पारकास 3
3
सारडिस माङ्पाङ् लाउङ्सा खाबोर
1“सारडिस खालाङ्गाङिना माङ्पाङ्ङिना माङ्हाङ् रिङ् काउग्बा लाउङ्सा ना खाबोर छेप्टु॥ ना खाबोरम्बाक् माङ्हाङ्ङाना सि टेप्मा हाङ्सा लोक् सि टेप्मा चोक्चिङ्गेट्चि लिसानाँ माट्टुना ए॥ उन्ङा माट्टुटु, ‘खानि टोॽवा आङा ठाहा टोगुङ्टुङ्॥ याप्मिचिङा खानि उहिङ्ग्वाट् डोक् आवासेट्टि नुङ् मालोडिगा, टरो खानि बिस्वास भोनेउम्टे सियाडाना ए॥’ 2हिट्नाडेउङ् ओछेक्छेक् चोगानि, खानिलोक् लिसाना लाट्टालाबाना बिस्वास बोल्लेउ चोगानुम्, पोङ्भोने आङाना माङ्हाङ्ङा ओनाभाक्ङि काटोॽवाचि खान्ङा पुरो चोक्मा आहिडुन्गेट्टुन्ना नुङ् आङा ठाहा टोगुएसुङे॥ 3हिट्नुङ् पाइले खानिङा जे रिङ् आखेम्सुमुङ् बिस्वास आचोगुमे हिट्ना मिट्टानुम्॥ खानिङा जे रिङ् सिकाँ आलिसिए हिट्ना पालान् चोगानुम्, हिट्नुङ् खानि पापलाम्मा काएल्-काबु लिसानि॥ खानि ओछेक्छेक् आचोगेट्टिन् भोने, आङा चोर गाड्डे डोक् उङ्ङा, हिट्नुङ् आङा खोना बेला खानिङि उङ्ङाना हिट्ना खानिङा ठाहा डोक् आटोक्निम्ना॥#मात्ति २४:४३-४४; लुका १२:३९-४०; पारकास १६:१५
4“टरो आझै हिट्ना सारडिसङि खानि माड्डे इम्टेप्मा बिस्वासिचि माङ्हाङ्ङा ओनाभाक्ङि बिस्वासिलो ओवाहेट्, हिट्नागाँ चिम्मा फुट्टुम्ना टोॽवा ओचोगुन्गेट्टुन्ना॥ हिट्नागा डोक् सेङ्सेङ्ना लोट्लिङ् ओवाडुङ् आङालोक् ओवायुक्, पोङ्भोने हिट्नागा आङालोक् युङ्मा खान्डुचिचि ए॥ 5जुन् याप्मिङा दुस्टा मेट्टुटु, हिट्ना आङा फुट्टुम्बुरि फुट्ना लोट्लिङ् मेट्टुङ्टुङ्॥ हिट्नुङ् हिट्नाङाना उनिङ् खोना बेला चा लाट्नि चोलाङाना छाप्लालाम्मा होट्निङ्ना॥ टरो आङाना पाबा हिट्नुङ् उन्ङाना सोब्बे माङ्हाङ् रिङ् काउग्बाचि सोरि हिट्ना आयाप्मि ए नुङ् लोडुङ्टुङ्॥#पारस्थान ३२:३२-३३; छाम्लोमा छाप्ला ६९:२८; पारकास २०:१२; मात्ति १०:३२; लुका १२:८
6“खानि सोब्बेलोक् खेम्माना नुभेक् युङ्ग्वा, हिट्डेउङ् माङ्हाङ् ओहाङ्साङा खानि माङ्पाङ्ङिगा लाउङ्सा पाक् मालोडिटिगा हिट्ना नुलोक् खेम्सानुम्॥”
फिलाडेल्फिया माङ्पाङ् लाउङ्सा खाबोर
7“फिलाडेल्फिया खालाङ्गाङिना माङ्पाङ्ङिना माङ्हाङ् रिङ् काउग्बा लाउङ्सा ना खाबोर छेप्टु॥ हिट्नुङ् ना खाबोरम्बाक् सेङ्सेङ्ना हिट्नुङ् छेम्बाङाना ए॥ याप्मा बारखा पाइले दाउद हाङ्बाङा सासान् चोगु गाड्डे डोक् उन्लोक् चा सासान् चोक्माना बोल् युङ्ग्वा॥ उन्ङा ढुवारिक् ओङ्सुटु भोने, साङा चा छुप्मा उहिडुन्ना॥ उन्ङा ढुवारिक् छुप्टुटु भोने, खोनाङा चा ओङ्मा उहिडुन्ना॥#यासैया २२:२२; आयुब १२:१४ 8खानिङा आचोगुम्ना टोॽवा आङा लाउङ्सा ठाहा युङ्ग्वा॥ खेम्सानुम्, आङा खानि सोरि ढुवारिक् ओङ्सुएसुङे, हिट्ना ढुवारिक् साङा चा छाक्मा उहिडुन्ना॥ खानिलोक् आङाना सेवा चोक्माना याप्मा बोल् वाइना नुङ् आङा ठाहा टोगुङ्टुङ्, टरो चा खानिङा आरिङ् आखेम्सुम्मे हिट्नुङ् आङि बिस्वास चोक्मा आनानिम्गेट्निम्ना॥
