1 Korintiye 9
9
Ɗɨmne da kpe-lagbe
1Hɨnə hɨn taa humwati ke na ɗa sa na dɨ mwo? Hɨnə hɨn aa kpa-lagbe? Hɨn ka nəna taa naa Yesu ndi Həmɨmiye ma? Ɓə hwun mgban, aa hwunə Həmɨnpwa a gwadi na lyenə wakasəwnə hwuna virwa a hakan? 2Anda imi a dɨ niyə ɓətɨ hɨn aa kpa-lagba hakarən, ɓə hwun mgban? Hwun kat leyə mbak-mbak atɨ hɨn kpa-lagbe a hakəwnə! Gə lyente na ɗa a wakasəwnə a pɨradəwnə a haka Həmɨmiye nə bɨldə kpa-lagbəwne de bwang.
3Ka ləməginə na bwegə kormi a dɨmdə na gə haka myee dɨ shar kpa-lagbəwne de. 4Hinə hin taa humwati kenə hina luu gwadəha dɨ haka ji-kottə gə hina ɗɨm sɨzɨmtə a zɨmə ma? 5Hinə hinaa kana mandingenə 'ye ji-kotti a raadenə ta gwadenə ka lyenta Həmɨnpwa ɓətɨ mbiɗitɨ kpe-lagbe da Yesu ka yə mwafengɨn kat ka Kefas a dɨ ɗa? 6Naasə hɨnə ka Barnabas ɓəmbə kana hina lyenə ka tyefingenə hina ɓə ɗɨm sa hin ɓa zɨma?
7Wonə ɓa gəə nzə-gyelmbuti gə ndi ta mbwa nəngɨn moone? Ɓə wonə ma mgban dɨ hawi, ndaa zɨmshi gaashe dan? Wonə mgban dɨ jin shee, ndaa sop watɨ sɨgɨrtɨ dan? 8Ɓətɨ ləməginə na dɨ boyo, 'ye dɨma dɨ haka ɓwaare na? Aa ləmə hiɗətinə ɓashita Musa a boya? 9Gə ɓashitɨngɨn a boyo atɨ, “Naake kana dɨ bulashe a kpərətə ɓe ɗɨkən darga a kwaamɨngɨn.”#9.9 Naasə: Gɨraha 25.4. Naakə Həmɨnpwa a dɨ saləngɨn ɓəmba? 10Ə'ə, kat kam hɨm ɓwaare Həmɨnpwa a dɨ saləngəm, aa sa? Diyalə a nəngəm mya dorshingɨn gə ma dɨ hawi kana dɨ hawo nda bədə myensən atɨ ndi ɓa ɗɨm moone dan, ma dɨ bulashe mgban kana dɨ bulashe nda bədə myensən atɨ ndi ɓa ɗɨm moone dan. 11Na ɗiyə atɨ ɓwaa, na hin laga daasə ləməgye da Həmɨnpwa a hubosəwnə, aa kana hina ɗɨm moonə lyentɨ denə dɨ hakəwna, a wule shi nzaa vɨrata? 12Anda imi som ɓa ɗɨm gwadəha dɨ hakəwnə, aa kana hin hina ɗɨm gwahaa pɨrgə hɨnggərən dɨ hakəwna?
Shezə kat ka angɨn, hinaa ɨl asə, hina mbasɨsenə ka shee kat, gə ɓe hinaa kɨɗa ləmə feme da Ma Həmɨnpwa a Yaɓwarən. 13Hwunaa leyə atɨ myee dɨ lyenə Shafe, mingɨn a dɨ ɗɨm sɨzɨmtɨ darən dɨ Shafəngɨn ma, myee mgban dɨ kangadə shee a kɨritə, dɨ vor sɨzɨmtɨ kɨritɨngɨn nə təna dɨ ɗɨmə a zɨma? 14Sə mgban Həmɨmiye a boyə atɨ, myee dɨ woyi hiwa ka ləmə feme da Yesu, mingɨn mgban təna ɗɨm moone darən dɨ haka ləmə feməngɨn.
