Hechos 12
12
Ko je̱'e̱ Santiago y'o'ky y ko je̱'e̱ Pedro yajtzuumy
1Mu̶'it tiempo je̱'e̱ ane̱'e̱mbu̶ Herodes yaj'u̶xwu̶dijt yajpawu̶dijttu̶gu̶u̶yu̶ nije̱' je̱'e̱ Jesús jya'ay. 2Chi je̱'e̱ ane̱'e̱mu̶ñ yejky ko je̱'e̱ Santiago wan yaj'o'ogyii pujxk espaadu̶'aam, je̱'e̱ Juan pyuya'ay, 3y ko du'un ijxy ko je̱'e̱ judío ja'ay oy du'un ku'umaaygyu̶xy, chi je̱'e̱ Pedro nandu'un yajmajtzu̶. Je̱' adaa du'un tyuunu̶ jyajtu̶ xu̶u̶jooty, je̱'e̱ xu̶u̶ mu̶naa je̱'e̱ tzajkaagy kaaygyu̶xyu̶ñ mu̶dyiibu̶ ka'p lyevaduru̶ mu̶u̶du̶chu̶ñ. 4Ko je̱'e̱ Pedro yajmajtzu̶, chi pujxtu̶gooty yajpu̶daaku̶, chi je̱'e̱ Herodes ane̱'e̱mu̶ñ yejky ko je̱'e̱ tziptuumbu̶ wan mu̶daaxpú̶ky kweentu̶'adyii, mu̶daaxjáty najty je̱'e̱ tziptuumbu̶ tu'kpu̶kyjyátypyu̶ ajku̶xy. Du'un najty tu̶ wyinmay ko Pascua xu̶u̶náxyñu̶ tu̶ydyuna'añ mayjya'ayjyooty. 5Pedro jiiby pujxtu̶gooty najty je̱'e̱ mu̶k yajkweentu̶'áty, peru̶ je̱'e̱ mu̶bu̶jkpu̶du̶jk janch Dios mu̶bu̶jktzo'adu̶u̶tzku̶xp je̱'e̱ najty mu̶u̶d je̱'e̱ Pedro kyu̶xpu̶.
Dios y'ángel jiiby pujxtu̶gooty yajpu̶dzú̶my je̱'e̱ Pedro
6Je̱'e̱ mu̶'it koodz ka'anu̶ najty xyu̶u̶mu̶'u̶y, je̱'e̱ kujaboom mu̶naa je̱'e̱ Herodes je̱'e̱ Pedro najty tu̶ydyuna'añ mayjya'ayjyooty. Pedro maab je̱'e̱ najty kuwu̶u̶ñ mu̶u̶d je̱'e̱ cadeenu̶ me̱tzk ma je̱'e̱ tziptuumbu̶tu̶jk nime̱tzk ajku̶xyu̶ñ, y je̱'e̱ ja'adu'kpú̶kypyu̶ tziptuumbu̶tu̶jk pujxtu̶jk'aguuy najty je̱'e̱ kyweentu̶'ajtku̶xy, 7chi janch amoñygyu̶joot je̱'e̱ Windzú̶n Dios y'ángel tu'ug ñayyajni'igu̶xu̶'ku̶, y yaj'anu̶ydyaay je̱'e̱ pujxtu̶jk. Chi je̱'e̱ ángel Pedro tijyu'kxy ma je̱'e̱ kyachu̶ñ, yajma'aybyu̶du̶'ky, y nu̶maay: “¡Pu̶du̶'u̶g mu̶k'eemby!” Y chi je̱'e̱ cadeenu̶ mu̶k'eemby kya'adaay ma je̱'e̱ Pedro kyu̶'u̶ju̶ñ. 8Y chi je̱'e̱ ángel ñu̶maayu̶: “Yajtu̶gu̶'u̶ yu̶'u̶ mwit y yajtu̶gu̶'u̶ yu̶'u̶ mgu̶'u̶g.” Ko je̱'e̱ Pedro kyu̶'u̶g yajtu̶gu̶u̶ydyaay, y chi je̱'e̱ ángel jyaktimyñu̶maayu̶: “Yajtu̶gu̶'u̶ yu̶'u̶ mni'ijé̱n y pajaamgu̶ch.”
