Lyenta 5
5
Hananiya ka Safiratu
1Ama nee də mya wa atɨ Hananiya, ka mesən Safiratu, tən mgban təna ɗərdə njiya darən. 2Hananiya a nggɨl a basa dɨ vor taangɨn a ɓodən, ka leetɨ mesən, nda ɓə nggura basa mbiɗi a shikan a pukdən humwa kpe-lagbe.
3Bitrus a ɗiyən atɨ, “Hananiya, mɨnə ɗa Shetan a naadə hubosa, hye kəsə Pitɨ Ɗəmɗəmtə jeronye, hye kɨr gbɨlə taa hye ɗɨmə ite hye ɗərdə njiya dəw? 4Ite tee nda ɗərdə njiyangɨn, aa njiya dəw nə ma? Ɓə ite hye ɗərdən, a luu taangɨn, a taa dəwnə ma? Ɓə mɨnə ɗa hye ɓə ɗa wule sa hye ɗa ɗate? Di aa ɓwaara hye kəsən jeronye, Həmɨnpwa nə hye kəsən jeronye.”
5Ite Hananiya a kɨl ləngɨn, nda fukə njiya a mbɨrə. Myee kɨl ləngɨn kat kala a gərən kɨr-kɨr ka wule sa ɗa ɗatɨngɨn. 6Lagbe dwat-dwatye a pɨra a vuttən ka foowe, təna nggur wongɨn a dɨmə kan a dɨ ɗɨkrən.
7Aa ɓong itɨ ɓongti, beetɨ awatə mwaakɨn, mesən a pɨra a hwoɗyee ji-kottə a peyə də, nggaa ɓə lee sa ɗa. 8Bitrus a ɗiyərə, “Boyi pee, yang hye ka muranga, Hananiya a ɗərdə njiya dəwnə ma?”
Ngga luwa a san atɨ, “Sə hina ɗərdən.”
9Bitrus a ɗiyərə atɨ, “Mɨnə ɗa hwuna ɓə pedə kwaamɨngəwnə a kana Pitɨ Ɗəmɗəmta Həmɨnpwa? Zə niyi! Tee naa myee nggur wo muranga dɨ ɗɨki nee mɨna, təne gbyel a kwaamɨ tɨfe, sə mgban tən ɓa nggur wanga a dɨmə kan.”
10Də a hangɨn, ngga fukə njiya a mbwayi Bitrus a mbɨrə. Ite lagbe dwat-dwatɨngɨn a pɨra a vor hwoɗingɨn, təna pa wongrə, təna ngguro a dɨmə kan a dɨ ɗɨkə gyengə taanə murəngrə. 11Kala a gə ji-kottə kɨr-kɨr a mbəgə hee, kat ka mbiɗitɨ ɓwaaree kɨl lə shee ɗa ɗatɨngɨn.
Kpe-lagbe a ɗa sɨndəle a waka ɓwaare
12Kpe-lagbe a ɗa səkushipe ka sɨndəle hananang a waka ɓwaare. Ji-kottə kat a kɨləsə a duwa peyə vor kwakra da Solomon a Kwa-Shafe. 13Myee aa ji-kotti, aa mwamdiya a pɨrə vor ji-kottə. Kat ka angɨn ɓwaare kat a ndukodə ji-kottə ta humwarən gə nzaa pepetɨ darən. 14Kat ka angɨn mgban, ɓwaare hananang, morye ka mandye a mwadiyale ka Həmɨmiye Yesu, furo ji-kottə a pɨrə humwa. 15Gəkɨlə ləngɨn nə mgban ɓwaare a pwara ji-ootə a dɨma kaarən a nə təfəgye, a pukdərən a nə kpəkləkye, imi a nə kəje, gə Bitrus kana woyo ɓa pɨrə dɨ hangɨn, fyemingɨn a pukə ji-ootə. 16Ɓwaare hananang dɨ vor vɨree takadə Urshelima a payadə ji-ootə kat ka myee pɨle ji-dwatə a dɨ təkəndərən, mya gwadə mingɨn a piyadərən gə ootɨngɨn kat.
Mye tənədə kpe-lagbe
17Də Kɨsahəmə kpane kat ka myee dɨ gwadən, a tən myee dɨ gyenge da Saduke a naa pas ka jiwne. 18Təna kər kpe-lagbengɨn a ɗɨkə vɨnə gbərəwe. 19Ka vor tukotə mgban, malyene da Həmɨnpwa a wana kwaami vəni gbərəwe, a dɨmdərən kat a haa bwange, a sarən atɨ, 20“Wudəm, kangəmə Kwa-Shafe, hwuna boyə ɓwaare ləmə myentɨ hweltɨnə kat, ɓe hwunaa mbiɗa ndəng lə.”
21Gə-angɨn, ka haa kɨɗatə dung-dung təna muɗə a pɨrə Kwa-Shafe ɓətɨ mya boyərən, təna tiya ta kənə ɓwaare shee. Ite Kɨsahəmə kpane a tɨla ka myee dan, təna waga ji-shalale da mi Israila kat, təna lyenshe a vɨnə gbərəwe gə mya shi ka kpe-lagbengɨn da Yesu a humwaasərən. 22Ite ji-gɨra Shafe a zə vɨnə gbərəwe, tənaa pa kpe-lagbengɨn a vor gbərəwe. Təna mɨna ka lyenshe a haka myee lyentɨrən. 23Təna sa atɨ, “Hina zə a pa vɨnə gbərəwe ka kwaami vənye a gbəətə, nggɨree dɨ gɨra mgban nee kat kanyi dɨ gɨra, hina wana kwaami vənye a pɨrə vor vɨne, hinaa pa ama də.” 24Ite təna kɨl ləngɨn, gyana da ji-gɨra Shafe kat ka kɨsehəmi kpan-kpanye a ndələ ka ləngɨn, le ta ɓwarən ka wule sa ləngɨn ɓa maɗadən!