9“हिट्नि खानि माड्डे इम्टेप्मा याहुदिचि सैतानङाना माङ्ध्यान् काचोक्चि ओवाहेट्॥ हिट्नागाँ आन्याँ माङ्हाङ् ओयाप्मिचि नुङ् उपिग्येट्, टरो हिट्नागा माङ्जो उपिग्येट्, पोङ्भोने हिट्ना रिङ् छेम्बाना माखाक्॥ आङा हिट्नागा याप्मिचि खानि सोरि आप्टुङ्चिङ्चिङ्, हिट्नुङ् हिट्नागा खानि स्या मेप्मा मेट्टुङ्चिङ्चिङ् हिट्नुङ् आङा खानि इम्टेप्मा माया चोक्नानिगा नुङ् हिट्नागाँ ठाहा ओटोगुटु॥#यासैया ४९:२३; ६०:१४; ४३:४ 10ना नाराङि उयुङ्गा सोब्बे याप्मिचि जाँच् चोक्मा टाना आड्डिक् ठेना याङ्छामालाम्मा आङा खानि जोगाँ चोक्नाँनि, पोङ्भोने खानिङा याप्मा याङ्छामा आङ्डुमुङ् आङाना आग्याँ पालान् आचोगुएसुम्मे॥ 11आङा नाराङि एला डोक् उङ्साङ्लाबाङे॥ खानिङा आटोगुम्ना खाबोर नुलोक् जोगाँ चोगानुमुङ् युङ्सानुम्, हिट्डेउङ् खानि लाउङ्सा युङ्ग्बालाक् इनाम् आरु खोनाङा चा खाप्मा उहिडुन्ना॥
12“जुन्ङा दुस्टा मेट्टुटु, हिट्ना आङाना माङ्हाङ् ओटोकानाङि मान् चोगुङ्टुङ्॥ हिट्ना सोरोक् हिट्नि लियुयाक्युक् हिट्नुङ् खोना बेला चा होन्निना॥ आङा हिट्नाङि आङाना माङ्हाङ् उनिङ् हिट्नुङ् उन्ङाना खालाङ्गा उनिङ् छेप्टुङ्बिडुङ्टुङ्, हिट्नाम्बाक् आमाङ्हाङ्लाम्मा टोनालोग्लाम् उङ्युगेट्ना ओछोङ्ग्वाट् यरुसलेम ए॥ हिट्नुङ् हिट्नाङि आप्पे आङाना ओछोङ्ग्वाट् आनिङ् चा छेप्टुङ्टुङ्॥#पारकास २१:२; यासैया ६२:२; ६५:१५
13“खानि सोब्बेलोक् खेम्माना नुभेक् युङ्ग्वा, हिट्डेउङ् माङ्हाङ् ओहाङ्साङा खानि माङ्पाङ्ङिगा लाउङ्सा पाक् मालोडिटिगा हिट्ना नुलोक् खेम्सानुम्॥”
लाउडिकिया माङ्पाङ् लाउङ्सा खाबोर
14“लाउडिकियाङाना खालाङ्गाङिना माङ्पाङ्ङिना माङ्हाङ् रिङ् काउग्बा लाउङ्सा ना खाबोर छेप्टु॥ हिट्नुङ् ना खाबोरम्बाक् आमेनङाना ए॥#३:१४ खिरिस्टम्बाक् आमेन् ए, पोङ्भोने माङ्हाङ्ङा चोगुना चामारसिङा सोब्बे उन्ङि पुरो चोगुएसुए॥ उन्ङाना साँचिम्बाक् बिस्वासिलो हिट्नुङ् छेम्बाना ए, हिट्नुङ् उन् माङ्हाङ्ङा चोगुना सोब्बे थोक्ङाना उपुन् ए॥#हितोपोदेस ८:२२