9Chi je̱'e̱ Pedro pyujxtu̶jkpu̶dzu̶u̶my u̶x'aam, jayu̶jp je̱'e̱ ángel ñu̶kxy, y ni ka'anejwu̶'u̶y pu̶nu̶ jaanch je̱'e̱ du'un mu̶dyiibu̶ je̱'e̱ ángel najty tyuumbyu̶ñ; kumaab ndijy najty je̱'e̱ du'un. 10Chi ñajxku̶xy ma je̱'e̱ mu̶du'kpú̶kypyu̶ kweentu̶'ajtpu̶ ajku̶xyu̶ñ, y chi jyaknú̶kxku̶xy oy je̱'e̱ mu̶me̱jtzpú̶kypyu̶ paatku̶xy. Y ko oy jya'tku̶xy ma je̱'e̱ mu̶jpujxtu̶jk'aaju̶ñ, je̱'e̱ mu̶jtu'uba'abu̶, chi je̱'e̱ mu̶jpujxtu̶jk'aa ku̶'u̶m y'awaach. Chi pyu̶dzu̶u̶mgu̶xy, y tu̶ najty tu'ug tyu'uni'inajxku̶xy ko je̱'e̱ Pedro je̱'e̱ ángel oy pyuyo'oydyuuttu̶nu̶.
11Mu̶'it je̱'e̱ Pedro wyinma'añ myiiñ myejch, chi myu̶naañ: “Jada'achám nejwu̶u̶ybyu̶ch ko jaanch adaa du'un ko je̱'e̱ Windzú̶n Dios y'ángel tu̶ kexy neby u̶u̶ch xyñiwa'anu̶chu̶ñ ma je̱'e̱ Heródesu̶ñ y ku̶xyu̶ neby u̶u̶ch je̱'e̱ judío ja'ay najty xytyuna'añu̶ñ ajku̶xy.”
12Ko je̱'e̱ Pedro jyoot wyinma'añ myiiñ myejch, chi ñu̶kxy ma je̱'e̱ María tyu̶jku̶ñ, je̱'e̱ Juan tyaj, je̱'e̱ mu̶dyiibu̶ nandu'un yajtijpu̶ñ Marcos, ma najty je̱'e̱ mayjya'ay tu̶ ñaymyujku̶gu̶xy Dios mu̶bu̶jktzoobu̶. 13Chi je̱'e̱ tu̶jk'agu̶'u̶ kojxnojky, je̱'e̱ tu'uba'abu̶, chi to'oxy'ana'k tu'ug pyu̶dzu̶u̶my mu̶dyiibu̶ xu̶u̶'ajtpu̶ñ Rode, ok'ixa'añ pu̶n je̱'e̱ tu̶jk'agu̶'u̶ najty kojxnojkpu̶ñ. 14Ko je̱'e̱ Pedro yo'kmu̶dooy, y ka'p je̱'e̱ tu̶jk yaj'awaach, mu̶'it po'oyu̶'u̶gyu̶ ñu̶kxy tu̶gooty xoonu̶p ijtu̶p oy nigapxy ko je̱'e̱ Pedro najty jiiby tu̶ba'ay. 15Chi je̱'e̱ Rode mayjya'ay ñu̶maayu̶:
—¡Mlooku̶ju̶u̶by miich da'a!
Peru̶ je̱' mu̶naan'adu̶u̶tzp najty je̱' ko jaanch jye̱'e̱ju̶ch. Y je̱'e̱ ja'ay mu̶naan'adu̶u̶tzku̶xpu̶py:
—Ka'p yu̶'u̶ jye̱'e̱ju̶ch, je̱'e̱ y'aanu̶mu̶ yu̶'u̶ da'a.
16Cham je̱'e̱ Pedro tu̶jk'agu̶'u̶ najty janch kojx'adu̶'u̶ch. Y ko yaj'awaatzku̶xy y ijxku̶xy, chi mu̶k jyanchtzu̶gu̶u̶ygyu̶xy. 17Peru̶ chi je̱'e̱ kyu̶'u̶ yaj'ijxu̶ ajku̶xy ko wan amoongu̶xy, y chi yajmu̶dmu̶dyaaku̶gu̶xy neby je̱'e̱ Windzú̶n Dios najty pujxtu̶gooty tu̶ yajpu̶dzu̶myiiju̶ñ. Y chi jyakmu̶naañ:
—Nu̶kx adaa du'un yajmu̶dmu̶dyaakku̶x je̱'e̱ Santiago y mu̶u̶d je̱'e̱ mu̶bu̶jkpu̶du̶jk ajku̶xy.
Chi choñ y ñu̶kxy ma je̱'e̱ wiingpu̶ kajptu̶ñ.
