1 Korintiye 14
14
Kpaltə ka byele ka kwaame som-som
1Ɨləm mwoha, hwuna ɗa pɨr-pɨrə həmta Pitɨ Ɗəmɗəmtə, a i kpaltə. 2Gələ ma dɨ byeli ka kwaame som-som, aa ɓwaare nda dɨ byelə kaarən, shezə Həmɨnpwa nə mangɨn a dɨ byelə kan. Taa ama lee la nda dɨ boyo, gə ləməgyee nda dɨ boyo nee kpəshi lə dɨ haka Pitə. 3Shezə ndi ma dɨ kpali mgban, ɓwaare nda dɨ byelə kaarən gə nda nyerədərən gə nda nwotɨrən təna kangə dwat ndi ta tal yedingrən. 4Hɨnggən ndi ma dɨ byeli ka kwaame som-som, nəngɨn nə nda dɨ gwadən, shezə ndi ma dɨ kpali hiwa ɓwaare ka le da Həmɨnpwa, mbiɗitɨ ji-kottə nə nda dɨ nwotɨrən a nyerədərən. 5Mwoshinə atɨ nagi ndo ma a vorsəwnə a byelə ka kwaame som-som, shezə hɨn nda mwo pɨrə atɨ hwuna kpalə. Gələ ndi ma dɨ kpali pɨrgə ma dɨ byeli ka kwaame som-som a taa ama də ɓa vədə naarə la nda dɨ boyo, gə-angɨn a gwadə ji-kottə təna gə dwat.
6Ji-nuwo, anda hɨn zə hakəwnə dɨ pɨrə byele ka kwaame som-som, mɨnə hwun ɓa ɗɨmə vor ləməgingɨn, a taa bɨldə naarə diya Həmɨnpwa a wuni, nagi nda lelə, nagi kpalti, nagi nda kəndəshi, ya angɨn ɓa gwadəwna? 7Sə mgban ka kormi sɨtəwtə, a 'ye tam ka myentə, ɓətɨ koriye ka kolongtɨ jinde, anda taa naarə ka kormi sɨtəwtɨngɨn kat, ya mya lee naarə ləməgyee koriye ka kolongtɨ jinde a boya? 8Sə mgban ɓome kana tuwo ka korma taa naarə kan, wonə ɓa ɓwesɨsən a pɨrə 'yentə gə pakawata? 9Sə a gə kəwnə, anda taa naarə ka ləməgyee hwuna dɨ boyo, ɓə ya ɓwaare ɓa lee la mya dɨ boya? Ɓa gəə byelə ɓayə hwuna dɨ byelə. 10Taa ndələ də atɨ kwaame nə də som-som a vor vɨratə, kat ka angɨn tən kat tənə ka naare kaarən. 11Anda hɨn taa lee naarə ləməgyee ama a dɨ boyo ka a kwaamə som, hɨn gən nzə-kwasomo, mangɨn a dɨ byeli mgban gi nzə-kwasomo. 12Sə mgban a gə kəwnə. Gə hwunə ka pɨr-pɨrə wule həmte Pitɨ Ɗəmɗəmtə a dɨ vədə. Zə ɓərəm ɨləm həmta Pitɨ Ɗəmɗəmtə a wule həmte ɓa nyerədə ji-kottə təna kangə dwat pepe.
13Gə ləngɨn, ma dɨ byeli ka kwaame som-som, a nda nyisə Həmɨnpwa gə nda gwadən nda bwe naarə ləngɨn. 14Gə hɨn kana kangə a dɨ ɗa hiwtə a byelə ka kwaame som-som, ka huboshi a vor pitə na dɨ ɗa hiwtɨngɨn, la a vor huboshi aa dɨma ka sə twaye. 15Ɓə mɨnə kana na ɗa? Hɨn ɓa ɗa hiwtə a vor pitə, sə mgban hɨn ɓa mɨna ɗa hiwtə ka huboshi, hɨn ɓa gəə dyemshi ɓondi Həmɨnpwa a vor pitə, sə mgban hɨn ɓa gəə dyemshi ɓondi Həmɨnpwa a vor huboshi. 16Ɓə hye kana ɓondi Həmɨnpwa a vor pitə, ɓə ya myee nza hangɨn dɨ kɨli ɓa luwa a sa atɨ Amin, a usəkəte hye dɨ ɗa, aɓə tənaa lee naarə la hye dɨ boyə vor hiwta? 17Nggi hiwte hye ɓərə a ɗatɨrə pepe ka usəkətə, shezə hiwtɨngɨn aa nyerədə ma nza gyenganga.
18Hɨnggi, hɨn ɗa Həmɨnpwa usəkətə ka ite atɨ hɨn pɨrgəwnə kat ka byele ka kwaame som-som. 19Kat ka angɨn, a hɨn pɨrə vor vɨnə hiwtə a waka ji-kottə, ndi kana bwe ləməgye tuf 'ye ɓa gwadə ɓwaare, angɨn nə pɨri gə ite atɨ na byelə ka kwaame hananang a wule ləməgyee ɓwaare aa lee naarəngrən.
