Rut 3
3
Boasakʼ khạrạire Rut
1Thoṛa din tayom Naomi do Rute metadea, “E bạhu, amakʼ bhạlại lạgitʼ mitʼṭecʼ bebosta hatao hoyokʼtińạ jemon gharońj hoyokʼ taben. 2Okoeren kạmiyạ kuṛiko sãote nunạkʼ din ben kạmiketʼ uni Boas do aboren peṛa kanae. Ar teheń ńindạ uni do acʼakʼ khạrạire jaoe ewera. 3Onate aben do um saphakate sunum ojokʼjoṅ ben ar rokʼ nạkicʼkate mońj utạrakʼ kicricʼ horokʼ bandekate ona khạrạite calakʼ ben. Menkhan jom ńũ ạuri sạtokʼ hạbicʼ alo ben ńel ocokʼa. 4Ar tinre uni do giticʼ lạgitʼe calakʼa unre aben do uniyakʼ giticʼ jaega ben ńel oṭokakʼa. Ar ona tayom do onḍe senkate uniyakʼ jaṅga cetan khon uniyakʼ oyon kicricʼ ben ocoga ar onḍe ben gitijokʼa. Ar cetʼ cekae hoyokʼ tabena ona do unigeye lại abena.”
5Rut doe roṛ ruạṛkeda, “Aben okaben menketʼ, ona jotowakʼ geliń kạmiya.” 6Tayomte uni do khạrạire senkate acʼren hanhartetʼe metade tahẽkan leka jotowakʼe kạmikeda.
7Boas do jom ńũkateye tirpiten khan uni do puńji akatʼ anaj reakʼ mitʼ aṛere senkateye giticʼena. Ar Rut do hape hapete senkate uni cetan khon oyonakʼ ocokʼkate onḍeye giticʼena. 8Tala ńindạ Boas do acka comkao gotʼenteye ạcurena. Uniye ńelkeda mitʼṭen maejiu do acʼakʼ jaṅga ṭhene giticʼ akana. 9Uni do uniye kulikedea, “Am dom okoe kana?”
Rut doe menkeda, “Iń do amren kạ̃ṛmĩ Rut kạnạń. Amakʼ oyonakʼ latarre amren nui kạ̃ṛmĩ baṛe asray emaeme, ente am do ińakʼ dạyik gogokʼ peṛakoren miṭen hoṛ kanam.”
10Boase roṛ ruạṛkeda, “Probhu Isor do ame bhoram ma. Ńit hạbicʼ okaṭakʼ pạtiạrem udukʼ akatʼ ona khon hõ niạ dhao do ḍher pạtiạrem udukʼ akada, ente kisạ̃ṛ se reṅgecʼ jãhãe koṛa hoṛko ṭhen do bam calao akana. 11Alom botorokʼa, am okam khoj onage hoyokʼa. Ińakʼ atoren sanam hoṛgeko baḍaea, am do mitʼṭen bhage kuṛi kanam. 12#Rut 2.20Iń do amakʼ dạyikʼ gogokʼ peṛako modren mitʼ hoṛ kangeạń, menkhan iń khon hõ sor peṛa ar mitʼ hoṛ menaea. 13Teheń ńindạ do nonḍege tahenme. Ar uni do gapa setakʼge amakʼ dạyik hataoe rạjikʼ khan tobe ma bhagege; are onka ocoange. Menkhan bae rạjikʼ khan iń do jiwetʼ Probhu Isor ńutumte kiriạkateń meneda, amakʼ dạyik iń hataoa. Ar am do ạuri setagokʼ hạbicʼ nonḍege giticʼ akan tahenme.”
14Onate Rut do setakʼ hạbicʼ uniyakʼ jaṅga ṭhene giticʼ tahẽyena. Boase metade tahẽkana, mitʼṭen maejiu khạrạiteye hecʼlen ona do okoege jemon aloko baḍae. Ar onate Rut do ạuri aṅga marsalokʼregeye beretʼena.
15-16Unre Boase menkeda, “Amakʼ oyonakʼ note ạguiyme ar ataṅme. ” Ar Rut doe ataṅkeda. Unre Boas do turui haṭakʼ jaoe upʼadete bohokʼreye dipiladea ar uni do atoteye boloyena.
Rut do tinre acʼren hanhartetʼ ṭhene senena unre uniye kulikedea, E bạhu, cetʼ hoyena?”
Boas acʼ lạgitʼ cetʼ cetʼkoe cekaketʼ Rut do ona sanamakʼe lạikeda. 17Uni do arhoe menkeda, “Uni do turui haṭakʼ jao emkateye metadińạ, ‘hanharme ṭhen eken ti do alom ruạṛ calakʼa.’ ”
18Niạ katha ańjomkate Naomiye menkeda, “E bạhu, ses hạbicʼ ma tạṅgi hataṛ ben cetʼ hoyokʼa mente. Teheńge niạ reakʼ mitʼṭecʼ bebosta ạuri hoyokʼ hạbicʼ uni do bae thirokʼa.”
Santali Bible © Bangladesh Bible Society, 2021.