Galatiye 6
6
Ɗamə ɓwaare kat səfeme
1Hwun ji-kottə, na ama a wakasəwnə pɨrə səhase takə də, hwun myee mbiɗi kangə vor mwadiyale ɓə kana hwuna gwadə mangɨn a mɨnadən a tɨfə diyale ka hyatane. Hwuna nza ka ɗyangale atɨ hwun mgban hiɗə dɨ vorsəwnə a fərə ɓaga pawo. 2Hwun ta gwadəsə a vor tənəte hwuna dɨ pɨrədə, gə ka ɗatɨngɨn hwun ɓa naadə ɓashitə a nə mwoha Ma Həmɨnpwa a Yaɓwarən a kəndə. 3Anda ama nee də dɨ niyi ɓətɨ ɓə kən asə shezə ndi aa asə, vwaka wule mangɨn a dɨ vwaka nəngɨn. 4Nagi ndo ma a nda nidə nəngɨn ka wesən, nda ɓə humwa nəngɨn, ɓe ndaa kana nəngɨn ka ama, 5gə nagi ndo ma nə ɓa nggur sɨtɨre dan.
6Ma kat mya kənən le da Həmɨnpwa, ɓə kana mangɨn a gwadə nzə-kəndəshe ka shi-pepeyee nda gə kaarən.
7Ɓe myaa vwakarəwnə, gə taa ndəng ma də ɓa mba Həmɨnpwa a vwakarən. Gə sa ɓwaara a laga, səngɨn nə mgban mangɨn ɓa ɗɨmə. 8Gə ma laga daase a kada sɨtə, daasəngɨn nə ɓa ɗɨkdən nda yerə ɓaa. Ma laga sa hɨnggə Pitɨ Ɗəmɗəmtə nə, ndi ɓa ɗɨm myente kaaru-kaaru. 9Ɓe mya ɓwamgə ɗa səfeme, gələ a fəra Həmɨnpwa a kana də, hɨm ɓa luwom moone anda hɨm mba-sɨsəm zə kpawtə. 10Gə-angɨn nagi goɗi hɨm a ɗɨməm humwatə, a hɨm a ɗamə ɓwaare kat səfeme, hɨm a tiya ka myee a vor kottə.
Gɨraha kpawtə ka kwasatə
11Namə wule ɗuwo shinə na dɨ doro bwagal-bwagal ka tɨfa.
12Myee dɨ mwi atɨ təna ɗɨkdəwnə hwuna jengə lakəwne ka maase, a dɨ ɗaasə gə mya humwarən. Təna ɗɨmə a mbəgə tənədəha da Yawude, gə ɓe myaa sa atɨ təna dɨ hiwa atɨ mye ɓa ɗɨm mbətə dɨ ha kada ɓɨdɨmta Ma Həmɨnpwa a Yaɓwarən. 13Nagi nda tən mingɨn 'ye mya jengdərən a lakəwne nə, tənaa mba ɓashitə a koddə, kat ka angɨn təne dɨ mwi atɨ təna jengdəwnə a lakəwne ka maase gə təna woyo ta nggwomi gə le dəwnə. 14Həmɨnpwa a nggurigə nggwamatə anda aa ka kada ɓɨdɨmta Yesu Həmɨmiye dam Ma Həmɨnpwa a Yaɓwarən nə hɨn ɓa nggwama, gəkɨlə kada ɓɨdɨmtɨngɨn nə ɗɨki na ɓɨl sɨshi a nə shi vɨratə, vɨratə mgban a təkəsə ke. 15Nagi mya jengdə ma a lakəwne, nagi myaa jengdən, kat angɨn nee hiɗə taa asə takarən. Sa wula pɨri kat nə mwasa hweltə. 16Naa purutə ka ɗolta Həmɨnpwa a nza kəwnə kat hwun myee kangə nə ləməginə na dɨ boyo, kat ka mi Israilatɨ diyale.
17A kpawtə, dɨ fəranə kɨshi supo, ɓe ama aa yə ɨli le a ɗɨkdi a itɨ tənəti, gə hɨnə ka doɓi ɓokye da Yesu a sɨshi 'ye ɓwaare a ɗəki.
18Hwun ji-kottə, maa wuladəha da Yesu Həmɨmiye Ma Həmɨnpwa a Yaɓwarən a nza ɓwaa kəwnə kat. Amin.
S'ha seleccionat:
Galatiye 6: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.