Micah 2
2
E vakaa naa dangada e vaivai haia de gau hagaau aloha
1E vakaa naa dangada e hagatau ina de hai de baubau,
ma gilaadeu e haia denga hagasaele baubau i honga olaadeu moenga!
Gilaadeu e oho age i de gohugohu ga hai hegau nei,
i hiidinga gilaadeu e maua i de hai mee nei.
2Gilaadeu e nnoo ange ma de hai gi de mahi denga alahenua,
ma denga hale, ma de kave mee nei.
Gilaadeu e vaivai hai tangada ma dono huaabodu,
aama de boolonga o dono dangada.
3Deenei ai, e hagadaba Tagi Maolunga:
“Tilo, au e hagaduasala naa de aamuli e haia hegau nei,
gai goodou e dee maua naa donu i de hagaola goodou.
Goodou e dee maua naa hogi i de seesee hagamaolunga saele,
go hiidinga go de masavaa o de hai ngadaa.
4De laangi laa gai dangada e hagadogaa naa i goodou;
gilaadeu e hagammae manava naa goodou i dahi daahili,
ga hai adu, ‘Gu vakaa loo gimaadeu;
de henua o ogu dangada gu vaevae ma gu kave gee.
Ia gu kave gee mee nei mai i de au!
Ia gu gaavange omaadeu gelegele gi dangada ne hagadee kii ina gimaadeu.’ ”
5Deenei ai, e deai naa donu se dangada i hagabuulinga o Tagi Maolunga
e vaaea adu dahi gelegele moodou
i de masavaa e dada ai denga laagau.
Denga pelaabisi hadu muna
6Olaadeu pelaabisi e hagataba,
“Goodou aude pasa pelaabisi;
goodou aude pasa pelaabisi i denga mee nei;
gimaadeu e dee hagangadi mee ina naa donu.”
7Dangada o Jacob, e heohi taadeu hagataba,
“E aha, de Hagasaalunga o Tagi Maolunga gu dee maua i de golomagi ono lodo?
Gai aanei ana hegau e hai?”
E aha, agu muna e dee hai ange laa tanuaa
gi tangada e hai hegau i de heohi?
8Iainei gai ogu dangada gu hai baasi mai;
gilaadeu gu bei de hagadaumee.
Goodou gu hagaui malo mahamaha
o dangada e duadonu ma e hulo saele ai,
bei denga daane gu aahe mai i de hebagi.
9Goodou e alualu denga haahine o ogu dangada
mai i olaadeu hale danuaa.
Goodou gu kave gee agu manuuia
mai i daho alaadeu dama ga hano ai.
10Hiihidi age hulo gee mai i kinei!
De mommee nei e dee se mommee e hagammabu ai goe,
go hiidinga gu hakino gee,
gai gu maoha, gu odi donu i de maoha.#2.10 go hiidinga … i de maoha: muna Hebrew i kinei e dee iloo danuaa dono hagadoonunga.
11Noo tangada hadu muna ma de daahanga dangada e hai adu,
“Au e tala pelaabisi bolo koe e lagolago naa au uvaini ma mee mmahi,”
gai ia e hai naa go delaadeu dangada agoago.
De hagaola gu hagatoo donu laa
12Jacob, au e hagabuni mai naa oo dangada.
Au e hagabuni mai naa de gau Israel e doe.
Au e hagabuni mai naa gilaadeu bei denga ssiibi i lo te buibui,
ma de hagabuulingaa ssiibi i de mommee iai helii;
gai de henua e soa naa dangada e nnoho ai.
13Gai de ia e hagamalaelae ina de haiava e hano naa i olaadeu mada i mua;
gai gilaadeu e oha naa de haitoga ga ssao ai ga hulo.
Delaadeu hodooligi e hano naa i olaadeu mada i mua,
gai go Tagi Maolunga donu delaadeu dagi.
© 2022, Wycliffe Bible Translators, Inc. All rights reserved.