15“खानिङा आचोगुम्ना टोॽवा आङा लाउङ्सा ठाहा युङ्ग्वा॥ खानि चुवा गाड्डे तातो चा माखाक्, चिसो चा माखाक्॥ खानि तातो आथाबा चिसो आलिसिना बे ओचेट्नु लिसे॥ 16पोङ्भोने बिस्वासङि खानि कोनिगेट्निना चुवा#३:१६ हिट्नि इप्पोक् निङ्ला मुक्टाचिगा खालाङ्गा डाचिगा, हिट्निना चुवाम्बाक् तातो लोक् चिसो डाना, हिट्नाम्बाक् लाउडिकिया सोरि डाना॥ हिरोपोलिस खालाङ्गाङिम्बाक् तातो चुवा पुन्डाना डाना, हिट्नि याप्मिचि उटुगागालाम्मा नुमानिङ् लिमा एॽवा लोङा ओखाडागा डागा॥ कालास्सि खालाङ्गाङिना चुवाम्बाक् आड्डिक् चिसो हिट्नुङ् लिम्डाना डाना॥ टरो लाउडिकिया खालाङ्गाङिना चुवाम्बाक् चिसो चा माखाक्, तातो चा माखाक्, खाल्लो डाना॥ खिरिस्टङा माप्मा कोलुना रिङ्उम्बाक् तातो चुवा हिट्नुङ् चिसो चुवाम्बाक् काम लाहाब् लियुक्, टरो हिट्ना खाट्टिटि कोडाना चुवाम्बाक् लाउडिकियाङिगा बिस्वासिचि ए, हिट्नागा बेकामे ओडागा॥ गाड्डेगा ए, तातो चा माखाक्, चिसो चा माखाक्, हिट्डेउङ् आङा खानि आयासिलाम्मा होट्नाडिनाँनि॥ 17हिट्नुङ् खानिङा आप्पेलाउङ्सा वागाठागा, जोम् माक्फेन्सुबेन् युङ्ग्वा हिट्नुङ् पाक्चा चाहाब् लिनिना नुङ् आमाट्टुम्गा॥ टरो माङ्हाङ् ओनाभाक्ङि खानि इम्टेप्मा दुखि, निङ्ग्वा हिम्ना, पाक्चा वानिना, याङ्कानिनिबा, हिट्नुङ् लोट्लिङ् चा मालेगा आवासेट्टि नुङ् खानिङा ठाहा आटोक्निम्ना॥ 18हिड्डेउङ् खानि वागाठागा लिमा लाउङ्सा मिङि खाराँ चोक्बालाक् साम्मेङ् इनानुम् नुङ् साल्लाह पिनाँनि, हिट्नुङ् मोम्मासिमा आलिसिन्लोक् खानि एकिलिपोट् येम् टेप्मा फुट्ना लोट्लिङ् आङालोक् इनानुम्॥ हिट्नुङ् खानि मिक्ङि नेक्मालाउङ्सा आङालाम् सिडा इनानुम् हिट्नुङ् खानिङा आनिसुम्टुम्॥ 19आङा माया चोगुङ्चिङ्गा लाउङ्सा खेमा लाप्टुङ्चिङ्चिङ् हिट्नुङ् साधाँ चोगुङ्चिङ्चिङ्॥ हिट्डेउङ् पापलाम्मा खानि काएल्-काबु लिसानि हिट्नुङ् नुना टोॽवा चोक्मा जागारुक् लिसानि॥#हितोपोदेस ३:१२; हिब्रु १२:६ 20खेम्सानुम्, आङा ढुवारिक्ङि येप्माउङ् निप्टुङ्टुङ्॥ कोइङा आरिङ् खेम्सुङ् ढुवारिक् ओङ्सुटु भोने, आङा भिट्रा लिक्ङा हिट्नुङ् हिट्नालोक् चामा चाङ्टुङ् हिट्नुङ् हिट्नाङा आङालोक् चोटु॥ 21जुन् याप्मिङा दुस्टा मेट्टुटु, हिट्ना आङा युङ्ङाना डेन्ङि आङा सोरि युङ्माना आधिकार पिडुङ्टुङ्, हिट्नुङ् हिट्नाङा आङालोक् सासान् चोगुटु, खोड्डेउङ् आङा चा दुस्टा मेट्टुङेना, हिट्नुङ् हाट्ले आङा आङाना माङ्हाङ् पाबालोक् उन् युङ्ना डेन्ङि युङैसाङे॥
22“खानि सोब्बेलोक् खेम्माना नुभेक् युङ्ग्वा, हिट्डेउङ् माङ्हाङ् ओहाङ्साङा खानि माङ्पाङ्ङिगा लाउङ्सा पाक् मालोडिटिगा हिट्ना नुलोक् खेम्सानुम्॥”
© 2023, Wycliffe Bible Translators, Inc. and Nepal Bible Society