1 Korintiye 10
10
Fyel-kwakye a nə sa bəng mi Israila
1Hwun ji-nuwo, hɨn taa mwi atɨ hwuna nza vor ɗongə leetə a nə sate atɨ yə sɨnggəm kat woyo pukə pɨrɓate janga kaarən, tən mɨnə woyo vor gbɨnuwtə nggɨrə jam. 2Mya ɗarən batisɨmatə kat a sɨtɨ Musa ka pɨrɓatɨngɨn ka mɨni haɓi gbɨnuwtɨ sɨkorontɨngɨn. 3Tən kat tən zɨm sɨzɨmtɨ hiɗəti 'ye janga dɨ pwa 4mɨnə sop haɓi hiɗəti dɨ sɨtɨ faraa dɨ pwa dɨ koɗərən, farangɨn nə Ma Həmɨnpwa a Yaɓwarən. 5Kat ka angɨn, haa aa nɨngə Həmɨnpwa ka hakpanəngrən. Gə ləngɨn təna mbərə, wogingrən a pukə vor laawe.
6Wule shingɨn a bəngtɨrən kat, gə mya ɗyegənəmshe dɨ hakarən gə ɓe angɨn aa bəngrəm dɨ ha omshi vɨratɨnə ɓətɨ təna ɗa a pɨrə omshe ka ɗyenglə hase. 7Ɓe hwunaa pɨrə koɗə pɨle ɓətɨ imi dɨ vorsərən a ɗa, ɓətɨ mya doro vor Malɨmtɨ Ɗəmɗəmtə atɨ, “Ɓwaare a nza ta zɨmshe ta soɓwi, təna shea maɗə a pɨrə wure kat ka sharawne ɓətɨ ji-koɗə pɨle.”#10.7 Naasə: Dɨmatə 32.6. 8Sə mgban ɓe hɨm aa pɨrəmə sharawne ɓətɨ imi dɨ vorsərən a ɗa ɓwaare haru bəw laka bəwtə kpe a mbiɗi-mwaakɨn a mbərə fəre hiɗə. 9Sə mgban ɓe hɨm aa kanam Həmɨmiye, ɓətɨ imi dɨ vorsərən a kanarən, rokonye a ɗawtɨrən təna mbərə. 10Ɓe hwunaa pɨrə nggwonshe ɓətɨ imi dɨ vorsərən a nggwonshe, malyenə we a ɓəltɨrən.
11Shingɨn kat a bəngtɨrən gə mya ɗyegənəm asə dɨ hakarən, mya mɨna dorshingɨn a vor Malɨmtɨ Ɗəmɗəmtə gə mya gɨrarəm hɨm minə ka myentə tɨlə kpawtɨ nzatɨnə. 12Gəkɨlə ləngɨn, nagi ndo ma dɨ niyi ɓətɨ sɨnə kanyi kpəkəkə, a nda bədə myensən ɓe ndaa fukə! 13Taa wule a kanaha ɓa kɨttəwnə a gə som ka wule a dɨ shi ka ɓwaare som-som. Həmɨnpwa ma tikɨsə ndaa dɨ ɗakəwnə hwuna pɨrə vor wule kanaha ɓa pɨrgə maasəngəwnə, nagi a vor kanahangɨn, Həmɨnpwa ɓa gwadəwnə a ɨləwnə kwatɨfe hwuna ɗɨmə a kangə dwat.
Zɨmshe da pɨle ka kpaa da Həmɨmiye
14Gə-angɨn, hwun yə ndewogi 'ye na dɨ mwo, təkəməsə ka koɗə pɨle. 15Hɨn leyə atɨ mi tikɨshi ka səɗə-yedye na dɨ byelə kaarən, ɗam səɗə-yedye pepe a nə ləməgyee na dɨ boyo. 16Ɓətɨ kpaa sop ta Yesu a hɨm a dɨ peyə a ɗa hiwtə ka usəkətə a nəngɨn, aa sɨnə dɨ pedəm mya gəm hiɗə a zaambə Ma Həmɨnpwa a Yaɓwarən ma? Ɓətɨ burodite hɨm a dɨ ɓeyəsə, aa sɨnə dɨ pedəm mya gəm hiɗə a sɨtɨ Yesu Ma Həmɨnpwa a Yaɓwarən ma? 17Gəkɨlə buroditɨngɨn nə hiɗə, sə mgban kat ka fure dam, hɨm nə hiɗə, səngɨn ɗɨki hɨm kat a dɨ peyə nə buroditə hiɗə a zɨmə.
