Lyenta 6
6
Mye nggɨl ɓwaare tukolukpe gə ɓyana sɨzɨmtə
1A vor bətɨngɨn, ite ji-kottə a maɗə a dɨ furo, nggwonshe a maɗə waka Yawude 'ye Heline ka Yawudee Ibɨraniyi, gəkɨlə a haa ɓyana sɨzɨmtə fərə-fərə myaawa salə nggamse mandi Heline. 2Kpe-lagbee bəw a mbiɗi-kpe a payadə ji-kottə kat a sarən atɨ, “Niyəm, aa dɨ wula hina ɗaka kəndə ləməgye da Həmɨnpwa a pɨrə ɓyana sɨzɨmtə. 3Ji-nuwo, ndɨka hwuna nggɨl morye tukolukpe dɨ wakasəwnə, a wule myee mya leyə atɨ təne naa ka Pitɨ Ɗəmɗəmtə, a myee ka lele kaarən. Hin ɓa mɨndə lyentɨngɨn a nəngrən. 4Hin ka nənəngenə, hin ɓa bəə hubosenə a haa ɗa hiwtə ka kəndə ləməgye da Həmɨnpwa.”
5Hanɨngə myee peyi kat ka shalale da kpe-lagbengɨn. Də təna nggɨl Istifanus ma mya leyə atɨ sɨne naa pas ka Pitɨ Ɗəmɗəmtə ka mwadiyale kan kɨr-kɨr, ɗɨkənə yə Filibus ka Prokorəs, Nikano, Timon, Barminas, ka Nikɨləs sɨnə dɨ vor vɨra Antiyok, sɨnə ma ɗaka koɗə pɨle, pɨra a vor kotta Yawude. 6Təna shi ka mingɨn 'ye mya nggɨlə a haka kpe-lagbe, təna ɗarən hiwtə, a pukərən tyefingrən.
7Ləməgye da Həmɨnpwa a pɨrə humwa a fɨlə a mbəgə vor Urshelima. Furo ji-kotte a vor Urshelima a pɨrə humwa tan-tan, furi-furi dɨ vor kɨsehəmye a mwadiyale ka Yesu.
Mye kɨt Istifanus
8Ndi Istifanus ma Həmɨnpwa a wulakan ka gətə, nda tiya ɗa kaɓe zərgi shikoshopye ka sɨndəle a waka ɓwaare. 9Ndəlsətə a tiya dɨ haka imi 'ye dɨma dɨ vor myee dɨ vor vɨnə kəndəshe da Yawude wule a ɓwaare a wa atɨ Vɨnə Kəndəshe da Myee Ɗɨm Nəngrən. Tənə Yawudee dɨma dɨ Sireni ka Alezandiriya, ka imi dɨ njiya Silisiya ka njiya Asiya, mingɨn kat a maɗə a tiya məntəmətə ka Istifanus. 10Tən kat tənaa tɨl asə a hakan, gəkɨlə lee shee dan ka gəta Pitɨ Ɗəmɗəmtə ite nda dɨ byelə kaarə.
11Təna ɗa kuta a shi ka imi a haa ɓotə gə təna kər-jeronye a sa atɨ, “Hina kɨlan ndi Istifanus sɨne dɨ kɨɗa kwakɨ Musa kat ka kwakɨ Həmɨnpwa.”
12Mingɨn a ngama hubo ɓwaare kat ka mi kpan-kpanye da Yawude, ka ji-lee kəndə ɓashita Musa. Təna kɨt Istifanus a zəkan a humwa ji-shalale da Yawude. 13Təna shi ka i ji-takalə jeronyi, a pɨra kaarən a haa ɓashitə gə təna kər-jeronye a nə Istifanus atɨ, “Ma kəwnə aa ɗaka byelə hase a nə Shafe, sɨnə dɨ kɨɗa ɓashita Musa. 14Hina kɨlan sɨne dɨ sa atɨ, Yesu a dɨ vɨra Nazarat ɓa fala Shafanə a nggəddə wule shee Musa a kənə miye a vor ɓashitɨ dan.”
15Ji-shalale 'ye nza kat a nidə Istifanus kpəkəkə, təna naa humwasən ɓətɨ humwa malyenə.
S'ha seleccionat:
Lyenta 6: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.