Lyenta 2
2
Pitɨ Ɗəmɗəmtə a janga a nə ji-kottə
1Ite fərə sɨlangsətɨ Pentikos#2.1 Sɨnə bətə bəwtə tuf beetɨ kwalə Lawutta Yawude. a kənə, kpe-lagbe da Yesu ka mbiɗitɨ ji-kottə nee peyə haa hiɗə. 2Tee gbyel ɗəng, mya nzaa kɨla korme ɓətɨ kaɓa hawo gyeɗəti kɨr-kɨr, dɨma dɨ vor pwa, nda pɨra a naadə vor hwoɗye kat a haa təna nza də. 3Təna naa shee ɓətɨ jeemi ɗiyə dɨma vyeti dɨ janga a nə nagi ndo ma, a tən myee peyi nza. 4Pitɨ Ɗəmɗəmtə a naadərən kat, təna tiya byele ka kwaame som-som, ɓətɨya Pitɨ Ɗəmɗəmtə a və nagi ndo ma a vorsərən gətə.
5Itɨngɨn mgban Yawude paya dɨ hee som-som, a bətɨ njiya kat a vor Urshelima, tənə wule myee dɨ koɗə Həmɨnpwa ka diyale dɨ kalan-gbəətə. 6Ite təna kɨl ɗaw-kwaamɨngɨn, təkə-təkətɨ ɓwaare a paya a haa ji-kottɨngɨn a peyə də a ɗa ndəle gəkɨlə təna kɨla ji-kotte peyi nee dɨ byeli ka kwaame da nagi ndo ma a vor myee kanyi dɨ kɨli. 7Təna ɗa ndəle a gə kiw, a ɗiyəsə le atɨ, “Myee kat aa dɨ vor njiya Galili gərən ma? 8Ɓə ya hɨm a dɨ kɨlamərən dɨ byeli ka kwaame da nagi ndo ma a vorsəm? 9Mi Patiya ka Midiya ka Ilamye, ka myee dɨ vor Mesopotamiya, kat ka myee dɨ vor njiya Yawudiya ka Kapadosiya ka Pontus ka Asiya, 10ka Firjiya ka Pamfiliya ka Ijip, ka imi dɨ ehee dɨ vor Libiya gbyel ka Sireni, ka omyee janga dɨ vor njiya Roma 11(Yawude kat ka myee pɨra a vor kottɨ darən), ka mi Kɨret ka Larabe, hina kɨlarən kat təne dɨ byeli ka kwaame dam a nə səkushipa Həmɨnpwa a ɗa!” 12Le a ɓwarən təna gə kiw ta ndəli kɨr-kɨr ka ləngɨn, tən ta ɗiyəsə atɨ, “Ɓə naarə la nee ya?”
13Imi mgban a mɨndərən ɓaa ɓətɨ dəɗi, təna sa atɨ, “Vwo təna soɓwo nda gərən!”
Bitrus a byelə ka təkə-təkətɨ ɓwaare
14Də Bitrus ka mbiɗitɨ kpe-lagbee bəw a mbiɗi-hiɗə a maɗə a kangə. Nda maddə kormɨngɨn a pwa, a byelə ka təkə-təkətɨ ɓwaaree paya kat atɨ, “Hwun myee denə a hwun Yawude, kat ka myee a vor Urshelima. Samdə kwakingəwnə pepe kɨləm lanə hɨn ɓa boyownə a nə shinə ɗa ɗatɨnə. 15Minə hwuna naarən naatɨnə, aa vwo təna soɓwo ɓətɨ hwuna kana. Giɓə ɓəgəng mbwayi fəre dombiɗətɨ hawuro. 16Səɓo la kpale Joyel a boyownə atɨ,
17“ ‘Həmɨnpwa a sa atɨ,
A kpawtɨ nzatɨnə,
sa hɨn ɓa ɗa nə yang:
Hɨn ɓa pukadə pitɨ de
a nə ɓwaare kat.
Je dəwnə, i morye kat ka ji-mandye ɓa kpalə,
ji-lagbe dəwnə ɓa naa haa,
mi kpanye dəwnə ɓawa jiriyə.
18Hɨn ɓa pukadə Pitɨ de a fərəngɨn a nə kɨse de
morye kat ka mandye,
tən ɓa kpalə.
19Hɨn ɓa bɨldə zərgi shikoshopye a pwa,
ka sɨndəle ganə a vɨratə,
zaambe ka ɗiye,
ka ɗogoli tuwo ɗiye.
20Fəre ɓa virwo a gəə kuliti,
likɨtə ɓa poro kpalam
ɓətɨ zaambə,
də fərə kpane ka fukata Həmɨmiye a ɓə shi.
21Nagi ndo ma kat tuwi
wadə kwakɨ Həmɨmiye Baatə,
ɓa ɗɨm mbətə.#2.21 Naasə: Joyel 2.28-32.’
22“Mi Israila, samdə kwakingəwnə kɨləm lanə: Yesu a dɨ vɨra Nazarat, sɨnə ma Həmɨnpwa a mwakan, a bɨldə zərgi shikoshopye kat ka sɨndəle a wakasəwnə dɨ hakan, hwun ka nənəngəwnə hwun leyə. 23Sɨnə ma Həmɨnpwa a vədən a tɨfəngəwnə a vor leetɨ dan kɨnɨnɨng ka kanatɨ dan, hwuna pedə kwaamɨngəwnə ka mi hashe a ɓɨltən a nə kada ɓɨdɨmtə. 24Həmɨnpwa a maddən gə we ka myentə, nda nggurəngə tənətɨ we a takan kaarə, gəkɨlə Yesu gbaagə ite atɨ we a kɨttən. 25Həmɨn Dawuda bwe le kɨnɨnɨng a nəngɨn atɨ,
“ ‘Fərə-fərə hɨnə dɨ naa Həmɨmiye a humwashi.
