Ɓalɔ́ma 3
3
1Cɔ, Moyúda anyɛ́nyi nkpa nde nna Moyúda ka kema sina? Gúa á ganja ana kantíti sina? 2Anyɛ́nyi ka kema ásii ɗanga-ɗanga. Ka nyɔngɔ nde Ɓayúda ɓáunge Mokonga ɗéɓophi phɔ́ nyɔngɔ nɛkɛ. 3Eya, Ɓayúda ɓunɛngbo ɗáɓákáɓeeki nyɔngɔ á Mokonga! Ɓî a ɓó, ande gea te, ka nyɔngɔ índɔ aunge Mokonga aguande ka koɗoni nɛkɛ? 4Tanda phɔ́! Ambe Mokonga áúbikanɛ gea, a tɔ ɔyɔnga ɗoni, ɓakpa ɓáunge ɓá ndiu ɔyɔnga mbɛa. A tɔ ɓíndɔ ɓáɗundu suɓi á Ɓuku á Mokonga gea:
«Ambe óúbikanɛ gea, ɔ tɔ ɔyɔnga ɗoni.
Mbenɔ nde ɓáɔkɔtɔnga, ka nyɔngɔ ájeɗe kaɓɛmbɛ gǔ akɔ#Ɔna Jab 51.6.»
5Cɔ, kaɓɛ ka nyɔngɔ á ɓojeɗe nde ɓeogea aunge Mokonga aúbikani gea ande nto á koɗoni, ɓɛyɔngande Mokonga nna nto á ɗoni ka nyɔngɔ nde aosótambisaga? (Nɛyɔngi wa yɔngɛa á kokpa.) 6Tanda phɔ́! Atúoɓá Mokonga na nna nto á ɗoni atótenande nyɔngɔ ndea ɓato á ka mokonda?
7Cɔ, a gǎkɛ oɓá ɗoni á Mokonga n'aɔnɛkana ka mbɛa nɛmɔ, na ɓáobeba ina akɛ, ɓá goto ɔtɔka tena nyɔngɔ nɛmɔ akpɛ gea nende nto á ɓojeɗe ka ɓo? 8Aoɓá ɓó, ɓɛ́yɔngɛni pɛ: «Ɓégeɛni kema ájeɗe ka gea kema ánjá átɔtɔkɛanɛ?» Eya ana ɓakpa nde ɓáɔyɔnga mbɛa ka phɔasu gea, ɓesu ɓáunge ɓɛɔyɔnga ɓó. Ɓakpa ndɔ ɓákenande na tena á nyɔngɔ nɛɓɔ akpɛ!
Nna na nkpa nde ande nto á koɗoni mosá á Mokonga
9Cɔ, ɓɛ́yɔngɛni ɓoni? Ɓesu Ɓayúda ɓɛɛ́nyɛ́nyi ɓakpa ɓunɛngbo? Tanda phɔ́! Ɓe ye phangi base gea Ɓayúda na ɓunde ɓáná Ɓayúda, ɓesu ɓɔbu ɓe tɔ kusi á kɔkɔta á ɓojeɗe. 10A tɔ ɓíndɔ ɗáɓáɗundu suɓi á Ɓuku á Mokonga gea:
«Nna tanda na nkpa moci mmbé ande nto á koɗoni.
11Nna na nkpa nde aoengekisa,
nna na mmbé aonkaɓa Mokonga.
12Ɓɔbu ɓáɓúngigi, ɓɔbu ɓájɔɔkani kimoci.
Nna tanda na ka nkpa moci mmbé aogea ánjá.
13Kema nde aotóka k'aphenɔkɔ aɓɔ aokusisa,
eɗáka aɓɔ aǒenga ka dema á ɓakpa,
ɛsɔ aɓɔ ana cengu ɓínde á njɔka.
14Aphenɔkɔ aɓɔ atúmi na nyɔngɔ á sɛmɛaga na nyɔngɔ á kae-kae.
15Ecinji aɓɔ aáphǒ ka ɗuka á magia.
16Ɓáotúkatúka na ɗeketa á tambaga k'ɔ́ma bui nde ɓáɔnyɛ́nya.
