2 Korintiye 6
6
1Hin ji-ɗa lyentə ɓwaa ka Həmɨnpwa, hine dɨ nyisəwnə hwun myee ɗɨm wuladəha da Həmɨnpwa, ɓe hwunaa ɗakarə nggagə ɓaa. 2Gə nda sa atɨ,
“Ite fəra na bɨlu humwa-shengtə de a tɨla,
na sardə kwaki a kɨltəwnə.
Ite fərə mbəha a kənə,
na gwada.”#6.2 Naasə: Ishaya 49.8.
Hɨnə dɨ boyownə, ɓəgəng nə fərə humwa-shengta Həmɨnpwa, ɓəgəng nə fərə mbəha.
Tənəta Bulus
3Hinaa ɗɨkdə ama nda pawo, gə ɓe ɓwaare aa ɗɨmgenə le a nə lyenta Həmɨnpwa ite hina dɨ ɗa. 4Səngɨn nə ɗa hina dɨ humwa nəngenə a nagi ndo tɨfə, atɨ hinə kɨse lyenta Həmɨnpwa, nagi a vor ɓwamosowo kɨr-kɨre, nagi tənətɨ ote shee a oo nə ka yedi-kɨttə, 5nagi ka lyapa ka gbəətə a gbərəwe ka mwanatə, nagi ka lyentɨ gbaktə ka ɗongə shintə ka myatə. 6Kat ka angɨn, hina nza ka hubo shet-shettə ka lele ka mbasɨtə ka ɓwaarawne, dɨ gəta Pitɨ Ɗəmɗəmtə ka mwoha diyale. 7Hinə dɨ bwe le ka diyale ka gəta Həmɨnpwa. Pepeta Həmɨnpwa nə wule sɨ nyate hina kɨsə tɨfə zɨme ka a lyekɗe. 8Nagi nda fukati hina ɗɨmə, nagi nda sopi mya venə, nagi nda kɨɗati mya kɨɗenə, nagi humwati mya humenə, nagi təna senə atɨ hin ji-kər jeronyi, nagi diyalə hina dɨ boyo, kat ka angɨn hina pɨrə humwa. 9Hinə ɓətɨ myaa leerenə, shezə mye leerenə. Hinə a kwaamɨ we, shezə hinə ka myentə. Mya ɗwagalenə, shezə myaa ɓəl tenə. 10Hinə a vor yedi-kɨttə, shezə mba-dɨ-mba hinə dɨ kyeɗəki. Hinə ɓətɨ ji-poriti, shezə hinə dɨ və imi hananang gɨnətə. Taa asə kenə, shezə hinaa ɗongə asə.
11Mi Korintiya, hin boyownə daasə diyale dɨməwnə dən kat bwang, hin wunəwnə a kwa-hubosenə bwang. 12Hin aawa kɨt sɨsenə ka wule mwote hina dɨ mworəwnə, hwunə dɨ kɨt sɨsəwnə ka mwosenə. 13Hɨnə dɨ byeli kəwnə ɓətɨ ji-kurkurye de nə, gə hwunaa bɨlenə mwoha dəwnə ɓətɨ hina bɨləwnə hɨnggenə, ɓə kana hwun mgban hwuna wuna hubosəwnə kenə.
Ɓe hwunaa pedə nəngəwnə ka myee aa mwadiyale
14Ɓe hwunaa pedə nəngəwnə ka wule myee aa mwadiyale, nda mɨnə pedə səfeme ka səhase, mɨnə pedə ɓɨrtə ka kulita? 15Mɨnə kɨləsəte a waka Ma Həmɨnpwa a Yaɓwarən ka Shetan#6.15 Dorshi kwamətə a lyenə ka kwakanə atɨ, Beliyal., mɨnə a waka ji-kottə ka myee ɗongə mwadiyale? 16Mɨnə pedə Shafe da Həmɨnpwa ka pɨle? Gə hɨmnə shafe da Həmɨnpwa ndi ma ka myentə. Naya Həmɨnpwa a boyo kɨnɨnɨng atɨ, “Hɨn ɓa nza wakasərən a koɗə kaarən ɓwaa, hɨn ɓa gəə hɨnə Həmɨnpwatɨ darən, tən mgban təna gəə myee de.”#6.16 Naasə: Livitikus 26.12; Jerimaya 32.38; Ezikiyel 37.27.
17“Həmɨnpwa Həmɨmiye a sa,
‘Gə-angɨn dɨmam gə vorsərən,
hwuna təkəsə kaarən.
Ɓe hwunaa pa sa takɨm,
hɨn ɓa lurəwnə.’ ”#6.17 Naasə: Ishaya 52.11; Ezikiyel 20.34,41.
18“Həmɨnpwa Həmɨ gətə nə boyi atɨ,
‘Hɨn ɓa gəə Baati a hakəwnə,
hwun ɓa gəə hwunə je de,
i morye ka i mandye.’ ”#6.18 Naasə: 2 Samaila 7.14; 2 Samaila 7.8.
S'ha seleccionat:
2 Korintiye 6: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.