1 Korintiye 15
15
Mattaa Ma Həmɨnpwa a Yaɓwarən gə we
1Ji-nuwo, gəngnə hɨnə dɨ mwi atɨ na ɗyangəwnə le a nə ləmə fema na hiwawnə kan, a la hwuna luwo, ləngɨn nə mgban hwuna kangə nəngɨn baa supo. 2Dɨ ha ləmə fema nə hwuna ɗɨm mbətə, anda hwun kangə nə ləma na hiwawnə kan dwat. Naasə, mwadiyale dəwnə gəə a ɓayə.
3Gə ləməgyee na luwo a hiwawnə kaarən tənə 'ye pɨri ka fukatə kat atɨ Ma Həmɨnpwa a Yaɓwarən a mbɨrə gə səhase dam ɓətɨya Malɨmta Həmɨnpwa a boyo. 4Sə mgban mya ɗɨkrən a taane, nda maggə we ka myentə beetɨ bətə mwaakɨn, ɓətɨya Malɨmtɨngɨn a boyo. 5Də nda dɨma ka Bitrus bwang, dɨ bee nda dɨma ka mbiɗitɨ lagbe dan tən bəw a mbiɗi-kpe. 6Beetɨ angɨn nda dɨma ka ji-kottə furongrən pɨrgə haru tuf a kwa-hiɗə, hakpanə myee nan nee ka myentə baa supo. Imi dɨ vorsərən mgban tən mbərə. 7Dɨ beetɨ angɨn nda dɨma ka Yakubu#15.7 Yakubutɨnə sɨnə mufə Yesu. bwang nda mɨna dɨma ka kpe-lagbe dan kat. 8A kpawtə kat, nda dɨma ke na nan, hɨn manə kwa ma mya mwasarən bətɨ mwasasən aa kənə.
9Hɨnə ma mbata kpe-lagbe kat, taa liya kəni mya wari atɨ hɨnə hiɗə dɨ vor kpe-lagbe da Yesu, gə wule tənəte na tənədə ji-kottə, a myee da Həmɨnpwa. 10Shezə Həmɨnpwa a wulake na ɓə gəə sa na gə ɓəgəng. Wulate Həmɨnpwa a wulake a gwadi nggaa gəə i ɓaati. Ə'ə, kat ka angɨn hɨn ɗa lyentə pɨrgə mbiɗitɨ kpe-lagbe, aa tɨnyi hɨnə ɗa lyentɨngɨn, wulate Həmɨnpwa a wulakenə gwadi. 11Gə-angɨn, nagi nda hɨnə hiwa ka le da Həmɨnpwa, nagi tənə, lə hiɗə nə hina hiwa kan, angɨn nə mgban hwuna mwakan.
Mattaa wogye ka myentə
12Gə-angɨn ɓə mɨnə ɗa imi a vorsəwnə a mɨnaa dɨ sa atɨ mattə gə we tamdə, kat ka sate atɨ mye hiwawnə atɨ Ma Həmɨnpwa a Yaɓwarən maggə we ka myentə? 13Anda mattə gə we tamdə, angɨn bɨldən atɨ Ma Həmɨnpwa a Yaɓwarən mgban aa maggə we ka myentə. 14Anda Ma Həmɨnpwa a Yaɓwarən aa maggə we ka myentə, angɨn bɨldən atɨ la hina hiwa kan lə ɓayə, mwadiyale dəwnə mgban gəə a ɓayə ɓaa. 15Aa angɨn nə ɓəmbə, angɨn bɨldən atɨ hin gəə ji-takalə jeronyi, gə hin takale a nə Həmɨnpwa atɨ nda maddə Ma Həmɨnpwa a Yaɓwarən gə we ka myentə. Shezə ndaa maddən gə we ka myentə anda diyalə taa matti gə we ka myenti də. 16Gə anda taa matti gə we də, angɨn bɨldən atɨ Ma Həmɨnpwa a Yaɓwarən aa maggə we ka myentə. 17Anda sə gən atɨ Ma Həmɨnpwa a Yaɓwarən aa maggə we ka myentə, mwadiyale dəwnə gəə a ɓayə, hwune mgban a vor səhase dəwnə baa supo. 18Anda sə mgban, myee mbərə vor mwadiyale ka Ma Həmɨnpwa a Yaɓwarən tən yerə ɓaa. 19Anda a nzaa vɨratɨnə ɓəmbə mya bədə myensəm a nə Ma Həmɨnpwa a Yaɓwarən, sə oti kɨr-kɨr a nəngəm pɨrgə mbiɗitɨ ɓwaare kat.