18Ko xyu̶u̶mu̶u̶y jyobu̶u̶y, mu̶'it je̱'e̱ tziptuumbu̶tu̶jk yaaxtu̶gu̶u̶y jyojktu̶gu̶u̶ygyu̶xy wyinmaay'awu̶dijtku̶xy, je̱' ko ka'p najty nejwu̶u̶ygyu̶xy tii tu̶ tyuñ tu̶ jyadyii mu̶u̶d je̱'e̱ Pedro. 19Chi je̱'e̱ Herodes ane̱'e̱mu̶ñ yejky ko je̱'e̱ Pedro wan nu̶kxy yaj'u̶xta'ay, y ko kya'ayajpaaty, chi je̱'e̱ tziptuumbu̶tu̶jk yajmu̶gubejty ajku̶xy mu̶dyiibu̶ je̱'e̱ Pedro najty tu̶ kyweentu̶'adyiiju̶ñ; yejky je̱'e̱ ane̱'e̱mu̶ñ ko wan nu̶kxy yaj'o'ogyii ajku̶xy. Ko najty adaa du'un tu̶ y'oktúñ y'okjadyii, mu̶'it je̱'e̱ Herodes jim Judea choñ y oy jim Cesarea chu̶naaydyaakpú̶ky.
Herodes y'o'ky
20Herodes jyanchmu̶jootma'typy najty je̱'e̱ ja'ay mu̶dyiibu̶ najty jim Tiro y Sidón tzu̶naaygyu̶xpu̶ñ. Chi je̱'e̱ tiro ja'ay y sidón ja'ay ñaygyápxu̶gu̶xy neby je̱'e̱ Herodes mu̶baad winguwa'agu̶u̶ygyu̶xyu̶ñ. Y myu̶madaakku̶x ko je̱'e̱ Blasto meeñymyooygyu̶xy, je̱'e̱ ane̱'e̱mbu̶ Herodes myu̶jtuungmu̶u̶dpu̶, y chi mu̶ju̶u̶ydyaak mu̶nukxtaakku̶xy ko je̱'e̱ tzip ma'ad wan ku̶jxnu̶ najxnu̶, je̱' ko je̱'e̱ tiro ja'ay y je̱'e̱ sidón ja'ay je̱'e̱ xu̶jk mook najty jim yajtzóngu̶xy ma je̱'e̱ mu̶j'ane̱'e̱mbu̶ ñaaxjootyu̶ñ. 21Chi je̱'e̱ Herodes xu̶u̶ tzuu agapxy mu̶naa najty je̱'e̱ ja'ay mu̶dkapx mu̶dmu̶dya'agaangu̶xy, chi je̱'e̱ mu̶j'ane̱'e̱mbu̶ wit yajtu̶gu̶u̶y, y ñaxwech ma je̱'e̱ y'u̶ñaydyaaktu̶ñ, chi je̱'e̱ mayjya'ay mu̶dmu̶dyaaktu̶gu̶u̶y. 22Mu̶'it je̱'e̱ mayjya'ay mu̶k yaaxtu̶gu̶u̶y jyojktu̶gu̶u̶ygyu̶xy, y myu̶naangu̶xy: “¡Adaa ja'ay mu̶dyiibu̶ yam kapxpu̶ñ, ka'p yu̶'u̶ jya'ayu̶ch, dios yu̶'u̶!” 23Y timymyu̶'ityu̶ je̱'e̱ Windzú̶n Dios y'ángel je̱'e̱ Herodes yajpa'ambejty, je̱' ko ka'p najty je̱'e̱ Dios tu̶ ku'umáy tu̶ windzu̶gu̶'u̶y. Y chi tyu̶u̶ngku'udzu'tzu̶.
24Je̱'e̱ Windzú̶n Dios y'ayuuk tyu̶y'ajt mayu̶y'adu̶u̶tzp najty je̱' y yajkapxwa'kx'adu̶u̶tzp najty ma je̱'e̱ naax kajpt kú̶xyu̶ju̶ñ.
25Ko je̱'e̱ Bernabé mu̶u̶d je̱'e̱ Saulo tyuung yajmaaygyu̶xy jim Jerusalén, mu̶'it jim chóngu̶xnu̶ y mu̶dnú̶kxku̶xy je̱'e̱ Juan jim Antioquía, je̱'e̱ mu̶dyiibu̶ nandu'un yajtijpu̶ñ Marcos.
