2 Korintiye 5
5
Hwodam 'ye a vor pwa
1Gəngnə hɨm leyəm atɨ hwoɗi bolkinə hɨm a gəmə vorsərən kana kɨɗə a mbəə ɓaa, hɨm nə ka i hwoɗi a haka Həmɨnpwa gaarə a vor pwa, a wule hwoɗyee aa ka tyefi ɓwaare mya nwotɨrən, wule hwoɗingɨn taa mbati kaarən. 2Ganə a vɨratə ɓəgəng hɨm nə dɨ 'yesəwom dɨ hɨmagə ite atɨ giɓa mya vəm wule sɨtɨrə gaarə a vor pwa, 3gəkɨlə hɨm kana kalam wule sɨtɨ hweltɨrə, myaa dɨ pam dɨfuwa. 4Gə hɨm minə nzamə wule bulkə vɨratə ka wule sɨte dɨ mbɨri pomi ɓaa. Hɨm nə dɨ 'yesəwi ɓətɨ sɨ diksɨkə bə nəngəm. Myaa mwom atɨ mya təkəməsə ka wule sɨtɨnə a vɨratə, shezə hɨm a dɨ 'yesəwom gə mya vəm wule sɨtɨ hwelte dɨma dɨ vor pwa, gəkɨlə wule sɨtɨ soɓwa nə mya gəm karə a vɨratə a nggəɗə a gə ka wule sɨte ka myente a diyə mbəə. 5Həmɨnpwa nə ɗɨkdə shingɨn kat təna gə sə, sɨnə ma mgban vəm Pitɨ Ɗəmɗəmtə gə sɨnə sə kwaməte ndi ɓa vəm a humwa.
6Gə ləngɨn hɨm leyəm mɨnə mwaka sate atɨ anda hɨm nə nzamə sɨtɨnə, hɨm nə ɓong-ɓong ka hwoda Həmɨmiye irə gaarə a pwa. 7Nzaa mwadiyalə hina nza gəngnə, aa gə nzaa naa dii. 8Na mɨna dɨ boyo atɨ hɨn mwaka angɨn atɨ ndɨka hina dɨmgə sɨtɨnə a gə hwoɗye ɓwaa ka Həmɨmiye. 9Gə-angɨn hina dɨ ɓərə atɨ haa a nɨngə Həmɨnpwa kenə nagi a sɨtɨnə ganə a vɨratə nagi mgban hina dɨmgə sɨtɨngɨn. 10Gələ mbak-mbak hɨm kat ɓa kangə humwa ruutɨ ɓashita Ma Həmɨnpwa a Yaɓwarən gə ɓashitə, gə nagi ndo ma a luu moonə wule lyente nda ɗatɨrə ka nzaasən a vɨratə nagi i pepeti nagi mgban i hatti.
Mɨnadə ɓwaare a haka Həmɨnpwa
11Gə ɓəgəng hin lee naarə gəə kala Həmɨmiye, hina dɨ ɓərə a mbɨr ɓwaare gə təna mwadiyale. Həmɨnpwa leerenə twa, na hɨma mgban atɨ hwun leyə sə a hubosəwnə. 12Hin aawa humwa nəngenə a hakəwnə ɓə, hinə dɨ vəwnə humwatə gə hwuna məndaranye gə le denə gə hwuna ɗɨm la hwun ɓa luwa myee dɨ nggur nəngrən gə sa təna gə kan aa gə sa a hubotə. 13Anda ləməgyee hina dɨ boyə a gəwnə ɓətɨ hin ji-pɨle, zə nggurəm ləməngɨn gə le da Həmɨnpwa. Anda ləməgyee hina dɨ boyə bɨldən atɨ hine a sombingenə, angɨn gə le dəwnə nə. 14Gələ mwoha da Ma Həmɨnpwa a Yaɓwarən nə ɗɨkdəm mya ɗam sa mya dɨ ɗam gə hin mwaka sate atɨ ɓwaara hiɗə mbɨri gə le da ɓwaare kat, sə mgban ɓwaare kat a mbərə. 15Yesu a mbɨrə gə le da ɓwaare kat, gə myee luu myentɨ hweltə dɨ hakan ɓe tənaa yə nza nənəngrən, tən ɓawa ɗa sa Yesu a dɨ mwo, ndi ma mbɨri maɗi gə le darən.
16Hinaa yə mɨna nggur wule lelə vɨratɨnə a nidə ɓwaare kan. Gə kɨnɨnɨng hina dɨ kana Ma Həmɨnpwa a Yaɓwarən ka wule ji-lelə vɨratɨngɨn, ɓəgəng aa yə sə hina leerən. 17Gə ləngɨn mgban ma kat hɨnggə Ma Həmɨnpwa a Yaɓwarən nə, Həmɨnpwa mɨndən ma hwelə. Shi 'yerye pɨrə kat, shi hwelye dɨma! 18Shingɨn kat Həmɨnpwa nə ɗatɨrən, sɨnə ma mɨnadəm a hakan dɨ haka Ma Həmɨnpwa a Yaɓwarən. Sɨnə mgban vəm lyentɨnə gə hɨm a mɨnamdə mbiɗitɨ ɓwaare a haka Həmɨnpwa. 19Həmɨnpwa nə dɨ mɨnadə mi vɨratə kat a hakan dɨ haka Ma Həmɨnpwa a Yaɓwarən. Ndaawa kɨt səhase da ma a hubosən. Nda venə ləməgi mɨnadə ɓwaare a hakan. 20Gə ləngɨn mgban hinə ji-tɨfə a moonə Ma Həmɨnpwa a Yaɓwarən, angɨn nə ɓətɨgə Həmɨnpwa nə dɨ nyisə ɓwaare dɨ hakenə. Hin mgban hinə dɨ nyisəwnə a vor kwakɨ Ma Həmɨnpwa a Yaɓwarən, viriwam mɨnam a haka Həmɨnpwa. 21Həmɨnpwa a ɗɨkdən ndi ma taa səhasə kan, nda nggur səhase a sɨsən gə le dam gə hɨm a ɗɨməm pepeta Həmɨnpwa dɨ hakan.
S'ha seleccionat:
2 Korintiye 5: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.