Isaiah 44
44
Tagi Maolunga gu hili Israel
1“Aagai koe, Jacob, dogu dangada hai hegau, hagalaangona,
ma Israel, de ia aagu gu hili.
2E hagadaba Tagi Maolunga,
go de ia ne haia goe, ma de hagaholi goe i de mommee o denga dama,
gai go de ia ne balea adu goe:
Aude madagu, Jacob, dogu dangada hai hegau;
Jeshurun,#44.2 Jeshurun go dahi ingoo o Israel. de mommee aagu ne hili.
3Au e llingi ange naa denga vai gi honga de henua e deai vai iai,
ma de hai gi hanu saalingaa vai i honga de gelegele mmasa;
au e gave iho naa dogu Hagasaalunga gi honga doo hagadiilinga,
ma de hagamanuuia oo aamuli.
4Gai gilaadeu e ssomo naa i magavaa o helii,
ma denga willow e ssomo laa i gaogao denga saalingaa vai.
5Dahi e hagadaba naa, ‘Au se dangada niio Tagi Maolunga,’
gai dahi e kave naa de ingoo go Jacob;
gai tangada ange laa e sisi ange naa gi honga dono lima, ‘Nii Tagi Maolunga’,
ma de kave de ingoo go Israel.”
6E hagadaba Tagi Maolunga,
de hodooligi o Israel, ma dono Ia Hagaola,
go Tagi o denga hagabuulinga hebagi:
“Go au taamada gai go au de hagaodi,
e deai ange donu se maadua, go au donu huu.#Isa 48.12; Rev 1.17; 22.13
7Goai e bei ogu dagodo? Gai ia gi hagailoo ina.
Ia gi daalaa ma de hagaagona mai gi de au
be ni aha ne hai i mua dagu hai denga huaadangada madagidagi,
gai aahee mee tigi loomai;
gilaadeu gi daalaa mee e loomai.
8Goodou aude bolebole, goodou aude maatagu.
E aha, tee hagailoo ina e au ma de tala mee nei madagidagi loo?
Go goodou ogu dangada hagadonu.
E aha, e dahi ange maadua bei au?
E deai, e deai ange donu se Baba mmahi;
au e dee iloo bolo e dahi ange.”
Teai haigamaiana o denga diinonga
9Alodahi e haia denga diinonga ni ngadi mee,
gai alaadeu mee hagamogomogo e deai donu mee e kii ange ai.
Dangada e daalaa hagadonu olaadeu dagodo e dee kide,
ma de ssenga — gilaadeu e hagadookaa ina naa.
10Goai e hagahua ina dahi diinonga ma de hagadagodo ina dahi diinonga baalanga,
e deai laa ono haigamaiana?
11Tilo, ono soa alodahi e dookaa naa,
gai denga labagau alodahi ni dangada donu huu.
Gilaadeu alodahi gi hagabuni, gilaadeu gi tuu age;
gai gilaadeu alodahi e maatagu naa ma de dookaa.
12De labagau o denga baalanga e kave dahi goloa baalanga;
ga dugu ange gi lo te ahi e hholu ai;
gai ia ga hagahua ai dahi diinonga i denga haamaa,
i dana dugidugi i dono lima.
Ia e hano ga saalohia gu deai ono mahi;
gai e ssili ono mada i dana dee unu vai.
13De labagau e haide i dahi uga
ma de maaga i de mee maaga;
gai ia ga salu de laagau laa i denga mee salu
ma de maaga i denga compass.
Ia e hagahua gi bei hoolinga o tangada,
ga hai gi mahamaha bei tangada,
gi maua ai i de hagaduu i lo te hale.
14Ia e sele iho denga cedar,
be ia e hili dahi cypress aabe se oak.
Gai ia ga dugu gi somo gi madua i magavaa o denga manu i lodo mee muimui,
aabe ia e doo dahi pine gai de langi ga hagamaluulu.
15Gai ono laagau e hai ai ahi a dangada;
ia e kave hanu ga hai ai de ahi e hagamahanahana ai ia,
gai hanu e dao ai ana gai.
Aagai hanu e hai ai dahi diinonga e daumaha ange ai ia;
ia e hai dahi diinonga ga ino ange aagena.
