Ɓalɔ́ma 2
2
Mokonga aotena nyɔngɔ á ɓakpa kángá egami
1Cɔ, oɓɛ ímbe ootena nyɔngɔ á ɓakpa ɓunɛngbo akpɛ, nanga oɓá ani, ɓákáúkɛku phɔtɔ tena á nyɔngɔ ínɛkɔ akpɛ nga, ootena nyɔngɔ ndea ɓadakɔ akpɛ n'ɔ phɔtɔ otambea ɓea ɓɔ. Kaɓondɔ, o tɔ otena nyɔngɔ nɛkɔ akpɛ oɓɛ sasakɔ. 2Cɔ, ɓeoúba gea, Mokonga aoɓea ɗoni mbenɔ nde aotena nyɔngɔ á ɓakpa nde ɓáogea kema ɓíndɔ. 3Cɔ, oɓɛ ímbe ootena nyɔngɔ ndea ɓadakɔ akpɛ, n'ɔɓɛ sasakɔ otoogea kema nde ɓɔ ɓáogea. Ooúba te oɓɛ aámbé oólokande ka tena nyɔngɔ ndea Mokonga? 4Goto, oɓɛ ɔɔmɓɛnjiaga Mokonga ímbe aanjánjá phɛɛ, mmbé ana měma aphɔngɔ na měma á phiphia. Kóoúba gea, ngomi ndea Mokonga aokotútuisa ka kětia á tambea akɔ ájeɗe? 5Cɔ, oɓɛ ona měma akpɛ na kóokonda kětia á měma akɔ. Kaɓondɔ unge ǒbisíí tambaga ángbó esa nde Mokonga aphangiaeka esúia nɛkɛ na tena á nyɔngɔ nɛkɛ ka koɗoni. 6Nga, Mokonga amphendaeka nkpa buakɛ ɓíndɔ akeni ka bɛɗanaga nde abɛɗanagi.#Ɔna Sep 1.14-18; 2.2-3; Jab 62.13; Mɛn 24.12 7Mokonga aeɓophande enda á mɛyɔ, ɓakpa nde ɓásui bɛɗaneaga akɛ na kaɓa obebɔ, ɓokutú na kema nde nna na sungiaga. 8Aphangiande gǎkɛ ɓɛí na esúia nɛkɛ ka ɓakpa nde ɓánde ɓaɓiɓia akɛ na ɓunde ɓáoyá ɗoni na ɓeá á ɓojeɗe. 9Nkpa buakɛ mmbé aogea ɓojeɗe, atambagande na ea á minyɔ. Tambaga ndɔ akpangande phɔ́ ka Ɓayúda, mpɔ áoɓá ka ɓunde ɓáná Ɓayúda. 10Nkpa buakɛ mmbé a gǎkɛ ogea ánjá, aɓande na ɓokutú, ɓujɛjɛ na ɓoombia. Akpangande phɔ́ ka Ɓayúda, mpɔ áoɓá ka ɓunde ɓáná Ɓayúda. 11Nga, Mokonga nna n'oɓayɔ ka tena á nyɔngɔ#Ɔna Tɔl 10.12.
12Kaɓondɔ, ɓakpa ɓɔbu ɓunde ɓáogea ɓojeɗe kángá á úba ɛɔphi ndea Mósa, ɓáetúkatúkande ɓɔ na ɓátenande nyɔngɔ nɛɓɔ kángá ɛɔphi ndea Mósa. Ɓunde ɓá gǎkɛ ogea ɓojeɗe na ɓáoúba ɛɔphi ndea Mósa, ɓátenande nyɔngɔ nɛɓɔ n'ɛɔphi ndɔɔ. 13Cɔ, nna gǎkɛ ɓakpa nde ɓá tɔ ɔɔ́ka ɛɔphi ɓáunge Mokonga aǒtanga ɓato á koɗoni. A ndiu ɓakpa nde ɓáotambea ɓíndɔ ɛɔphi asosi. 14Ɓî ɓakpa nde ɓáná Ɓayúda měma aɓɔ aǒteka ka tɔtɔkisa á kema nde ɛɔphi asosi nanga ɓánáoúba ɛɔphi ndea Mósa, ɓɔ, ɓána ɛɔphi ndɔ suɓi aɓɔ, nanga ɓáká ně. 15Kaɓondɔ ɓáophangia gea, kema nde ɓáɗundu suɓi ɛ́ɔphi aɔbɛɗanaga ka měma aɓɔ. Ianaga á ka měma aɓɔ aoɗigimisa nyɔngɔ ndɔ na kanisiaɓɔ a phɔtɔ ɔ̌tɔnga gea, mbenɔ nɛngbo ɓági ánjá, mbenɔ nɛngbo ɓági ájeɗe. 16Ɓondɔ unge aɓande esa nde Mokonga atenande akpɛ nyɔngɔ á ɓɔsɔmɛa ndea ɓakpa k'aphe ndea Yéso Kiísito. A tɔ ɓíndɔ Mbino-Ánjá nde nɛɔtɔmiaga ayɔngi.
