Galatiye 5
5
Ma Həmɨnpwa a Yaɓwarən dɨmdəm gə kɨsawne
1Ma Həmɨnpwa a Yaɓwarən dɨmdəm gə kɨsawne, gə hɨm a ɗɨməm nəngəm. Gə-angɨn hwuna kangə dwat ɓe hwunaa yə mɨnə kɨsawne. 2Kɨləm lanə hɨn Bulus ɓa boyo! Hɨnə dɨ səwnə, a hwun mwa vədə nəngəwnə mya jengdəwnə a lakəwne, sa kat Ma Həmɨnpwa a Yaɓwarən a ɗəwnə taa naarən kan. 3Hɨnə mɨni dɨ boyownə kat ma vədə nəngɨn mya jengdən a lakəwne ɓə nza mbak-mbak ndi ɓa koddə sa kat ɓashitə a boyo. 4Hwun myee dɨ mwi atɨ Həmɨnpwa a nəwnə mi pepeyi dɨ ha koddə ɓashitə, hwun dɨmdə nəngəwnə gə tɨfe da Ma Həmɨnpwa a Yaɓwarən, hwun mɨnə ɗongə wuladəha da Həmɨnpwa. 5Hɨm myee mwaka Ma Həmɨnpwa a Yaɓwarən, hɨm nə dɨ hɨmagə ite atɨ Həmɨnpwa ɓa gəədəm mi pepeyi dɨ haka Pitɨ Ɗəmɗəmtə. 6Gə a haka Yesu Ma Həmɨnpwa a Yaɓwarən, nagi mya jengdə ɓwaara a lakəwne nagi myaa jengdən, angɨn nee hiɗə taa asə takarən. Sa wula pɨrinə atɨ ɓwaara a gə ka mwoha dɨ ha mwadiyale.
7Hwunə dɨ koɗə tɨfe da Həmɨnpwa dɨ muɗi kpəkəkə, ɓə wonə banga a humwasəwnə kərəwnə koɗə diyale? 8Wule mingɨn 'ye dɨ mbɨrtəwnə, aa dɨ haka ma warəwnə təna gə. 9Hɨn leyə atɨ, “Maɗe ɓyeləng dɨ maddə zamə humbote mya nggəmə kan.” 10Hɨn mwaka Həmɨmiye atɨ, hwunaa dɨ mwa ama a vwakarəwnə hwuna koɗən. Wule ma kat dɨ ngaməwnə, tukuta ɗyangale dəwnə, Həmɨnpwa ɓa ɓashidə mangɨn nda dɨ muɗə jam, nagi wonə mangɨn. 11Ji-kottə, anda baa ɓəgəng hɨne dɨ boyə ɓwaare atɨ a təna jengə lakəwne, ɓə gəkɨlə mɨnə baa ɓəgəng mya ɓə ɗɨkdi a tənəta? Mgbaalə tənəte təna dɨ tənəə di nə atɨ gə na dɨ kəndə le da Həmɨnpwa a nə mbɨrte Yesu a mbɨrə nə kada ɓɨdɨmtə, səngɨn nə dɨ vərən yedi-kɨttə. 12Na hɨma atɨ giɓa nda myee dɨ kɨɗa yedingəwnə a dɨmə som a təkəsə kəwnə, anda tən mwa təna gəə bədəryi.
13Hwun ndeyi ji-kottə, Həmɨnpwa a warəwnə gə hwuna dɨmgə kɨsawne a piya. Gə-angɨn ɓe hwunaa ɗaka ɗɨm nəngɨn dəwnə nda pɨrdəwnə a vor mwo shi kada sɨtə, ndɨka hwun ta ɗasə kɨsawne ta bɨləsə mwoha. 14Gə nagi ɓashitɨngɨn nə kat, a nə se hiɗə ngga kangə, a sa atɨ, “Hye mɨna mwo nzə-vɨnəgu ɓətɨ hye dɨ mwo nanga.”#5.14 Naasə: Livitikus 19.18. 15Hwun kana peyə a dɨ nya ka sə ta kɨɗasə, bəmdə myensəwnə gə hwune ɓa peyə kat a kɨɗə ɓaa.
Nzata ɓwaara a kada sɨtə
16Hɨnə dɨ səwnə, ɗakamə Pitɨ Ɗəmɗəmtə ngga nza ɓwaa kəwnə, angɨn ɓa gwadəwnə hwunaa dɨ pɨrə vor mwo shi kada sɨtɨ vɨratɨnə. 17Gəkɨlə sa kada sɨtə a dɨ mwo aa dɨ kənəsə ka hɨnggə Pitɨ Ɗəmɗəmtə, sə mgban hɨnggə Pitɨngɨn aa dɨ kənəsə hɨnggə kada sɨtə. Gə-angɨn taa kɨləsəti a wakasərən, səngɨn nə ɗɨki hwunaa ɗa sa hwuna dɨ mwo ɗasən. 18Hye kana ɗaka pitə ngga koɗə kəw, hye yə tamdə a pukə ɓashitə.
19Wule sa kada sɨtə a dɨ ɗa nə yang bwang: Ɓətɨ sharawne, nzaa takɨmətə ka nzaa hawuwne, 20koɗə pɨle, lyentə ka pɨle ji-dwatə, kwonəha, nyatə, jiwne, muune, mwo nəne, nggwonshe, tɨmbɨrha, kəndəshi hashe, 21jiwnə shee da ama, kpase gə gətɨ vwe, gɨluwawne, ka mbiɗitɨ wule shingɨn kat. Hɨnə dɨ fyel-kwakingəwnə ɓətɨya na ɗa a kwamətə atɨ wule myee dɨ koddə wule shinə aa dɨ pɨrə həmne da Həmɨnpwa a ɗɨm shi-pepeyee nda bwe ləngrən.
22Wule mbwotɨ pepete kana Pitɨ Ɗəmɗəmtə a dɨmaadən a hakəwnə nə yang bwang: Bɨləmdə mwoha, hanɨngtə, nzaa ɗoltə, bɨləmdə mbasɨtə, gwadəha, bɨləmdə pepetə, tikɨstə, 23ɗəngtə, ka kɨt sɨtə. Wule shingɨn kat ɓashitə a mənə kaarən. 24Myee hɨnggə Yesu Ma Həmɨnpwa a Yaɓwarən nə, mye ɓɨdɨmdərən kan a nə kada ɓɨdɨmtə kat ka wule shi hashi kada sɨtɨngɨn. 25Ɓəgəng gə Pitɨ Ɗəmɗəmti dɨ koɗi kam, ɓə kana hɨm a koɗəmə sa Pitɨ Ɗəmɗəmtɨngɨn a dɨ mwo. 26Ɓe angɨn aa ɗɨkə hɨm a gəm ka məndaranye ta kɨɗa yedisə ta ɗa jiwne ka sə.
S'ha seleccionat:
Galatiye 5: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.