Kạhtukko 31
31
Raj lạgitʼ solha
1Lemuel rajakʼ roṛakʼ katha, metakʼme Isorakʼ emakʼ katha okaṭakʼ do
acʼ eṅgattetʼ ṭhen khone cetʼletʼ.
2E bạbu, E ińakʼ kukhiren hopon,
E ińakʼ manotakʼletʼren hopon, am do cetʼ iń metama?
3Ạimạikore amakʼ daṛe do alom cabaetama;
amakʼ dhon hõ alo onko do rapajkoko maraokoa.
4E Lemuel, rapajko reakʼ lek do baṅ kana,
darkha rasa ńũi do;
ar bubulakʼ ńũi hõ disạm cakʼlaoko lạgitʼ lek anakʼ hõ baṅkana.
5Bubulakʼ ńũite onko do ạn ạrikoko hiṛińa,
ar santaokʼkanko secʼ behokakʼko bicạra.
6Gujukʼ lạgidokʼko do bubulakʼ emakope.
Ar darkha rasa do jiwire dukokʼkankoge;
7Onko do ona ńũkate okulạn reakʼ kathako hiṛińma,
ar onate duk ar kosṭo monre aloko disại ma.
8E Lemuel, okoe acʼ reakʼ katha bae lại daṛeakʼkan
am do uni secʼ katha roṛme;
ar jarkhar akan ạidạri rukhiyại lạgitʼ am do noa katha roṛme.
9Alom thir hapekokʼa, hok reakʼ bicạrme;
nacar ar reṅgecʼko lạgitʼ ạidạri rukhiyạitakome.
Bujhạntar Bạhu
10Bhage bạhu do okarem ńamkea?
Uni do mạnik dhiriko khon hõ ạḍitetʼe damangea.
11Jãwãe do purạte unireye bhorsa akana;
uniren jãwãe do okaṭakʼte hõ bae ṭonṭakʼa.
12Uni do sanam ghạṛicʼ acʼren jãwãetetʼe bhageyede kana,
menkhan bạṛicʼakʼ do baṅa.
13Uni do bhiḍi upʼ ar musnại ńam baṛayeda
ar rạskạ salakʼ titeye kạmikana.
14Uni do bạnij beparkoakʼ jahaj lekanae
sạṅgiń khon acʼakʼ jomakʼ jiniskoe ạguiyetʼkana.
15Ńindạ tahenrege uni doe beretʼkana;
ar gharońjrenko lạgitʼ jomakʼe emokʼkana
ar kạ̃ṛmĩ kuṛikotae do niṭakʼ kạmikoe hạṭińako kana.
16Jumi kiriń lahare uni do onae ạribạndhiyetʼa
ar ona tayom doe kirińeda;
ar acʼakʼ ti reakʼ arojakʼte darkha bagwane benaoeda.
17Uni do daṛe salakʼ ḍanḍa pathe keṭecʼkate kạmire tiye lagaoeda
ar ạḍitetʼe khaṭaokʼ kana.
18Ńel jutedae acʼakʼ khaṭaoakʼ reakʼ lab do bhagege hoyokʼkana;
ar ńindạ uniyakʼ diuhe do baṅ ĩṛĩjokʼkantaea.
19Uni do carkhare acʼakʼ ti kine lagaoetʼtaea
ar acʼakʼ tite ḍherae ạcuretʼa.
20Nacarko lạgitʼ uniyakʼ cuputʼ do jhicʼgetaea;
uni do reṅgecʼko secʼ acʼakʼ tiye tiyạretʼtaea.
21Him ńurlenre hõ uniyakʼ gharońj lạgitʼ do jãhãn botor bạnukʼa,
ente sanamkoge damanakʼ jeṅgetʼ arakʼ kicricʼteko oyokʼkana.
22Uni do pichạuṛikoe tearjoṅ kana;
acʼhõ musnạ ar beguni roṅakʼ kicricʼe bandeyeda.
23Uniren jãwãe do nagraha reakʼ duạrre manote ńameda;
onḍe uni do murubbiko tulucʼe duṛupʼkana.
24Uni maejiu do musnạ kicricʼ benao kateye ạkhrińeda;
ar ḍanḍa paṭheakʼ kicricʼ do bạnij beparikoe emako kana.
25Daṛe ar man do uniyakʼ horokʼ bandenakʼkana;
ar darakan dinko reakʼ do bae bhabnakʼ kana.
26Uni do bud salakʼ kathae roṛa;
ar dulạṛ salakʼe galmaraoa.
27Uni do gharońj reakʼ sanam secʼe ạribạndhiya;
ar khaṭaokateye joma.
28Uniren gidrạko do sanamko samaṅre bhạganko metaea;
ar uniren jãwãe hõ uni sarhaoeteye mena,
29“Ḍher maejiukoge bhage ghirni erako hoyakana,
menkhan am do sanamko khonem sorosgea.”
30Mońj beohar do eṛegea, ar cõhõk hõ ạuṛiyakʼgea,
menkhan okoe maejiu do Probhui botorae
uni do sarhaoe ńama.
31Uniyakʼ kạmi iạte sarhaoepe;
ar uniyakʼ kạmiko do duạrareko sarhaotaema.
Santali Bible © Bangladesh Bible Society, 2021.