Yohana 21
21
Yesu a mɨnə bɨldə nəngɨn a haka i lagbe dan
1Beetɨ angɨn Yesu a mɨna bɨldə nəngɨn a haka lagbe dan a kwaka gərə Tiberiyas.#21.1 Sɨnə mya dɨ wa atɨ kwaka gərə Galili. Yang nda bɨldə nəngɨn: 2Siman Bitrus, ka Tomas (a mya dɨ wa atɨ Didemu), ka Nataniyel a dɨ Kaanate a vor njiya Galili, ka je da Zabadi ka i lagbe da Yesu kpe təne kat a haa hiɗəti. 3Siman Bitrus a sarən, “Hɨn ɓa zə kəɗe.” Tən kat təna sa, “Hin ɓa koɗu.” Təna pɨrə koombotə a muɗə. Təna kəɗə tuko-tuko tənaa ɗɨm asə.
4Ka haa kɨɗatə Yesu a kangə kwaka haɓye, lagbe dan aa leyə atɨ sɨnə.
5Yesu a watɨrən a ɗiyərən, “Yə ndewegi, hwun ɗɨm vaakye kəsə supo ma?”
Təna luwa a san atɨ, “Ə'ə! Hinaa kɨt asə.”
6Nda sarən, “Pukəmdə ndwambe dəwnə a basa zɨməngə koombotə, hwun ɓa kət vaakye.” Ite təna pukdə ndwambe təna til vaakye ndwambe a naa, baa tənaa mba nggalatə.
7Ndi lagba Yesu a dɨ mworən a sa Bitrus atɨ, “Həmɨmiye nə!” Ite Siman Bitrus ɓe kɨlə atɨ, “Həmɨmiye nə,” nda ɓwe ɓarawtɨ dan a kada-mgbangɨn (gə nda sɨɗa gərə ite nda dɨ kəɗə), nda sarə haɓye. 8Mbiɗitɨ lagbe kat a kwaɗan dɨ bee ka koombotə, a fuwa ndwambe ka vaakye pas gə hangɨn nee gbyel ka kwaka haɓye. Ɓongtɨ hangɨn ɓa ɗa mbwaye haru mwaakɨn. 9Ite təna nggɨra a haa kpamtə, təna naa kələngə ɗiye ka vaakye a nəngɨn ka goɓoryi buroditə a hangɨn. 10Yesu a sarən, “Nggɨlam vaakye hwuna kasa wam kaarən.”
11Siman Bitrus a mɨna pɨrə koombotə a nggala ndwambe a nggɨra kan a haa kpamtə. Ndwambəngɨn naa pas ka vaakye. Vaki kpan-kpanye nə haru ka bəwtə tuf a mbiɗi mwaakɨn. Kat ka furo vaakingɨn ndwambe aa sɨrə. 12Yesu a sarən, “Wam wa zɨməmshe.” Taa ama a vor lagbengɨn mwamdiya ɗiyən le atɨ, “Hyenə wonə?” Tən tɨnə leyə twa atɨ Həmɨmiye nə. 13Yesu a gɨsa a nggur buroditə a ɓyanarən, sə mgban nda ɗa ka vaakye. 14Gəngnə mwaakɨnə dɨmate Yesu a dɨma a bɨldə nəngɨn a haka lagbe dan nee beetɨ matsən gə we ka myentə.
Yesu a mɨnə luu Bitrus
15Ite təna zɨmshe a mbəə, Yesu a wa Siman Bitrus a san, “Siman nze da Yohana, hye nee mwori ka diyale pɨrgə minə mbiɗi kat?”
Nda san, “Həmɨmiye, hye leyə atɨ hɨne mwora.”
Yesu a san, “Jin ji-mbage de, zɨmdərən.”
16Yesu a mɨna ɗiyən, “Siman nze da Yohana, hye nee mwori ka diyale?”
Nda luwa a san, “Həmɨmiye a hye leyə atɨ hɨne mwora.”
Yesu a san atɨ, “Nidə mbage de, jintɨrən.”
17A mwaakɨnə ɗi le Yesu a san, “Siman nze da Yohana, hye nee mwori?”
Yedi Bitrus a kɨɗən ka ləngɨn gəkɨlə mwaakɨnə ɗi la Yesu a mɨna ɗiyən atɨ, “Hye nee mwori?” Nda san atɨ, “Həmɨmiye, hye lee nagi ndo sə kat, hye leyə atɨ hɨne mwora.”
Yesu a san, “Jin mbage de, zɨmdərən. 18Diyalə na dɨ boyu, ite hye nee nzə-lagba, hye dɨ kala shee ka nənanga, hye dɨ woyo a pərəsə a muɗə haa hye dɨ mwo. Hye kana iira, ɗifti hye ɓawa ɗifdə tyefinga, ama som ɓawa kaləw shee nda zəkəw a haa tee mwo zətə də.” 19Yesu a boyo sə gə nda bɨldə wule wa Bitrus ɓa mbɨrə kan gəkɨlə Həmɨnpwa a ɗɨm fukatə. Ite nda byelə tee, nda sa Bitrus atɨ, “Zə kwaɗe.”
20Bitrus a ɓiya a naa lagba Yesu a dɨ mworən nee dɨ kwaɗərən a bee. Sɨnə ma nza ɓɨdɨmi gbyel ka Yesu, nda badə nəngɨn a ɗiyən le a haa zɨmshi kwalə Lawuttə atɨ, “Həmɨmiye, wonə ma ɓa vəda?” 21Ite Bitrus a nan nda ɗiyə Yesu atɨ, “Həmɨmiye, ɓə ya gətɨ marə?”
22Yesu a luwa a san, “Anda hɨne dɨ mwi atɨ nda nza ka myentə baa na mɨna a vɨratə, mɨnə sɨpɨrsa də? Hɨnggu zə kwaɗe ɗəng.” 23Gə ləngɨn le a maɗə a mbəgə hee kat a waka ji-kottə atɨ lagbangɨn aa dɨ mbɨrə. Ndi Yesu ka nənəngɨn, ndaa sa atɨ mangɨn aa dɨ mbɨrə, la Yesu a boyo nə atɨ, “Anda hɨne dɨ mwi atɨ nda nza ka myentə baa na mɨna a vɨratə, mɨnə sɨpɨrsa də?”
24Lagbangɨn nə a dɨ takale a nə ləməginə, sɨnə dori kat. Hin leyə atɨ la nda boyo diyalə.
25Yesu ɗa i shi hananang. A mye nda dorshingɨn kat, bətɨ vɨratə ɓa nda ɗongə haa mya ɗɨkdə malɨmyee mya dorshingɨn də.
S'ha seleccionat:
Yohana 21: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.