16Ia e hai de ahi i dahi luu baasi o laagau laa e dunu ai ana gai,
ia e lala ana giidagi i de ahi e gaimee ai ia gi bosu.
Ia e hagamahanahana ia i de ahi, ga hagadaba,
“Au gu mahanahana danuaa; au gu gidee de ahi.”
17Gai ia e hai dahi diinonga i laagau e doe, e hai ai dono maadua;
gai ia e duuduli ange ma de daumaha ange aagena.
Ia e dalodalo ange, ga hai ange,
“Hagaola ina mai au, go koe donu dogu maadua.”
18Gilaadeu e haia mee nei e dee tonu ange;
gai de Maadua gu pono olaadeu ganomada, gi dee gidee ai e gilaadeu,
gai alaadeu maanadu gu pono hogi, gi dee tonu ange ai gilaadeu.
19Gai e deai donu se gilaadeu e noho ga hagasaelea mee nei,
e deai hogi e dahi ono iloo mee aabe e donu ange ga hagadaba,
“Au e hai de ahi i dahi luu baasi o laagau nei;
au e dao hogi agu pelaoaa i ono maga ahi,
ma de hulihuli ai agu giidagi e gaimee ai.
Gai au ga hai ai nei hogi dahi diinonga hakino gee i laagau e doe?
E aha, au ga ino ange nei hogi e daumaha ange gi dahi bido laagau?”
20Ia gu gai donu denga lehu, gai ono lodo gu hagasenga ia;
ia gu dee maua i de hagaola ia, aabe hagadaba,
“E aha, e dee se mee hhadu aagu e poo nei i dogu lima madau?”
Tagi Maolunga de Maadua abodonu
21Jacob, manadua mee nei,
Israel, go koe dogu dangada hai hegau.
Go au ne haia goe, go koe dogu dangada hai hegau;
Israel, au e dee ngalo donu goe.
22Au gu ili gi hulo oo haisala bei dahi giliiga,
ma de hai oo haisala gi bei de mama o denga vai.
Ahe mai gi de au,
go hiidinga au gu hagaola goe.
23De langi, hevaalogi daahili i de malangilangi,
i hiidinga go Tagi Maolunga ne haia de mee nei!
Denga mommee i lalo de henua, goodou hevaalogi.
Denga mounga, hevaalogi i taahili,
de lodo henua, ma manu alodahi e ssomo ai,
go hiidinga Tagi Maolunga gu hagaola Jacob,
ia gu hagaago mai dono mahamaha i Israel.
24E hagadaba Tagi Maolunga, doo Ia Hagaola,
ne haia goe i de mommee o denga dama:
“Go au donu Tagi Maolunga,
ne haia laa mee alodahi,
go au ne hoolaa de langi,
go au donu huu ne doohaa henua i lalo.
25Gai go au e haia gi dee ssula hagailonga a denga pelaabisi hadu muna,
ma de hai de gau e daalaa mee loomai gi bei de gau llodo ssenga,
ma de hai gi dee ssula muna a de gau heiangi,
aama de hai olaadeu iloo mee gi deai haigamaiana;#1 Co 1.20
26go au e hagassula ina muna a ogu dangada hai hegau,
aama de hagassula muna pelaabisi a ogu dangada hagailoo.
Au e hagadaba i dagodo o Jerusalem,
‘Dangada e aahe ange naa ga nnoho ai,’
ma de hagadaba i dagodo o aduhale o Judah,
‘Denga aduhale e hagatuu age ange naa,
gai au e hagaahe age naa mommee gu maoha laa.’
27Gai au e hai ange gi de moana gelo, ‘Koe gi masa,
gai au e hai naa gi maamasa denga saalingaa vai.’
28Go au ne hagadaba i dagodo o Cyrus, ‘Go ia dagu dangada hagaloosi,
gai ia e hagassula naa mee alodahi oogu e lodo ai;
ia e hagadaba naa i Jerusalem, “Hagaduulia age ange,”
ma de hagadaba i de temple, “Hagadaakodo ina ono dagelo.” ’ #2 Ch 36.23; Ezra 1.2
© 2022, Wycliffe Bible Translators, Inc. All rights reserved.