S'ha seleccionat:
Hechos 12: MIXE
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
Hechos 12
12
Ko je̱'e̱ Santiago y'o'ky y ko je̱'e̱ Pedro yajtzuumy
1Mu̶'it tiempo je̱'e̱ ane̱'e̱mbu̶ Herodes yaj'u̶xwu̶dijt yajpawu̶dijttu̶gu̶u̶yu̶ nije̱' je̱'e̱ Jesús jya'ay. 2Chi je̱'e̱ ane̱'e̱mu̶ñ yejky ko je̱'e̱ Santiago wan yaj'o'ogyii pujxk espaadu̶'aam, je̱'e̱ Juan pyuya'ay, 3y ko du'un ijxy ko je̱'e̱ judío ja'ay oy du'un ku'umaaygyu̶xy, chi je̱'e̱ Pedro nandu'un yajmajtzu̶. Je̱' adaa du'un tyuunu̶ jyajtu̶ xu̶u̶jooty, je̱'e̱ xu̶u̶ mu̶naa je̱'e̱ tzajkaagy kaaygyu̶xyu̶ñ mu̶dyiibu̶ ka'p lyevaduru̶ mu̶u̶du̶chu̶ñ. 4Ko je̱'e̱ Pedro yajmajtzu̶, chi pujxtu̶gooty yajpu̶daaku̶, chi je̱'e̱ Herodes ane̱'e̱mu̶ñ yejky ko je̱'e̱ tziptuumbu̶ wan mu̶daaxpú̶ky kweentu̶'adyii, mu̶daaxjáty najty je̱'e̱ tziptuumbu̶ tu'kpu̶kyjyátypyu̶ ajku̶xy. Du'un najty tu̶ wyinmay ko Pascua xu̶u̶náxyñu̶ tu̶ydyuna'añ mayjya'ayjyooty. 5Pedro jiiby pujxtu̶gooty najty je̱'e̱ mu̶k yajkweentu̶'áty, peru̶ je̱'e̱ mu̶bu̶jkpu̶du̶jk janch Dios mu̶bu̶jktzo'adu̶u̶tzku̶xp je̱'e̱ najty mu̶u̶d je̱'e̱ Pedro kyu̶xpu̶.
Dios y'ángel jiiby pujxtu̶gooty yajpu̶dzú̶my je̱'e̱ Pedro
6Je̱'e̱ mu̶'it koodz ka'anu̶ najty xyu̶u̶mu̶'u̶y, je̱'e̱ kujaboom mu̶naa je̱'e̱ Herodes je̱'e̱ Pedro najty tu̶ydyuna'añ mayjya'ayjyooty. Pedro maab je̱'e̱ najty kuwu̶u̶ñ mu̶u̶d je̱'e̱ cadeenu̶ me̱tzk ma je̱'e̱ tziptuumbu̶tu̶jk nime̱tzk ajku̶xyu̶ñ, y je̱'e̱ ja'adu'kpú̶kypyu̶ tziptuumbu̶tu̶jk pujxtu̶jk'aguuy najty je̱'e̱ kyweentu̶'ajtku̶xy, 7chi janch amoñygyu̶joot je̱'e̱ Windzú̶n Dios y'ángel tu'ug ñayyajni'igu̶xu̶'ku̶, y yaj'anu̶ydyaay je̱'e̱ pujxtu̶jk. Chi je̱'e̱ ángel Pedro tijyu'kxy ma je̱'e̱ kyachu̶ñ, yajma'aybyu̶du̶'ky, y nu̶maay: “¡Pu̶du̶'u̶g mu̶k'eemby!” Y chi je̱'e̱ cadeenu̶ mu̶k'eemby kya'adaay ma je̱'e̱ Pedro kyu̶'u̶ju̶ñ. 8Y chi je̱'e̱ ángel ñu̶maayu̶: “Yajtu̶gu̶'u̶ yu̶'u̶ mwit y yajtu̶gu̶'u̶ yu̶'u̶ mgu̶'u̶g.” Ko je̱'e̱ Pedro kyu̶'u̶g yajtu̶gu̶u̶ydyaay, y chi je̱'e̱ ángel jyaktimyñu̶maayu̶: “Yajtu̶gu̶'u̶ yu̶'u̶ mni'ijé̱n y pajaamgu̶ch.”
