Rut 4
4
Boas ar Rutakʼ bapla
1Boas do phaṭok-duạr ṭhen senkateye duṛupʼena. Ar Boas okoe sor peṛa reakʼ kathae menletʼ unre uni do onkateye parom calakʼkan tahẽkana. Boas do uni hohoadeteye metadea, “E boeha, nonḍe hecʼkate duṛupʼlen me.” Unre uni hoṛ do onḍe senkateye duṛupʼena.
2Ona tayom Boas do atoren gel goṭen murubbiko hohoatʼkoteye metatʼkoa, “Dela, nonḍe duṛupʼlenpe.” Unre onko do onḍeko duṛupʼena. 3Boas do uni sor peṛae metadea, “Naomi do Moab disạm khon ruạṛ hecʼkate aboren boeha Elimelekakʼ jumi ạkhrińe meneda. 4Onateń hudiskeda ona reaṅ baḍae ocome jạruṛtińạ. Nonḍe menakʼko hoṛko ar iń jạtren murubbiko samaṅre amge ona do kirińme. Ar amge jumi chaḍao hataoem menetʼ khan ona do amge hataome. Menkhan ona bam khojkan khan lạiyạńme, ente ona chaḍao hatao reakʼ pạhil ạidạri do amakʼ kangea ar ona tayom do ińakʼ kana.”
Unre uni sor peṛa doe menkeda, “Ṭhikgea, iń do onań chaḍao hatao joṅa.”
5Onate Boase menkeda, “Oka hilokʼ ona jumi Naomi ṭhen khonem kiriń hataoa enhilokʼ uni gocʼicʼakʼ sompotti sãote uniyakʼ ńutum rukhiyại lạgitʼ Moabi rạnḍi maejiu Rut hõ ataṅe hoyokʼtama.”
6Niạ katha ańjomkate uni sor peṛa doe menkeda, “Ona do bạń daṛeakʼa, ente iń apnarakʼ sompotti iạte unre muskilreń paṛaokʼa. Ar bạń chaḍao hatao daṛeakʼ kante amge ona do hataome.”
7 #
Bib 25.9
Israelkoakʼ disạmre sompotti kiriń ạkhriń ar chaḍao babotre ạn-tạrire ạgui lạgitʼ niạ ạnge tahẽkana: mitʼ hoṛ do acʼakʼ panahi totʼkate eṭakʼ hoṛe emaekan tahẽkana, ar nonkate onkoakʼ kạmi do ạn-tạrire hijukʼkan tahẽkana.
8Onatege uni sor peṛa do Boase metadea, “Amge ona do kiriń hataome.” Ar noa menkate uni do acʼakʼ panaheye totʼketʼtaea.
9Unre Boas do murubbiko ar onḍenko sanam hoṛkoe metatʼkoa, “Iń do teheń Elimelek, Kilion ar Mahlon tekoakʼ sanam sompotti do Naomi ṭhen khoniń kirińketʼ onaren gohako do apegepe tahẽyena. 10#Bib 25.5,6Ar gocʼ akanicʼakʼ sompotti ar ńutum jemon rukhiyạkʼtae onate Mahlonren rạnḍi bạhu Rut hõ ińren bạhu menteń ataṅede kana. Ar onate bõsko tala khon ar atorenko tala khon gocʼ akanicʼakʼ ńutum do baṅ meṭaokʼtaea. Ape do teheń noa sanamakʼren gohakope hoyena.”
11 #
Gen 29.31
Unre okoe do phaṭok duạr ṭhenko duṛupʼ akan tahẽkan murubbiko menkeda, “Hẽ, ale do gohale hoyena. Ar okoeṭakʼ maejiu do amakʼ oṛakʼteye calakʼkan Probhu Isor do jemon Rahel ar Lea lekae hoeocoye, one okoe do Israel jạtrenkoe benao rakapʼletʼko. Ephratare am do dhon durib hameṭjoṅ me ar Bethlehem ren sanamko do amakʼ ńutumko ńumtama. 12#Gen 38.27-30Probhu Isor do nui maejiuakʼ kukhire okoeṭakʼ hopone emam uni hotete amakʼ bõs do Tamorakʼ kukhiren Jihudạren hopon Peresakʼ bõs leka baṛe hoyokʼma.”
13Inạ tayom Boas do Rute baplakedea ar uniren bạhui hoyena. Ar Boas do uni ṭhene boloyen khan Probhu Isor do Rutakʼ kukhire gidrại emadea ar uniren do mitʼṭen koṛa hopone hoyena. 14Onate eṭakʼ maejiuko do Naomiko metadea, “Probhu Isorakʼge sarhao hoyokʼtae ma, ente uni do teheń mitʼṭecʼ dạyik gogokʼicʼ peṛae ematʼmea. Israelkoakʼ disạm talare sanamkoge uniko sarhaoema. 15Nui gidrạ do amakʼ buḍhi pạṛiạre jemon jiwiye raṛejtam are ńelme, ente amren kiminme, one amren eae goṭen hoponko khon hõ ḍhere dulạṛetʼme, uniyakʼ kukhire gidrạwakʼ janam do hoyakana.”
16Unre Naomi do gidrại hoborkedea ar uniren hehewicʼe hoyena. 17Ar aḍepaseren maejiukoko menkeda, “Naomiren do mitʼṭen koṛa gidrại hoyakana.” Onko do uni gidrạwakʼ ńutum Obedko dohoketʼtaea. Obed do Jisạiren apate tahẽkana ar Jisại do Dạudren apate tahẽkana.
18Peresakʼ bõs tạlika do nonka leka: Peresren hopon do Hesron; 19Ar Hesronren hopon do Ram; Ramren hopon do Aminadab; 20Aminadabren hopon do Nahason; Nahasonren hopon do Solomon; 21Solomonren hopon do Boas; Boasren hopon do Obed; 22Obedren hopon do Jisại ar Jisạiren hopon do Dạud.
Santali Bible © Bangladesh Bible Society, 2021.