25Də ama a shi hakarən a sarən atɨ, “Hwun niya! Myee hwuna kəsə a gbərən a vɨnə gbərəwe, təndə kangə Kwa-Shafe dɨ kənə ɓwaare shee.” 26Ite gyana da ji-ɓwesɨtee a Shafe ɓe kɨl ləngɨn nda muɗə ka myee dan a dɨ kasa kpe-lagbengɨn a shikarən. Tənaa nggalatɨrən ka maase, gəkɨlə kala ɓwaare a dɨ gərən gə ɓe myaa kalatɨrən ka fare.
27Ite ji-gɨra Shafəngɨn a tɨla ka kpe-lagbengɨn təna pɨra kaarən a humwa ji-shalale, təna kangdərən a humwaasərən gə Kɨsahəmə kpane a ɗiyərən ləməgye. 28Nda sarən, “Hin fyel-kwakingəwnə kɨr-kɨr atɨ ɓe hwunaa yə kəndəshe a vor kwaka. Kat ka angɨn, hwuna naadə Urshelima pas ka wule kəndəshingɨn. Hwuna dɨ mwo atɨ hwuna nggala zaambə ma a nəngenə atɨ hinə ka mgbaalə we dan.”
29Bitrus kat ka mbiɗitɨ kpe-lagbe a luwa a sarən atɨ, “Mbak-mbak hin ɓa koɗə kormi Həmɨnpwa, hinaa dɨ koddə hɨnggə ɓwaara. 30Həmɨnpwata yə sɨnggəm maddə Yesu gə we ka myentə, sɨnə ma hwuna gbaltən, a ɓɨlə nə kada ɓɨdɨmtə. 31Sɨnə ma Həmɨnpwa a fukadən a nggɨrdən a pwa, a nzadən a tɨfə zɨməngən. Ndi Həmə, sɨnə Nzə-mbəha, gə nda ngguro mi Israila gə səhase darən a tən por-njiya. 32Hin ji-takalə, gə hin naa shingɨn ka ləməgingɨn ka diingenə, sə mgban Pitɨ Ɗəmɗəmte Həmɨnpwa a və myee dɨ koddə ləməgye dan atɨ sə gə ləngɨn.”
33Ite ji-shalaləngɨn a kɨl ləməgyee lagbengɨn a boyərən kat, təna ɗa muune kɨr-kɨr, a dɨ mwa atɨ təna ɓəl kpe-lagbengɨn. 34Ama hiɗə dɨ vor ji-shalaləngɨn mya wa atɨ Gamaliyel, sɨnə hiɗə dɨ vor Farise, ndi nzə-kəndə ɓashita Musati, ɓwaare kat a dɨ fukadən. Nda maɗə a kangə vor ji-shalaləngɨn, nda sarən atɨ, a mya dɨmdə lagbengɨn a haa bwange təna kula də ɓyeləng. 35Nda shea boyə mbiɗitɨ ji-shalaləngɨn le atɨ, “Hwun moryi Israila, bəmdə myensəwnə, hwuna səɗə ka yedingəwnə pepe ka wule sa hwuna dɨ mwo atɨ hwuna ɗa ka myee. 36Gə a vor bətɨrə pɨri, ama atɨ Tudas a maɗə ganə atɨ ndi asə, ɓwaare moryee tɨlə haru fwat a maɗə a bəngə beesən. Mya ɓɨltən, myee maɗi koɗə beesən a gbərə a təkəsə hyeɗə-hyeɗə, ləngɨn a gəə lə ɓayə. 37A beetɨ angɨn mgban, ama a mɨna dɨma mya dɨ warən atɨ Yawuda dɨ njiya Galili, a vor kiwate mya bəl ɓwaare də, ndi mgban nda maɗə a pedə ɓwaare gə tən ta maddə nyatə, ndi mgban mya ɓɨlə, myee dɨ koɗə beesən a gyeɓə a gbərə. 38Gəkɨlə ləngɨn na dɨ səwnə atɨ, təkəməsə ka le da myee ɓəgəng, ɓe hwunaa ɗarən asə. Ɗakamərən ɗəng, gəkɨlə shee təna dɨ ɗa ɗate, anda lyenta ɓwaara ɓəmbə, shingɨn ɓa mbəə a yerə ɓaa. 39Naasə mgban, anda shee təna dɨ ɗa ɗate dɨ haka Həmɨnpwa, hwunaa dɨ mba myee a ɗarən asə, ndəng mgban hwunaa leyə atɨ Həmɨnpwa nə hwuna dɨ pa-kawatə kan.”
Ji-shalaləngɨn kat a koɗə ləməgyee Gamaliyel a boyo.
40Təna waga kpe-lagbengɨn təna pɨra, təna ɗɨkə mya byengtɨrən, təna shea fyel-kwakingrən a sarən atɨ, ɓe tənaa yə bwe le a vor kwakɨ Yesu. Təna ɗakarən təna dɨmə a muɗə.
41Ite kpe-lagbengɨn a dɨmgə humwa ji-shalaləngɨn a muɗə, təna tiya ɗa hanɨngtə, atɨ Həmɨnpwa a nidərən tən mgban tən tɨl ɓwaare gə tən sop tənətə gə kwakɨ Yesu. 42Təna pɨrə humwa ka petə fərə-fərə a vor Shafe ka wetə hwoɗye-hwoɗye, tənaa ɗaka kəndəshe ka bwe ləmə feme atɨ Yesu nə Ma Həmɨnpwa a Yaɓwarən.
S'ha seleccionat:
Lyenta 5: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.