20Ji-nuwo, ɓe ɗyangale dəwnə aa gə ɓətɨ hɨnggə ji-kurkuryi. Ndɨka hubosəwnə a gə shet-shet ɓətɨ hɨnggə ji-kurkuryi 'ye taa səhasə kaarən, shezə səɗə-yedye dəwnə a gə ɓətɨ hɨnggə myee tɨl ɓwaare. 21Mya dorshe a vor ɓashitə a haa Həmɨmiye a boyo atɨ,
“Ka kwaame da mi somye,
dɨ mɨni kwaamɨ rumye,
hɨn ɓa byelə ka minə de,
kat ka angɨn tənaa dɨ mwa
a sardə kwakingrən a kɨlti.”
22Gə ləngɨn mgban, byele ka kwaame som-som, aa sɨndələ a haka myee mwadiyale, shezə a haka ji-ɗongə mwadiyale sɨndələ. Sə mgban kpaltə gə le da myee mwadiyale, aa gə le da ji-ɗongə mwadiyale. 23Hye kana niyə ji-kottə kat a peyə haa hiɗə a dɨ ɗa hiwtə, nagi ndo ma a dɨ byelə ka kwaame som-som, ma aa lee asə, naasə mgban nzə-ɗongə mwadiyale kana pɨrə hangɨn a parən dɨ byeli ka kwaame som-som, ndaa dɨ sa atɨ ji-pɨle peyi? 24Shezə anda myee peyə haa hiwtə kat, kpalə təna dɨ kpalə, a dɨ bwe le da Həmɨnpwa, nzə-ɗongə mwadiyale naasə ma aa lee asə kana pɨrə a parən, ləməgyee kat mangɨn a kɨlə ɓa ɓashidən a ɗɨkdən nda banga a tɨfe. 25Ləməgyee nda ɓodərən a vor hubosən ɓa dɨma a haa bwange. Gə-angɨn ndi ɓa fukə a por-njiya a kala Həmɨnpwa gbəətə. Ndi ta sa atɨ, “Diyalə Həmɨnpwa nee a wakasəwnə hwun minə peyi.”
Kala-gbəətə a tɨfa kana
26Ji-nuwo, ɓə a shiya mya sa ka ləngɨn? Hwun kana peyə haa hiɗə gə hiwtə, ama nə ka dimsə ɓondiha ɓa ga, ama ka sa ndi ɓa kəndən, ama mgban Həmɨnpwa wunən diya, ama byelə ka kwaame som-som kat ka bwe naarə ləngɨn. Shingɨn kat mya ɗatɨrən gə mya nyerədə ji-kottə təna kangə dwat. 27Anda imi ɓa byelə ka kwaame som-som, mya ɗaka ɓwaare kpe zə mwaakɨn təna byelə, ɓe tənaa byelə kwa-hiɗə, təna byelə hyeɗə-hyeɗə, ama som a bwe naarə ləməgingɨn. 28Anda ama tamdə ɓa vədə naarə ləməgingɨn, ndɨka mangɨn a ɗaka byele ka kwaame som-som, nda nza ɗəng ta byelə hubosən a wakasən ka Həmɨnpwa.
29Sə mgban, anda imi ɓa kpalə ka le da Həmɨnpwa, mya ɗaka ɓwaare kpe zə mwaakɨn təna byelə, myee nza mgban dɨ kɨli, təna nidə ləngɨn a pyeltən kpəkəkə. 30Anda mgban mye wunə ama diya dɨ vor myee peyi nza, ndɨka ma dɨ byelə kwamətə a ɗaka byele a tə mangɨn haa. 31Ndɨka ɓwaara hiɗə a kpalə a mbəə, ama aɓə koɗən, gə myee kat nza a ɗyegən asə, hwun kat mgban angɨn a nyerədəwnə. 32Hwuna leyə atɨ, myee dɨ kpali, pite dɨ vərən gətɨ kpaltə nee a pukərən. 33Gə Həmɨnpwa dam aa ma tukuttə ndi ma ɗollə.
Sə mgban kana, mbiɗitɨ ji-kottə kana peyə kat ɓa ɗa hiwtə, 34ɓe mandye aa kangə nə myee ləki a byelə, a təna nza ɗəng, ɓe tənaa byelə. Gə myaa mwarən atɨ təna byelə, shezə təna vədə nəngrən ɓətɨya ɓashita Musa a boyo. 35Anda təne dɨ mwi atɨ təna ɗi le a nə asə, təna ɗiyə moryingrən a hwoɗye, gə sɨ sopi metə a byelə haa ɗa hiwtə.
36Dɨ hakəwnə le da Həmɨnpwa a tiya dɨmatə ma? Naasə hwunə mba-mba ləngɨn a tɨla kəwna? 37Anda ama nə də dɨ niyi ɓətɨ ndi kpalə, naasə ka Pita Həmɨnpwa dɨ koɗi kan, naa mangɨn a mwa atɨ shinə na dɨ dorownə, gɨraha da Həmɨnpwa nə. 38Anda mangɨn gbyanga kwakingɨn ka lanə ndaa bəgən myenti, sə mgban mya gbyangan a kwakye myaa dɨ bəgən myenti.
39Gə ləngɨn ji-nuwo, ɗam hɨmnə kpaltə, ɓe hwunaa kərə mbiɗitɨ ɓwaare byele ka kwaame som-som. 40Nagi mɨnə mye ɓa ɗa, mya ɗarən pepe a tɨfa kana.
S'ha seleccionat:
1 Korintiye 14: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.