Ɓayúda ɓátingíígi ɛɔphi ndea Mósa
17Cɔ, oɓɛ ímbe ogi te, onde Moyúda, oseɓei ɛɔphi ndea Mósa, na ébeba na Mokonga. 18Ooúba mɔphɛ ndea Mokonga. Ɛɔphi a phɔtɔ okogoisaga ka sɔmbɔa á kema nde aánjá. 19Oɓeeki ɗoni gea onde nsɔndɔi á ɓakeíme-íme, na owanga ka ɓunde ɓá suɓi á kaiphiɔ. 20Onde phɔtɔ ngoisigi á ɓabóbó na ngoisigi á ɓaniki nga, ooúba ɗoni gea, ɛɔphi aokophangia aphe á úbapha phɛɛ na koɗoni. 21Cɔ, oɓɛ ngoisigi á ɓakpa ɓunɛngbo, kó ǒgoisaga sasakɔ ee? Ɔɔphɛa ɓakpa ɓunɛngbo gea, ɓákáúɓɛmbɛ n'ɔɓɛ o goto oúɓa! 22Ɔɔyɔnga gea ɓakpa ɓákátunganɛmbɛ, n'o gǎkɛ otungana! Oɓɛ okangei iii á ɓamokonga á mbɛa, n'o gǎkɛ oúɓa nkumba á k'éndu nɛɓɔ.#Ɔna Tɔl 7.25 23Oɓɛ ímbe ǒbeba na úba ɛɔphi ndea Mósa, ɔɔnjɔɔkisa Mokonga ka tingiaga ɛɔphi! 24Nga, a ɓíndɔ ɓáɗundu suɓi á Ɓuku á Mokonga gea: «Ka nyɔngɔ anu Ɓayúda aunge ɓakpa nde ɓáná Ɓayúda ɓáobóma ina á Mokonga#Ɔna Isa 52.5.»
25Eya, gúa á ganja a tɔ na kantíti aoɓá n'oamba ɛɔphi. A gǎkɛ oɓá n'ootingiaga ɛɔphi, nanga ógua ganja, gúa á ganja nɛkɔ a tɔ kowó. 26Cɔ, aoɓá mowó n'aoamba ɛɔphi ndea Mósa, Mokonga kántangɛku tɔ ɓea ngu-ganja? 27Nkpa nde kágú ganja á ka nyama, n'aoamba ɛɔphi ndea Mósa, atenande nyɔngɔ nɛkɔ akpɛ oɓɛ ímɓɔ ootingiaga ɛɔphi n'ona Ɓuku á Mokonga n'onde ngu-ganja. 28Cɔ, Moyúda á ɗoni nna tɔ mmbé áoúbikana ka keongi na mmbé agú tɔ ganja á ka nyama. 29Moyúda á ɗoni a ndiu mmbé a ye úbikani suɓi akɛ na gúa á ganja suɓi á měma akɛ. Gúa á ganja ndɔ, áɔtɔtɔkɛana ka ɓukpɛkpɛ á Měma á Mokonga, nna ka nyɔngɔ ɛ́ɔphi ndea Mósa#2.29 Ɔna Tɔl 30.6. Obebɔ á nkpa ɓea mmbɔ nna otóka ka ɓakpa, a ndiu otóka ka Mokonga.. Moyúda á ɗoni ndɔ, nna ɓakpa ɓáunge ɓáombeba, Mokonga aámbé a ndiu ombeba.
© 2021, Wycliffe Bible Translators, Inc.