Yohana 20
20
Yesu maggə taane
(Matta 28.1-10; Markus 16.1-8; Luka 24.1-12)
1Ka haa wure dung-dung a fərə tiya lyentə, Maryamu dɨ Magdala a muɗə taana a gonggoro fara mya ɗɨk wo Yesu də, ngga zə a pa hangɨn mye ləkədə faratə gɨddə gə kwaamɨ taane. 2Ngga giɓə a mɨnə haka Siman Bitrus ka lagba da Yesu a nda dɨ mworən, ngga sarən atɨ, “Mye nggur wo Həmɨmiye dɨmdən gə vor taane, hinaa lee haa təna ɗɨkdən də.”
3Ndi Bitrus ka lagbangɨn a muɗə baa taane. 4Tən dɨ kpeyə təna tiya gyeɓe, ndi lagbangɨn a taw Bitrus a pɨrgən a tɨlə taane a kwamətə. 5Nda badə nəngɨn a yengə taane a naa foowe nee bi, ndaa pɨrə taane. 6Ndi Siman Bitrus ma giɓa a beesən ite nda tɨla, nda pɨrə vor taane a naa foowe nee bi, 7kat ka baasa mya tak nə Yesu kan nee gbəwo hangɨn. Baasəngɨn nee bi som ka tɨfɨtsən ndaa peyə ka mbiɗitɨ foowe. 8Dɨ bee ndi lagba giɓa tɨla a kwamətə a shea pɨrə vor taane. Nda niyə a naa ləngɨn ka nənəngɨn nda mwakan. 9(Kat ka angɨn tən kat tənaa lee naarə la Malɨmtɨ Ɗəmɗəmtə a boyo atɨ, mbak-mbak Yesu ɓa maɗə ka myentə beetɨ we dan.)
Yesu a bɨldə nəngɨn a haka Maryamu
(Matta 28.9-10; Markus 16.9-11)
10Tən lagbengɨn kat, təna mɨnə hwoɗye. 11Maryamu dɨ Magdala nə mbiɗi kangə haa bwange, gbyel ka taane dɨ təwi ngga badə nəngrə a yengə taane. 12Ngga niyə a naa malyenye kpe nee nza ka shikungye pwat-pwat a haa mya bədə wo Yesu də, ma hiɗə a nza basa ne, ma hiɗə mgban a basa mbwaye.
13Malyenye a ɗiyərə, “Metə, mɨnə ɗa hye dɨ tuwo?”
Ngga luwa a sarən atɨ, “Təna nggur wo Həmɨmiye de taa lee haa təna ɗɨkdən də.” 14Kote a vor byele, ngga ɓiya a naa Yesu nee kangə hangɨn, nggaa leyə atɨ Yesu nə.
15Nda ɗiyərə, “Metə, mɨnə ɗa hye dɨ tuwo, wonə hye dɨ ɨlə?”
Kote dɨ kana atɨ həmɨ kaanda taane a gə vorsən nə, ngga ɓə luwa a san atɨ, “Mure, anda hyenə nggurgə wongɨn gə hanə, kəni haa hye ɗɨkdən də na ngguragən.”
16Yesu a sarə atɨ, “Maryamu.”
Ngga ɓiya dɨ hakan a gəəshe ka kwa-Yawude atɨ, “Rabboni” (naarə ləngɨn nə atɨ nzə-kəndəshe).
17Yesu a sarə atɨ, “Ɓe kɨtti gə hɨn taa nda nggɨrə haka Baatə. Ndɨka hye mɨnə haka ji-nuwogi a lagbe de, hye sarən atɨ, ‘Hɨnə dɨ nggɨrə haka Baagi ka Baagəwnə, a haka Həmɨnpwatɨ de ka Həmɨnpwatɨ dəwnə.’ ”
18Maryamu dɨ Magdala a mɨnə haka lagbengɨn ka ləməgye a nə naate ngga naa Həmɨmiye ka ləməgyee nda boyərə.
Yesu a bɨldə nəngɨn a haka lagbe dan
(Matta 28.16-20; Markus 16.14-18; Luka 24.36-49)
19Ka kaadəngɨn kwa vəni haa lagbe dan a nza də nee mya gbəərən a dyengələrən kat, gəkɨlə kalaa mi kpan-kpani Yawude a dɨ gərən. A hangɨn Yesu a pɨra a kangə wakasərən. Nda sarən, “Maa ɗolta Həmɨnpwa a nza ɓwaa kəwnə!” 20Nda bɨlərən doɓi ɓokye a tyefingɨn ka pɨra-gyengəngɨn. Haa nɨngə lagbe dan kɨr-kɨr ka naa tee təna naa Həmɨmiye.
21Yesu a mɨna sarən, “Maa ɗolta Həmɨnpwa a nza ɓwaa kəwnə! Ɓətɨya Baagi a lyanari, sə mgban na dɨ lyentəwnə.” 22Ndi ɓe boyo sə, nda fɨdərən pitə, a sarən atɨ, “Luwom Pitɨ Ɗəmɗəmtə. 23Hwun kana ngguro ama gə səhase dan, mye nggurən gən. Anda hwunaa ngguro ma gə səhase dan myaa nggurən gən mgban.”
Yesu a bɨldə nəngɨn a haka Tomas
24Ite Yesu a pɨra a haka lagbe dan, Tomas (a mya dɨ wa atɨ Didemu#20.24 Didemu: Zarə.) hiɗə dɨ vor lagbe bəw a mbiɗi-kpe tam a hwoɗye a haa ka mbiɗitɨ lagbengɨn. 25Ite ndi Tomas a mɨna a hwoɗye, mbiɗitɨ lagbengɨn a san atɨ, “Hin naa Həmɨmiye.”
Tomas a sarən atɨ, “A taa naa doɓi goyi gbalye a tyefingɨn, a ɗɨkdə gyelshi a vor ɓoki gbalingɨn, a taa ɗɨkdə tɨfa a vor ɓokə pɨra-gyengəngɨn a mya zubrən, taa dɨ mwaka ləngɨn.”
26Beetɨ bətə tukolukpe, itɨngɨn lagbe da Yesu mɨnə peyə vor hwoɗye kat, ndi Tomas mgban sɨne a hakarən a vor hwoɗye. Itɨngɨn kwa-vənye kat nee a gbəətə, Yesu a pɨra a kangə wakasərən a sarən atɨ, “Maa ɗolta Həmɨnpwa a nza ɓwaa kəwnə.” 27Nda sa Tomas atɨ, “Ɗɨkdə gyelsa ganə, zə naa tyefi, wa ka tɨfanga, hye ɗɨkə nə duɓo ɓokanə a pɨra-gyenga. Ɓe yə pɨrə humwa ka ndəle, zə mwadiyale.”
28Tomas aɓə shea san atɨ, “Həmɨmiye de ka Həmɨnpwatɨ de!”
29Yesu a san, “Tomas, ɓəgəng hye mwadiyale gəkɨlə hye shea nee? Həmɨnpwa ɓa ɗarən pepetə a tən myee aa nee, kat ka angɨn təna mwadiyale ke.”
30Yesu a ɗa i zərgi shikoshopi hananang a haka lagbe dan, a wule 'ye myaa doro vor malɨmtɨnə. 31Lanə mya doro gə hwuna mwaka Yesu a gɨɗən atɨ sɨnə Nze da Həmɨnpwa, Ma Həmɨnpwa a Yaɓwarən, gəkɨlə dɨ ha mwadiyaləngɨn hwun ɓa ɗɨm myentə a vor gəte a kwakɨngɨn.
S'ha seleccionat:
Yohana 20: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.