20Shezə diyalə Ma Həmɨnpwa a Yaɓwarən maggə we ka myentə. Mye leyə atɨ myee mbəri ɓa maggə we, gə sɨnə ma kwaməte maggə we a vor myee mbəri kat. 21Ɓətɨya we a pɨra a vɨratə dɨ haka ɓwaara hiɗə, sə mgban mattə gə we a shi dɨ haka ɓwaara hiɗə. 22Naya mgban ɓwaare kat a dɨ mbərə gə le da Adamu, sə mgban mya ɗɨməm myente aa diyə ga mbəə gə le da Ma Həmɨnpwa a Yaɓwarən. 23Nagi ndo ma nee ka fərə mattɨ dan gə we. Ma Həmɨnpwa a Yaɓwarən nə tiya a kwamətə kat, beetɨ angɨn ndi kana mɨna a vɨratə, myee tənə hɨnggən mgban ɓa maggə we ka myentə. 24Beetɨ angɨn nə kpawtɨ vɨratə ɓa shi, a ite ndi Yesu kɨɗa səɗə həmi vɨratə ka həmne darən ka gətə kat, də ndi ɓa mɨndə həmnə vɨratə kat a və Həmɨnpwa Baatə. 25Gə ɓə nza mbak-mbak Ma Həmɨnpwa a Yaɓwarən a ɗa həmne ka gətə baa nda gban ji-nyaagən kat təna pɨrə pukəngɨn. 26Won nə nzə-nyate mya kɨɗa səɗəngɨn a kpawtə kat. 27Gə Həmɨnpwa “mɨndə nagi ndo sə kat a pukəngɨn.”#15.27 Naasə: Dyemshe 8.6. Ite nda boyo atɨ mye ɗaka nagi ndo sə kat a pukə Yesu mye leyə mgban atɨ, ndi Həmɨnpwa a və Yesu gətə a nə shee kat, ɓə tam a pukəngɨn. 28Ite mye mɨndə shee kat a pukəngɨn, ndi Nze ɓa mɨnadə nəngɨn a pukə Həmɨnpwa, a ndi ma mɨndə shee kat a pukəngɨn, gə ndi Həmɨnpwa a gəə sɨnə ne a nə nagi ndo sə kat.
29Ɓəgəng, naarə shee təna dɨ ɗa nə mɨna, ka wule myee mya dɨ ɗarən batisɨmatə gə le da myee mbəri? Anda taa matti gə we ka myentə də, ɓə gə mɨnə mya dɨ ɗa imi batisɨmatə gə le darən? 30Ɓə hin mgban, mɨnə ɗa hina gə vor tənətə fərə-fəra? 31Nagi ndo fərə hɨne a kwaamɨ we, na boyo sə gə na dɨ jelə kəwnə gə le da Yesu Həmɨmiye dam Ma Həmɨnpwa a Yaɓwarən. 32Hɨn kanggəsə ka mi hashe ɓətɨ sɨkaakə nya a vor vɨra Afisus. Anda ɓərə nəna nə na dɨ ɓərə ɓa ɗɨm moone de ga vɨratə ɓəmbə, mɨnə sa hɨn ɓa ɗɨmə də? Anda wogye aawa maggə we ka myentə,
“Ndɨka mya zɨməm a səɓom,
gə kɨɗa mye ɓa gəm wogi kat.”#15.32 Naasə: Ishaya 22.13.
33Ɓe ama aa vwakarəwnə, hwuna leyə atɨ, “Kpanga hiɗə dɨ kɨɗa haɓye,” naarə ləngɨn nə atɨ kɨt ndewetə ka ma hase ɓa kɨɗa ma feme. 34Mɨni səɗəm ka yedingəwnə pepe, təkəməsə ka ɗa səhase gə imi a vorsəwnə aa nda lee Həmɨnpwa leete kana. Na boyo sə gə sopye a gəwnə.
Sɨte mya maggə we kaarə
35Baa ɓəgəng ama ɓa ɗiyə atɨ, “Nda ya wogye ɓa maggə we ka myenta? Ndawula sɨti tən ɓa dɨmagə taane kaara?” 36Hye dɨɗe, tee leyi atɨ shee mya laga kat, a tənaa pomə gwe, tənaa dɨ za a kanga? 37Hye kana laga shee, aa kada shi hawti hye laga, daasə ɓəmbə, nagi zumo nagi i shi hawti som. 38Gə-angɨn Həmɨnpwa a dɨ və shi hawtə sɨte nda mwo, sə mgban nagi ndo daasə nda dɨ vən sɨte kana kan. 39Sɨtə tam hiɗə kote som-som. Sɨtɨ ɓwaare nee som, hɨnggə sɨgɨrtə som, hɨnggə ɓakarye som, hɨnggə vaakye mgban nee som. 40Wule sɨte shirə gaarə a vor pwa a gə kaarə nee som, sə mgban wule sɨte shinə a vɨratə a gə kaarə nee som, fukasərən ka wulasərən mgban nee som-som. 41Fukatə ka wulate Həmɨnpwa a və fəre ndə som, hɨnggə likɨtə som, hɨnggə tyekəlye mgban som, tən tyekəlye wulasərən ndə som-som ka sə.