15Hɨn leyə atɨ taawa ɨl asə ɓətɨ wule a. Hɨn taa dorshinə mgban atɨ gə hwuna vi asə. Ndɨka na mbɨrə ka ite atɨ ama a kəri nggorkonye. 16Hye kana niyə na dɨ hiwa ka ləmə feme da Yesu, angɨn mgban aa sɨ ngguunə, gələ ɓə nzee mbak-mbak na hiwa ka ləmə feməngɨn. Sə oti ke na taa hiwa ka ləmə feməngɨn! 17Anda ka mwoshi na dɨ bwe ləmə feməngɨn, hɨn leyə atɨ hɨne ka moona Həmɨnpwa ɓa mbwe. Anda mgban aa ka mwoshi na dɨ bwe ləmə feməngɨn, hɨn leyə atɨ lyenti mya vi gə na ɗatɨrə, nagi na kwo nagi na mwa. 18Ɓə mɨnə moone de? Moone de nə atɨ gələ na woyo a dɨ hiwa ka ləmə feme da Yesu ɓaa, myaawa mbwe asə gə lyentɨngɨn.
19Nagi a nə sate atɨ hɨnə ka humwatə na ɗa sa na dɨ mwo gəkɨlə hɨn aa hɨnggə ama, kat ka angɨn na mɨndə nəna kɨsa a wakasəwnə kat, gə na ɗɨmə a nggala ɓwaare hananang. 20Səngɨn nə ɗa a haka Yawude na mɨndə na ɓətɨ Yawuda gə na nggala Yawude. A haka ji-koddə ɓashita Musa mgban, na mɨndə na ɓətɨ wule ma dɨ koddə ɓashitɨngɨn (ka sate atɨ hɨn tam dɨ pukə ɓashitɨngɨn) gə na nggala myee dɨ koddə ɓashitɨngɨn. 21Sə mgban a haka myee aa Yawude a wule myee aawa koddə ɓashita Musa, na mɨndə na ɓətɨ tən, ɓətɨ taa ɓashiti a na, gə na nggala myee tam ka ɓashitɨngɨn. (Hɨntɨngə leyə atɨ ɓashita Həmɨnpwa nee a na, na ɓə vədə na gə ɓashita Yesu Ma Həmɨnpwa a Yaɓwarən.) 22A haka wule myee mwadiyale darən aa nyerə, na dɨ mɨndə na taa nyerə, gə na nggala wule mingɨn. Hɨnə ɗəng gəə nagi ndawulasə a waka ɓwaare gə na ɗɨmə a mbədə imi. 23Nagi ndo sə kat na dɨ ɗa, na dɨ ɗa angɨn gə ləmə feməngɨn, gə na gə vor myee ɓa ɗɨm səfema ləmə feməngɨn a dɨ shikan.
24Hwunaa leyə atɨ a vor ji-wozo taɗa, ji-taɗangɨn nə kat dɨ gyeɓi, shezə ɓwaara hiɗə dɨ giɓi taw mbiɗitɨ ɓwaare kat, nda kɨt ne a luu moone? Gə-angɨn hwun mgban ɓərəm gə hwuna ɗɨm hɨnggəwnə moonə.
25Nagi ndo ma a dɨ vwapa ka ɓwaare, nda dɨ kɨt nəngɨn ka sɨsən. Təna dɨ ɗaasə gə təna ɗɨm wule moona aa dɨ ɓongə. Hɨnggəm hɨm ji-kottə hɨm a dɨ ɓərəm gə hɨm a ɗɨməm moona aa diyə mbəə. 26Gə ləngɨn hɨn taawa giɓi wak ɓətɨ taa lee sa na dɨ ɗa, hɨn taa kang ɓəre ɓətɨ wule ma dɨ ɓəri ka hawe ɓaa nə. 27Ə'ə, na dɨ kɨt sɨshi dwat a gərə kɨsati, gə ɓe naa hiwa imi ka ləmə feme, a kpawtə hɨn na ɗongə moonəngɨn.
S'ha seleccionat:
1 Korintiye 9: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.