Micah 3
3
De hagaseegina o denga dagi ma denga pelaabisi
1Gai au ne hagadaba:
“Denga biho o Jacob, ma dagi o de gau Israel,
goodou hagalaangona.
E dee se mee heohi doodou hai gi iloo de hagamodu heohi?
2Goodou ni dangada e kino i tanuaa gai e llodo i de baubau;
goodou e bei denga manu e holeholea laa gili o ogu dangada
ma de aau gee kano i olaadeu ivi.
3Goodou e gai kano o ogu dangada
ma de holehole olaadeu gili,
gai e hadihadi olaadeu ivi gi too dagidahi;
goodou e duuduu gilaadeu bei kano manu i lo te anibada,
ma kano e hhao ange laa gi lo te kamaa.”
4Gai gilaadeu e tangi ange naa gi Tagi Maolunga,
aagai ia e dee basa ange naa donu gi gilaadeu.
Ia e huli gee naa i gilaadeu i de masavaa laa,
i hiidinga de baubau alaadeu hegau.
5E hagadaba Tagi Maolunga:
“Dagodo o denga pelaabisi
e hagasengalia laa ogu dangada,
noo dangada e haangai ange gilaadeu, gai gilaadeu ga hagataba,
‘De baba gi dagodo i oo daha;’
noo tangada e dee haangai ange gilaadeu,
gai gilaadeu ga hagadabena e hebagi ange gi de ia.
6Deenei ai, de boo e dae mai naa gi goodou,
gu deai oodou midi hagaago ange e gidee, gai gu gohu,
goodou gu dee maua i de tala mee e loomai.
Denga pelaabisi e dee gidee naa de laa,
gai de laangi e hai naa ga gohu ange gi gilaadeu.
7Gai gilaadeu e daalaa mee e loomai e dookaa naa,
de gau hai huuhuaa mee e hagangadi mee ina naa.
Gilaadeu alodahi e dookaa naa ga haoli olaadeu mada,#3.7 olaadeu mada, aabe olaadeu ngudu.
go hiidinga de Maadua gu dee basa ange gi gilaadeu.”
8Aagai ogu dagodo, au gu hhao ma gu honu i de mmahi
ma de Hagasaalunga o Tagi Maolunga,
ma de hagamodu heohi, aama de mmahi,
e tala ange ai gi Jacob ono haisala,
ma de tala ange gi Israel ono baubau.
9Goodou dagi o dangada o Jacob,
goodou dagi o de gau Israel,
nnoho mai hagalaangona.
Goodou e kino i de hagamodu muna heohi,
gai e hagahaisala mee heohi alodahi.
10Goodou ne hagaduu Zion i dodo o dangada,
gai ne hagaduu Jerusalem i de baubau.
11Dagi o Jerusalem e hagamodu muna
e kave ai denga ngadi gaavange hagasenga,
de gau haimeedabu e agoago e kave ai dahi hagaoanga,
gai denga pelaabisi e tala mee tigi loomai e kave ai denga sseene.
Aagai gilaadeu e hagataba bolo delaadeu tali go Tagi Maolunga,
“E aha, Tagi Maolunga e dee noho nei i odaadeu daha?
E deai naa donu se hai ngadaa e baa i gidaadeu.”
12Deenei ai, Zion e hagabalabala ina naa
bei de veelenga i oodou hiidinga.
Jerusalem e bei naa dahi hagabuudungaa mee maoha,
gai tuuduu iai laa de temple e hai naa ga se lodo mee muimui.#Jer 26.18
© 2022, Wycliffe Bible Translators, Inc. All rights reserved.