9Chi je̱'e̱ Pedro pyujxtu̶jkpu̶dzu̶u̶my u̶x'aam, jayu̶jp je̱'e̱ ángel ñu̶kxy, y ni ka'anejwu̶'u̶y pu̶nu̶ jaanch je̱'e̱ du'un mu̶dyiibu̶ je̱'e̱ ángel najty tyuumbyu̶ñ; kumaab ndijy najty je̱'e̱ du'un. 10Chi ñajxku̶xy ma je̱'e̱ mu̶du'kpú̶kypyu̶ kweentu̶'ajtpu̶ ajku̶xyu̶ñ, y chi jyaknú̶kxku̶xy oy je̱'e̱ mu̶me̱jtzpú̶kypyu̶ paatku̶xy. Y ko oy jya'tku̶xy ma je̱'e̱ mu̶jpujxtu̶jk'aaju̶ñ, je̱'e̱ mu̶jtu'uba'abu̶, chi je̱'e̱ mu̶jpujxtu̶jk'aa ku̶'u̶m y'awaach. Chi pyu̶dzu̶u̶mgu̶xy, y tu̶ najty tu'ug tyu'uni'inajxku̶xy ko je̱'e̱ Pedro je̱'e̱ ángel oy pyuyo'oydyuuttu̶nu̶.
11Mu̶'it je̱'e̱ Pedro wyinma'añ myiiñ myejch, chi myu̶naañ: “Jada'achám nejwu̶u̶ybyu̶ch ko jaanch adaa du'un ko je̱'e̱ Windzú̶n Dios y'ángel tu̶ kexy neby u̶u̶ch xyñiwa'anu̶chu̶ñ ma je̱'e̱ Heródesu̶ñ y ku̶xyu̶ neby u̶u̶ch je̱'e̱ judío ja'ay najty xytyuna'añu̶ñ ajku̶xy.”
12Ko je̱'e̱ Pedro jyoot wyinma'añ myiiñ myejch, chi ñu̶kxy ma je̱'e̱ María tyu̶jku̶ñ, je̱'e̱ Juan tyaj, je̱'e̱ mu̶dyiibu̶ nandu'un yajtijpu̶ñ Marcos, ma najty je̱'e̱ mayjya'ay tu̶ ñaymyujku̶gu̶xy Dios mu̶bu̶jktzoobu̶. 13Chi je̱'e̱ tu̶jk'agu̶'u̶ kojxnojky, je̱'e̱ tu'uba'abu̶, chi to'oxy'ana'k tu'ug pyu̶dzu̶u̶my mu̶dyiibu̶ xu̶u̶'ajtpu̶ñ Rode, ok'ixa'añ pu̶n je̱'e̱ tu̶jk'agu̶'u̶ najty kojxnojkpu̶ñ. 14Ko je̱'e̱ Pedro yo'kmu̶dooy, y ka'p je̱'e̱ tu̶jk yaj'awaach, mu̶'it po'oyu̶'u̶gyu̶ ñu̶kxy tu̶gooty xoonu̶p ijtu̶p oy nigapxy ko je̱'e̱ Pedro najty jiiby tu̶ba'ay. 15Chi je̱'e̱ Rode mayjya'ay ñu̶maayu̶:
—¡Mlooku̶ju̶u̶by miich da'a!
Peru̶ je̱' mu̶naan'adu̶u̶tzp najty je̱' ko jaanch jye̱'e̱ju̶ch. Y je̱'e̱ ja'ay mu̶naan'adu̶u̶tzku̶xpu̶py:
—Ka'p yu̶'u̶ jye̱'e̱ju̶ch, je̱'e̱ y'aanu̶mu̶ yu̶'u̶ da'a.
16Cham je̱'e̱ Pedro tu̶jk'agu̶'u̶ najty janch kojx'adu̶'u̶ch. Y ko yaj'awaatzku̶xy y ijxku̶xy, chi mu̶k jyanchtzu̶gu̶u̶ygyu̶xy. 17Peru̶ chi je̱'e̱ kyu̶'u̶ yaj'ijxu̶ ajku̶xy ko wan amoongu̶xy, y chi yajmu̶dmu̶dyaaku̶gu̶xy neby je̱'e̱ Windzú̶n Dios najty pujxtu̶gooty tu̶ yajpu̶dzu̶myiiju̶ñ. Y chi jyakmu̶naañ:
—Nu̶kx adaa du'un yajmu̶dmu̶dyaakku̶x je̱'e̱ Santiago y mu̶u̶d je̱'e̱ mu̶bu̶jkpu̶du̶jk ajku̶xy.
Chi choñ y ñu̶kxy ma je̱'e̱ wiingpu̶ kajptu̶ñ.
