2 Korintiye 4
4
Shi-pepeyee a vor dwe soɓwe
1Hin leyə atɨ purusenə nə Həmɨnpwa a ɗa nda wulakenə a venə lyentɨnə, gə ləngɨn sɨsenə aa dɨ kpala. 2Hina kwo wule shi sopye mya dɨ ɗatɨrən a haa ɓotə. Hin aawa woyo ta vwaka ɓwaare ka kuta ta viriwdə le da Həmɨnpwa ta kər-jeronye kan, shezə hɨnggenə hina dɨ bɨldə diyalə le da Həmɨnpwa a haa bwange bwang gə ɓwaare kat a leyə twa atɨ mye ɓa mba mwatə mwakenə a humwa Həmɨnpwa. 3Nagi nda ləmə feme da Həmɨnpwa a hina dɨ hiwa kan a gə haa ɓotə, ləngɨn a gə haa ɓotə a haka wule myee a kwaamɨ we. 4Tənə wule myee aa mwadiyale, Nzə-tɨmbɨrha nzatɨnə ɓəgəng a viriwdə kwa-hubosərən gə ɓe tənaa naa ɓɨrtɨ ləmə feme ka fukata Ma Həmɨnpwa a Yaɓwarən ndi ma bɨldə pasangə Həmɨnpwa bwang ɓətɨya nda gə. 5Hin aawa woyə ta hiwa gə ɓwaare a humwenə a ndukodenə. Shezə hina dɨ hiwa atɨ Yesu Ma Həmɨnpwa a Yaɓwarən nə Həmɨmiye, hin ka nənəngenə hina gəwnə kɨse gə le da Yesu. 6Gə Həmɨnpwa ka nənəngɨn nə sa atɨ, “Naa ɓɨrtə a dɨma dɨ vor kulitə a ɓɨrə.”#4.6 Naasə: Tiyatə 1.3. Sɨnə ka nənəngɨn ɗɨkdə ɓɨrtɨ dan a hubosəm gə hɨm a dɨmaadə ɓɨrtɨngɨn a bɨldə lelə fukata Həmɨnpwa ite dɨ ɓɨra dɨ haka humwa Ma Həmɨnpwa a Yaɓwarən.
7Hinə ka shi-pepeye 'ye ka fukatə kaarən kaaru-kaaru, 'ye mya ɗɨkdərən a vor dwe soɓwe gə mya leyə atɨ wule gbaktɨ gəte dɨ haka Həmɨnpwa nggagə aa dɨ hakenə. 8Təna ngyekrenə a kpasenə a nagi ndo gyengə, kat ka angɨn asə aa genə. Hinə dɨ ndəli hinaa lee sa hina gə vorsən, kat ka angɨn hinaa gɨgɨlə, sɨsenə aa kpalagenə. 9Myenə dɨ tənəə denə, kat ka angɨn Həmɨnpwa aa gɨrgenə. Mya ɗenə sɨmwarashe a ɗongdenə, kat ka angɨn myaa gbantenə. 10Nagi goɗi hinə a kwaamɨ we gə tənəte hina gə vorsə ɓətɨya Yesu a mbɨrə, gə mya bɨldə myente Yesu a dɨ vədə dɨ sɨsenə. 11Gə hɨm minə ka myentə hɨm nə a kwaamɨ we nagi goɗi gə le da Yesu, gə mya bɨldə myentɨ Yesu dɨ sɨtɨ soɓwa nə hɨm a gəm kaarə. 12Gə ləngɨn, hinə a kwa-we, shezə angɨn mgban shikəwnə ka myentə.
13Mya doro vor Malɨmtɨ Ɗəmɗəmtə atɨ, “Na mwadiyale, gə-angɨn hɨn byelə.”#4.13 Naasə: Dyemshe 116.10. Ka wule mwadiyaləngɨn hina mwaka Həmɨnpwa a gɨɗən a byelə, 14gə hin leyə atɨ ndi ma maddə Həmɨmiye Yesu gə we ka myentə, ɓa maddəm ɓwaa ka Yesu gə we a zə kam a humwasən. 15Nagi ndo sə kat gə le dəwnə gən, gə wuladəha dɨ tɨlə haka ɓwaare hananang a ɗɨkə hubosərən a naa pas ka usəkətə gə Həmɨnpwa a ɗɨm fukatə.
16Gə ləngɨn sɨsenə aa kpalagenə nagi ngga dɨ iira a mbəə ɓaa ɓa dɨmə we, kat ka angɨn pite a vor hubosenə nee dɨ mana hwel-hwel fərə-fərə. 17Gəkɨlə wule tənətɨnə kəng-kəng aa dɨ ɓongə, angɨn ɓa shi ka miye ka wule fukatɨ kaaru-kaarutə ite pɨrgə tənətɨngɨn. 18Hin aawa bədə myensenə a nə wule shee mya dɨ naarən ɓəgəng ganə, hina dɨ bədə myensenə a nə shee myaawa naarən. Shee mya dɨ naarən ganə a vɨratə, tənə 'ye dɨ pɨri tənaawa kangə. Wule shee myaawa naarən ka dye, tənə 'ye kaaru-kaaru.
S'ha seleccionat:
2 Korintiye 4: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.