42Sə mgban ɓa gə ka wule sɨte ɓwaare ɓa maggə we ka myentə kaarə. Mya dɨ ɗɨk ɓwaara a gwe sɨsən a kɨɗə njiya a mbəə, kat ka angɨn mya maddə ɓwaara dɨ taane ka wule sɨtɨ myente kaaru-kaaru. 43Mya dɨ ɗɨk sɨtɨ ɓwaara a taane taayə fukati kan, kat ka angɨn ndi ɓa maɗə ka fukatə. Sə mgban mya dɨ ɗɨk ɓwaara ka sɨtɨ kpalatə, kat ka angɨn mye ɓa maddən ka gətə. 44Ka wule sɨtɨnə a vɨratə mya dɨ ɗɨk ɓwaara a taane, wule sɨte ndi ɓa maggə taane ka myentə kaarə, i piti.
Naya mya gəm ka wule sɨtɨnə a vɨratə, sə mgban mye ɓa gəm ka sɨtə a pitə. 45Ɓətɨ mya doro atɨ, “Ɓwaara kwamətə ndi Adamu a gəə ɓwaara ka myentə,”#15.45 Naasə: Tiyatə 2.7. sə mgban ndi Adamu ma mbatə a gəə pite dɨ vədə myente kaaru-kaaru. 46Aa Yesu Ma Həmɨnpwa a Yaɓwarən ndi ma ka sɨtɨ pitə nə shi kwamətə, Adamu nə ndi ma ka wule sɨtɨ vɨratɨnə, sɨnə dɨma a kwamətə, dɨ bee Yesu ndi ma ka sɨtɨ pitə a kwaɗan. 47Ɓwaara kwamətə, sɨnə ganə a vɨratə, dɨ soɓwe mya yalarən, ma kpeyətə dɨ vor pwa nda shi. 48Naya ma mya yalarən ka soɓwe a gə, sə gə myee hɨnggə vɨratə nə mgban. Naya mgban ma shi dɨ vor pwa a gə, sə mgban gə myee hɨnggə pwa nə. 49Naya hɨm a gəm ka wule sɨtɨ ma mya yalarən ka soɓwe, sə mgban hɨm ɓa gəm ka wule sɨtɨ ma shi dɨ vor pwa.
50Ji-nuwo, lanə na dɨ boyownə atɨ, hara ka zaambe aa dɨ mba ɗɨm həmne da Həmɨnpwa, sə mgban wule sɨte dɨ yeri ɓaa a gə ka wule sɨte ka myentə kaaru-kaaru. 51Samdə kwakingəwnə, kɨləm kpəshi lanə. Aa hɨm nə kat ɓa mbərəm, shezə sɨsəm kat ɓa nggəɗə a gə ka wule sɨte ka myente kaaru-kaaru – 52ləngɨn nə tan-tan ɓətɨ maw diiti a ite kpawtɨ ɓome ɓa tuwo. Ite ɓome ɓa tuwo, myee mbəri ɓa maggə taane ka myente aa diyə ga mbəə, hɨm ɓa nggəɗəm ka sɨtɨ hweltə. 53Gə wule sɨte dɨ yeri ɓaa, mbak-mbak ngga nggəɗə ka wule sɨte ka myente kaaru-kaaru. Sə mgban sɨtɨ soɓwe a nggəɗə a nggur wule sɨtɨ pite ka myentə. 54Beetɨ ite wule sɨtɨnə mya gəm kaarə a ite dɨ yeri ɓaa kana nggur wule sɨtɨ myente kaaru-kaaru, də ləma mya boyə vor Malɨmta Həmɨnpwa ɓa naa atɨ, “Mye mba won miɗikə, kɨt ne.”#15.54 Naasə: Ishaya 25.8.
55“Won, a ndo haa gə gbindawne ka kɨt ne dəw?
Won ɓə a ndo haa gə kyana həha dəw?”#15.55 Naasə: Hosaya 13.14.
56Kyanata won nə səhase, gəta səhase mgban dɨ haka ɓashita Musa ngga shi. 57Usəkəta Həmɨnpwa ndi ma vəm kɨt ne dɨ haka Həmɨmiye dam Yesu Ma Həmɨnpwa a Yaɓwarən.
58Gə-angɨn hwun ji-nuwo, hwun myee na dɨ mworəwnə, kangəm dwat ɓe asə aa humurdəwnə. Vəmdə nəngəwnə fərə-fərə hwun tawa ɗa lyenta Həmɨnpwa ka hubosəwnə hiɗə, gəkɨlə hwun leyə atɨ lyentɨ dəwnə gə le da Həmɨmiye aa dɨ gəə i ɓaati.
S'ha seleccionat:
1 Korintiye 15: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.