18Ko xyu̶u̶mu̶u̶y jyobu̶u̶y, mu̶'it je̱'e̱ tziptuumbu̶tu̶jk yaaxtu̶gu̶u̶y jyojktu̶gu̶u̶ygyu̶xy wyinmaay'awu̶dijtku̶xy, je̱' ko ka'p najty nejwu̶u̶ygyu̶xy tii tu̶ tyuñ tu̶ jyadyii mu̶u̶d je̱'e̱ Pedro. 19Chi je̱'e̱ Herodes ane̱'e̱mu̶ñ yejky ko je̱'e̱ Pedro wan nu̶kxy yaj'u̶xta'ay, y ko kya'ayajpaaty, chi je̱'e̱ tziptuumbu̶tu̶jk yajmu̶gubejty ajku̶xy mu̶dyiibu̶ je̱'e̱ Pedro najty tu̶ kyweentu̶'adyiiju̶ñ; yejky je̱'e̱ ane̱'e̱mu̶ñ ko wan nu̶kxy yaj'o'ogyii ajku̶xy. Ko najty adaa du'un tu̶ y'oktúñ y'okjadyii, mu̶'it je̱'e̱ Herodes jim Judea choñ y oy jim Cesarea chu̶naaydyaakpú̶ky.
Herodes y'o'ky
20Herodes jyanchmu̶jootma'typy najty je̱'e̱ ja'ay mu̶dyiibu̶ najty jim Tiro y Sidón tzu̶naaygyu̶xpu̶ñ. Chi je̱'e̱ tiro ja'ay y sidón ja'ay ñaygyápxu̶gu̶xy neby je̱'e̱ Herodes mu̶baad winguwa'agu̶u̶ygyu̶xyu̶ñ. Y myu̶madaakku̶x ko je̱'e̱ Blasto meeñymyooygyu̶xy, je̱'e̱ ane̱'e̱mbu̶ Herodes myu̶jtuungmu̶u̶dpu̶, y chi mu̶ju̶u̶ydyaak mu̶nukxtaakku̶xy ko je̱'e̱ tzip ma'ad wan ku̶jxnu̶ najxnu̶, je̱' ko je̱'e̱ tiro ja'ay y je̱'e̱ sidón ja'ay je̱'e̱ xu̶jk mook najty jim yajtzóngu̶xy ma je̱'e̱ mu̶j'ane̱'e̱mbu̶ ñaaxjootyu̶ñ. 21Chi je̱'e̱ Herodes xu̶u̶ tzuu agapxy mu̶naa najty je̱'e̱ ja'ay mu̶dkapx mu̶dmu̶dya'agaangu̶xy, chi je̱'e̱ mu̶j'ane̱'e̱mbu̶ wit yajtu̶gu̶u̶y, y ñaxwech ma je̱'e̱ y'u̶ñaydyaaktu̶ñ, chi je̱'e̱ mayjya'ay mu̶dmu̶dyaaktu̶gu̶u̶y. 22Mu̶'it je̱'e̱ mayjya'ay mu̶k yaaxtu̶gu̶u̶y jyojktu̶gu̶u̶ygyu̶xy, y myu̶naangu̶xy: “¡Adaa ja'ay mu̶dyiibu̶ yam kapxpu̶ñ, ka'p yu̶'u̶ jya'ayu̶ch, dios yu̶'u̶!” 23Y timymyu̶'ityu̶ je̱'e̱ Windzú̶n Dios y'ángel je̱'e̱ Herodes yajpa'ambejty, je̱' ko ka'p najty je̱'e̱ Dios tu̶ ku'umáy tu̶ windzu̶gu̶'u̶y. Y chi tyu̶u̶ngku'udzu'tzu̶.
24Je̱'e̱ Windzú̶n Dios y'ayuuk tyu̶y'ajt mayu̶y'adu̶u̶tzp najty je̱' y yajkapxwa'kx'adu̶u̶tzp najty ma je̱'e̱ naax kajpt kú̶xyu̶ju̶ñ.
25Ko je̱'e̱ Bernabé mu̶u̶d je̱'e̱ Saulo tyuung yajmaaygyu̶xy jim Jerusalén, mu̶'it jim chóngu̶xnu̶ y mu̶dnú̶kxku̶xy je̱'e̱ Juan jim Antioquía, je̱'e̱ mu̶dyiibu̶ nandu'un yajtijpu̶ñ Marcos.
S'ha seleccionat:
:
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005