Gə-angɨn kala aa dɨ gi,
gəkɨlə sɨne a tɨfə zɨməngi.
26Gə ləngɨn hɨnə ka hanɨngtə a vor huboshi,
ləməgyee dɨ dɨma dɨ kwaama i hanɨngti,
nagi a vor sɨtɨnə hɨn ɓa bədə myenshi a hakan,
27gəkɨlə hɨn leyə atɨ
tee dɨ ɗaka myenshi ngga bə taane,
tee dɨ ɗaka kɨsa ɗəmɗəme dəw nda bə a pomə.
28Hye bɨli təfəgi myentə,
hye ɓa naadi ka hanɨngtə a humwasa.’#2.28 Naasə: Dyemshe 16.8-11.
29“Ji-nuwo, na boyownə bwang, taa ndələ də atɨ, baagəm Dawuda mbɨrə, mye ɗɨkrən, taanəngɨn nə ganə a hakam supo. 30Dawuda kpalə, ɓə leyə atɨ Həmɨnpwa bwe le gbə ka nəngɨn atɨ ndi ɓa nza də ama hiɗə dɨ kwirəngɨn a nə ruutɨ dan ndi Dawuda. 31Gəkɨlə ɓə naa sa a humwa, nda bwe le a nə mattɨ da Ma Həmɨnpwa a Yaɓwarən gə taane, atɨ ndaa ɗakan a taane sɨsən mgban a pomə. 32Həmɨnpwa a maddən ndi Yesu gə we ka myentə, hin kat hin ji-takalə a nə angɨn. 33Sɨndə Həmɨnpwa a fukadən nda nza tɨfə zɨməngən, nda luu Pitɨ Ɗəmɗəmte Baatə a və kwaame a nəngrə, nda pukadə Pitɨngɨn ɓəgəng, sɨnə sa hwuna nan, a mɨna kɨlə. 34Gə Dawuda aa ndaga nggɨrə vor pwa, kat ka itɨngɨn nda sa atɨ,
“ ‘Həmɨmiye Baatə a sa Həmɨmiye de atɨ,
“Zə nza tɨfə zɨməngi
35baa na ɗɨkdə ji-nyaagu
təna fokə njiya
a poki mbwayinga hye mwagərən.#2.35 Naasə: Dyemshe 110.1.” ’
36“Gə ləngɨn, naa mi Israila kat a leyə twa atɨ, Yesu a hwuna gbaltən a nə kada ɓɨdɨmtə, sɨnə Ma Həmɨnpwa a nggɨltən nda gəə sɨnə Həmɨmiye ka Ma Həmɨnpwa a Yaɓwarən.”
37Ite myee a hangɨn a kɨl ləngɨn, le a hasərən kɨr-kɨr, təna ɗiyə Bitrus ka mbiɗitɨ kpe-lagbe da Yesu atɨ, “Ji-nuwo, ɓə mɨnə hin ɓa ɗa gəngna?”
38Bitrus a luwa a sarən atɨ, “Porom-njiya gə səhase dəwnə, mye ɓa ɗa nagi ndo ma batisɨmatə a vor kwakɨ Yesu Ma Həmɨnpwa a Yaɓwarən, gə mye ɓa nggurəwnəgə səhase dəwnə. Beetɨ angɨn hwun ɓa luu Pitɨ Ɗəmɗəmtə, kotə həmta Həmɨnpwa. 39Həmtɨngɨn nə Həmɨnpwa a vəwnə kwaame a nəngrə atɨ hwun ɓa luwo ka jingəwnə ka myee kat ɓong-ɓong, ka nagi ndo mi Həmɨnpwatɨ dam ndi Həmɨmiye ɓaga wagatɨrən.”
40Bitrus a mɨna boyərən i ləməgi hananang a fyel-kwakingrən atɨ, “Ɨləm myentə, gə hwuna mbəgə ɓashite dɨ shi nə vɨra hattɨ wanetɨnə.” 41Gə-angɨn myee luu ləməgyee nda boyə, mya ɗarən batisɨmatə a fərəngɨn, furongrən kat ɓa ɗa haru bəwtə mwaakɨn, təna pɨrə vor ji-kottə.
Koɗəsə ta ji-kottə
42Təna pedə nəngrən, tən ta kɨl kəndəshe dɨ haka kpe-lagbe da Yesu, təna peyə a nzaa ɓwaa-ɓwaatə ka sə ta ɓyanasə sɨzɨmtə a wakasərən, tən ta ɗa hiwtə mba-dɨ-mba. 43Mbiɗitɨ ɓwaare kat a ɗa ndəle kɨr-kɨr ka wule zərgi shikoshopye ka sɨndəla təna naarən dɨ haka kpe-lagbe da Yesu. 44Ji-kottɨngɨn kat a peyə a gə hiɗə, təna pedə shee darən mgban ta ɓyanasə. 45Təna pedə gɨnətɨ darən ka shee darən kat a ɗərdərən a ɓyanasə taangɨn ɓətɨya nagi ndo ma a dɨ mwo. 46Təna pɨrə humwa ta peyi fərə-fərə a Kwa-Shafe, sə mgban fərə-fərə təna dɨ peyə hwodasə ta zɨməsə shee ka hanɨngtə ka hubosərən hiɗə. 47Tən ta ɓondi Həmɨnpwa ka ɗɨm humwa-shengtə a haka ɓwaare kat. Həmɨnpwa a ɗɨkə ɓwaare hananang a por-njiya gə səhase darən a ɗɨm mbətə, ji-kottə ta furi fərə-fərə.
S'ha seleccionat:
Lyenta 2: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.