18Niyəmdə mi Israila pe, tən myee dɨ zɨmshee mya hama kaarən, tən tam dɨ peyə nə shee mya kangadərən a nə kɨrita? 19Ɓə naarə la na dɨ boyo nee a shiya? Na dɨ boyə atɨ wule sɨzɨmte mya həm pɨle kaarən nə ka asə a sɨsərən, naasə mgban atɨ pɨla asa? 20Soɓo naarə la na dɨ boyo nə atɨ, wule shee ji-koɗə pɨle a dɨ hama kaarən kat, ji-dwati mya dɨ vərən shingɨn, aa Həmɨnpwa nə. Hɨn mgban taa mwi atɨ hwuna peyə kpaa hiɗə a zɨmshe ka pɨle ji-dwatə. 21Ɓe hwunaa dɨ soɓwo vor kpaa da Yesu a mbəə, hwuna mɨna dɨ soɓwo vor kpaa da pɨle ji-dwatə. Sə mgban ɓe hwunaa wudə a peyə zɨmshe a kpaa hiɗə ka Yesu a mbəə, hwuna mɨna asɨ zɨmə ka pɨle ji-dwatə. 22Həmɨnpwa nə hɨm a dɨ gwaka jiwne dan ma? Hwuna niyə ɓətɨ hɨm a nyerə a pɨrgə Həmɨnpwa?
Ɗɨmne da ji-kottə
23Ɓətɨ imi a dɨ boyo atɨ, “Nagi ndo ma nee ka humwatə nda ɗa nagi ndo sə,” kat ka angɨn aa nagi ndo sə nə ɓa gwadəha. “Nagi ndo ma nee ka humwatə nda ɗa nagi ndo sə,” kat ka angɨn aa nagi ndo sə nə ɓa nyerədə ji-kottə a vor koɗə Həmɨnpwa. 24Ɓe ama aa pɨrə ɨl sə nənəngɨn mba-mba, shezə ndɨka ma a ɗa sa ɓa gwadə mbiɗitɨ ɓwaare kat.
25Haraa kat hwuna ɗara dɨ lumotə, zɨməm ɗəng ɓe hwunaa ɗi le gə wule ɗyanga ləngɨn ɓa kɨɗa yedingəwnə, 26gə hwuna leyə atɨ, “Bətɨ vɨratə ka shee a vorsə kat, hɨnggə Həmɨnpwa nə.”#10.26 Naasə: Dyemshe 24.1.
27Hye kana niyə ma aa nzə-kotti a warəwnə a zɨmshe, hwuna mwa a zə, zɨməm nagi ndawula sɨzɨmti mya vəwnə, ɓe hwunaa ɗi le gə wule ɗyanga ləngɨn ɓa kɨɗa yedingəwnə. 28Shezə hye kana niyə mgban mya warəwnə a zɨm shingɨn a səwnə atɨ, “Mye həm pɨle ka sɨzɨmtɨnə,” ɓe hwunaa zɨm wule ingɨn, gə le da ma boyownə le, sə mgban gə ɓe wule ɗyangala aa kɨɗa yediha. 29Taawa bwe le a nə ɗyangale dəw hye ma mya wara a zɨmshe, na dɨ bwe le a nəngɨn ndi ma waha gə ɓe yedi ama aa kɨɗən a nə ɗɨmna na gə kan. 30Anda hɨn nzaa zɨmshe ka ɗa Həmɨnpwa usəkətə, ɓə ya angɨn ɓa mɨna gəgi lə ɓə?
31Gə ləngɨn na dɨ səwnə atɨ nagi sɨzɨmti hwun ɓa zɨmə, nagi mɨnə hwun ɓa soɓwo, nagi mɨnə səngɨn hwun ɓa ɗa, ɗamrən gə Həmɨnpwa a ɗɨm fukatə. 32Ɓe hwunaa ɗɨkdə ama nda pawo nagi Yawude, nagi Helini, nagi dɨ vor ji-kottə. 33Sə mgban na dɨ ɓərə a gwadə ɓwaare gə haa a nɨngərən a vor nagi ndo sə na dɨ ɗa, gə hɨn taawa pɨrə ɨl sə nəna, shezə gə na gwadə ɓwaare hananang gə təna ɗɨm mbətə.
S'ha seleccionat:
1 Korintiye 10: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.