiirə bɨləsə mwosətə. Nagi wonə dɨ mwo nduwongɨn ɓwaara, mangɨn naadə ɓashitə. 9Həmɨnpwa a vədə gɨraha som-som, 'ye sa atɨ, “Ɓe ɗa sharawne, ɓe ɓɨl we, ɓe hɨri, ɓe hɨmagə sa hɨnggə ama.”#13.9 Naasə: Dɨmatə 20.13-15,17; Gɨraha 5.17-19; Gɨraha 5.21. Gɨrahangɨn ka gɨrahee mbiɗi kat, tənə galingə sɨtɨ gɨraha hiɗə, a sa atɨ, “Hye mwo nzə-vɨnəgu, ɓətɨ hye dɨ mwo nanga.”#13.9 Naasə: Livitikus 19.18. 10Ma kat mwo nzə-vɨnəgən, ndaa dɨ ɗa mangɨn səhase. Gə-angɨn mwoha nə dɨ naadə ɓashita Həmɨnpwa kat.
11Wule shee kana hwuna ɗa nə yang, hwuna ledə wule vɨraa wanetɨnə. Fəre kənə, ɓa wula hwuna vaɗaya a maggə shentə, gə mbəha tɨla hakam gbyel, aa ɓətɨ kɨnɨnɨng a ite mya tiya mwadiyale a kwamətə. 12Mgbaarən pwara, haa ɓa dɨ kɨɗa. Ndɨka mya sɨɗamgə lyentɨ kulitə, hɨm a pɨrəmə shi pakawatɨ ɓɨrtə. 13Mya ɗamdə wesəm a tɨfa kana, ɓətɨ myee a vor ɓɨrtə, aa ɓətɨ myee a vor kulitə nə, a wule myee dɨ sop vwe kɨr-kɨr kpashi kan, ka ɨl mandye, a wule myee a vor ɗa səhase ka nyatə ka sə, ka jiwne. 14Ndɨka mya gəm ɓətɨ Həmɨmiye Yesu Ma Həmɨnpwa a Yaɓwarən, ɓe myaa pɨrə mwo shi kadawo sɨtə a vən humwatə.
S'ha seleccionat:
Romye 13: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.