17Ɗáɓákáoúba aphe á ɓujɛjɛ.
18Ɓáoenda kángá tanda kɔɓɔɓɔkɔ á Mokonga#Ɔna Jab 5.10; 10.7; 14.1-3; 36.2; 53.2-4; 140.4; Isa 59.7-8.»
19Cɔ, ɓeoúba gea, nyɔngɔ bubui nde ɛɔphi ayɔngi a tɔ ka phɔa ɓakpa nde ɓá kusi á ɛɔphi. Ka gea te, nkpa buakɛ ádakanɛ, na úba gea, ɓato á ka mokonda ɓɔbu ɓánde ɓato á ɓojeɗe mosá á Mokonga. 20Ka nyɔngɔ índɔ unge, nna na nkpa nde ɓántangande nto á koɗoni mosá á Mokonga#Ɔna Jab 143.2 ka nyɔngɔ á amba ɛɔphi. Ɛɔphi a tɔ omphangia nkpa gea, agi ɓojeɗe.
Mokonga aámbé aǒamisa ɓakpa ka měma ka nyɔngɔ á ɓeekea
21Cɔ, kɛ̌kɛnde, Mokonga ɗásɔɔnisi aphe sina nde áontanga nkpa nto á koɗoni mosá akɛ. Aphe ndɔ, nna gǎkɛ oɓea nyɔngɔ á ɛɔphi. Nga, ɗáɓáengekisi suɓi á ɓuku ɛ́ɔphi na ɓuku á ɓaɔtu-nyɔngɔ ndea Mokonga ɓe: 22Ɓakpa ɓɔbu ɓunde ɓámɓeeki Yéso Kiísito ɓáunge Mokonga aǒtanga ɓato á koɗoni mosá akɛ kángá oɓayɔ. 23Nga, ɓakpa ɓɔbu ɓági tɔ ɓojeɗe, ɓáoúka ɓoombia ndea Mokonga. 24Cɔ, ka nyɔngɔ á ɓonjánja-ékondi ndea Mokonga, Mokonga aétangi ɓato á koɗoni kángá ophendɔ ka nyɔngɔ nde Yéso Kiísito aámbé aékoɗigi. 25Nga, Mokonga ɗámbisi Yéso ka nyama á phɛ́a ka nyɔngɔ á íma á ɓojeɗe nde ɓakpa ɗáɓági mosá. Ka ɓakpa nde ɓáɓeeki, magia á phɛ́a ndɔ aphangisi gea Mokonga ande nto á koɗoni ka nyɔngɔ nde aími ɓojeɗe nde ɓakpa ɗáɓági. 26Ka nyɔngɔ á ngomi nde Mokonga aně, yɛ ɗákondi phangia koɗoni nɛkɛ ka matú ndee. Ka gea akɛ ɓó, aunge áontanga nto á koɗoni nkpa buakɛ mmbé amɓeeki Yéso.
27Cɔ, ɓena kema nde ɓeǒbeba ně? Tanda phɔ́. Ka ɓo? Ka nyɔngɔ nde kema nde ana kantíti nna ɛɔphi, a ndiu ɓeekea. 28Nga, ɓɛɔni gea, Mokonga a tɔ ontanga nkpa, nto á koɗoni ka nyɔngɔ á ɓeekea. Nna ka nyɔngɔ á amba ɛɔphi. 29Ande gea te, Mokonga a tɔ Mokonga ndea Ɓayúda? Nna phɔtɔ Mokonga ndea ɓunde ɓáná Ɓayúda? Eya! A phɔtɔ Mokonga ndea ɓunde ɓáná Ɓayúda 30nga, Mokonga a tɔ mo. Yɛ tɔ aámbé aétangande Ɓayúda na ɓunde ɓáná Ɓayúda ɓato á koɗoni ka ɓeana na ɓeekea á nkpa na nkpa. 31Ande gea, ɓɛɔɓɛnjiaga ɛɔphi ka nyɔngɔ á ɓeekea ndɔ? Tanda phɔ́! Ɓe ndiu otétemisa ɛɔphi.
© 2021, Wycliffe Bible Translators, Inc.