Romye 14
14
Luwom nagi ndo ma a wakasəwnə
1Luwom ma mwadiyale dan aa nyerə, nda gə wakasəwnə ɓe myaa ndəltən ka ləməgye a nə sa ndi ɓa ɗa, ka wule sa ndaa dɨ ɗa. 2Mwadiyale da ama a dɨ vən humwatə nda zɨm nagi ndawula sɨzɨmti, ma mgban mwadiyale dan aa tɨlə, ndaawa zɨm nagi ndawula sɨzɨmti, jibe hawti ɓəmbə nda dɨ zɨmə. 3Ma dɨ zɨm nagi ndo sɨzɨmti, ɓe ndaa ushi ma aawa zɨmə. Sə mgban ma aawa zɨm nagi ndo sɨzɨmti, ɓe ndaa ɓashidə ma dɨ zɨmi, gəkɨlə Həmɨnpwa nee dɨ mworən mgban. 4Hyenə wonə, hye ɓa ɓə ɓashiyə nzə-hwoda ama? Nzə-hwoɗingɨn nee ka həmɨ-hwoɗye kan, həmɨ-hwoɗingɨn nə ɓa bɨldən anda nzə-hwodan kangə ɗan lyentə pepe, naasə mgban sɨnə ɓa lɨbadən. Mangɨn ɓa kangə gəkɨlə Həmɨmiye ɓa gwadən nda kangə kpəkəkə.
5Ama a dɨ nggur a fərə hiɗə ɓətɨ sɨnə pɨrgə mbiɗitɨ bətə kat ka fukatə, ama mgban a hakan nagi ndo fərə kat nə hiɗə. Nagi ndo ma a kangə nə sa nda ngguro. 6Nagi ndo ma, a ma nggur a fərə ka fukatə, mangɨn a dɨ fukadə fərəngɨn gə ndukodə Həmɨmiye. Sə mgban ka ma dɨ zɨm nagi ndawula sɨzɨmti, nda dɨ zɨmə gə nda ndukodə Həmɨmiye a ɗa Həmɨnpwa usəkətə. Ma kat kwo zɨm wule i sɨzɨmti, nda kwotɨrən gələ nda ndukodə Həmɨmiye a ɗa Həmɨnpwa usəkətə ka angɨn. 7Taa ama də a vorsəm nza nənəngɨn, taa ama də mgban ɓa mbɨrə nənəngɨn. 8Nagi a nzaasəm ganə a vɨratə, gə le da Həmɨmiye mya nzam, nagi mya mbərəm, mya mbərəm gə le da Həmɨmiye. Gə-angɨn nagi mya gəm ka myentə nagi mya mbərəm, hɨm hɨnggə Həmɨmiye nə.
9Səngɨn nə ɗɨki Ma Həmɨnpwa a Yaɓwarən a mbɨrə a maggə we ka myentə, gə mya leyə atɨ sɨnə Həmɨmiye ma ka gətə a nə myee ka myentə kat ka wogye. 10Ɓə hye mgban, mɨna ɗa hye dɨ ɓashiyə nzə-nuwogu, naasə mgban mɨnə ɗa hye dɨ ushi nzə-nuwogu? Gələ hɨm kat, hɨm nə ɓa kangə humwa ruutɨ ɓashita Həmɨnpwa nda ɓashiyəm. 11Həmɨmiye a boyə vor Malɨmtɨ Ɗəmɗəmtə atɨ,
“Hɨn gbə ka myenshi atɨ,
nagi ndo ma kat ɓa gyerə humwashi,
nagi ndo ma kat ɓa boyo bwang atɨ
hɨnə Həmɨnpwa.”#14.11 Naasə: Ishaya 45.23.
12Gə-angɨn, nagi ndo ma ɓa bwe sa nda ɗa kat a humwa Həmɨnpwa.
13Gə ləngɨn ɓe myaa yə ɓashiyəməsə. Ndɨka mya səɗəm ka yedingəm a nə sa kana mya ɗam. Ɓe ɗa sa ɓa ɗɨkdə nzə-nuwogu nda pawo a fukə, naasə mgban ɓe gən fara pawti. 14Gə leete na lee Yesu Həmɨmiye, na boyo ka gbənzɨmtə atɨ taa ndəng itɨ sɨzɨmtɨ takɨmi də. Shezə hye kana niyə ama a nggur asə atɨ nda takɨmə, sə mgban ɓa gən takɨm. 15Hye kana kɨɗa yedi nduwanga nzə-kotti gəkɨlə sa hye dɨ ngguro a zɨmə, angɨn bɨlə atɨ sa hye dɨ ɗa taa mwoha də. Gə-angɨn, ɓe sɨzɨmte hye dɨ zɨmə ɗɨkə nzə-nuwogu a fukə, gələ Ma Həmɨnpwa a Yaɓwarən a mbɨrə gə le da mangɨn mgban. 16Ɓe ɗaka sa hye leyə atɨ sɨne pepe mya bwelə hase a nəngɨn. 17Gələ həmne da Həmɨnpwa aa byelə sɨzɨmtɨ kwaamə ka shi soɓwo. Shezə gə nzaa pepetə, ɗoltə ka hanɨngtə dɨ haka Pitɨ Ɗəmɗəmtə. 18Gəkɨlə nagi ndo ma dɨ koddə Ma Həmɨnpwa a Yaɓwarən, dɨ ɗa wule shi-pepeyingɨn, haa ɓa nɨngə Həmɨnpwa kan. Ɓwaare mgban ɓa mwakan.
19Gə ləngɨn, maa hɨm a ɓərəm ta ɗam shee ɓa shi ka nzaa ɗoltə, hɨm ta nyerəmdəsə. 20Ɓe hwunaa kɨɗa lyentɨ pepeta Həmɨnpwa gələ sɨzɨmtɨ kwaame. Nagi ndawula sɨzɨmti kat təne pepe, shezə aa dɨ wula ɓwaara a zɨm sa ɓa ɗɨkdə nzə-nuwotə nda pawo a fukə. 21Ndɨka ɓe zɨm hara, ɓe sop vwe, nagi asə hye ɓa ɗa a ɓa ɗɨkdə nzə-nuwogu nda pawo a fukə, ɓe ɗa səngɨn.
22Nagi mɨnə hye mwakan a nə shinə, kɨshi dwat a wakasa ka Həmɨnpwatɨ dəw. Sə hanɨngti ka wule ma hubosən aa təkə kpe a nə sa nda nan pepe ɓa ɗa. 23Anda mangɨn nee ndəli a nə sa nda dɨ zɨmə, sɨne ka ɓashitə a hakan a nagi goɗi nda dɨ zɨm shingɨn, gəkɨlə hubosən a təkə taa mwadiyalə kan. Gə sa mgban mya ɗarən kat aa ka mwadiyale, angɨn səhasə.
S'ha seleccionat:
Romye 14: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.