Numeri 6
6
Nạsriko reakʼ ạn-ạri
1Probhu Isor do Moseye galmaraoadea, 2“Am do Israel hoponkom baḍae ocokoa, jãhãe herel hopon se maejiuge nạsri lekate Probhu Isor ńutumte begar tahen lạgitʼe manot akatʼ khan, 3#Luk 1.15enḍekhan uni do darkha rasa se jãhãn bubulakʼ khon sahaṛ akane tahenma. Uni do darkha rasa se bubulakʼ khon benaoakʼ sirkạ hõ aloe ńũiyma. Uni do ṭaṭka darkha rasa, darkha jo se kismis hõ aloe ńũ-jom ma. 4Ar tinạkʼ din nạsri menteye tahen unạkʼ din darkha rasa reakʼ jãhãnakʼge bae jom daṛeakʼa baṅ do ona reakʼ jaṅ ar baṅ do cokakʼ cetʼge bae ńũ-jom daṛeakʼa.
5“Tinạkʼ din nạsri mente begar tahen reakʼe kiriạ akan unạkʼ din uni do bohokʼ upʼ bae hoyo poṭortaea. Probhu Isor ńutumteye begar akante uni do Probhu Isorrenge tahen hoyokʼtaea. Uni do acʼakʼ upʼe hara jeleń ocoytaea. 6Uni do jãhãn mạ̃ṛĩ ṭhen hõ bae sor daṛeakʼa. 7Gogo-baba, boeha-misera jãhãegeko gocʼlenre hõ apnarte bae besapha daṛeakʼa, ente uniyakʼ bohokʼre Isor ńutumte begar doho akan reakʼ cinhạ menakʼa. 8Uniyakʼ niạ begar doho akan tahen do purạ okte Probhu Isor ńutumte tahen hoyokʼtaea.
9“Jãhãe ackage uni samaṅreye gujukʼ ar onate Probhu Isor ńutumteye dohoakatʼ upʼ besaphakʼtae enḍekhan uni do eae mãhã hilokʼ, metakʼme uni do saphakʼ hilokʼ bohokʼ hoyo poṭorokʼ hoyokʼtaea. 10Ar irạl mãhã hilokʼ do ńapamokʼ tạmbu reakʼ duạrre naeke ṭhen barea potam ar baṅkhan barea parwa idikin hoyokʼtaea. 11Mạ̃ṛĩ ṭhene tahẽkante uni doe besaphagea ar uni saphakʼ lạgitʼ naeke do mitʼṭen cẽṛẽ hataokate kại ńutumteye samaṅea ar eṭakʼicʼ do jeredokʼ samaṅokʼakʼ ńutumteye samaṅea. Ar enhilokʼ uni do acʼakʼ bohokʼ upʼ Probhu Isor ńutumteye sonot ocoytaea, 12ar ona sãote acʼ apnar hõ lahate leka Probhu Isor ńutumte begar tahen reakʼe kiriyạkʼa. Ona chaḍa dos akatʼ reakʼ samaṅokʼakʼ lạgitʼ uni do mitʼ bochor umerren mitʼṭen bheḍa hopone ạguiyea. Ar tinạkʼ din Probhu Isor ńutumte begar akane tahẽkan onako din do bạtilokʼtaea, ente onako dinre uni do besapha akane tahẽkana.
13 #
Apos 21.23,24 “Probhu Isor ńutumte mitʼṭen nạsri hoṛ do begar tahen reakʼ din purạulentae tayom uni do noa manao hoyokʼtaea. Uni do ńapamokʼ tạmbu reakʼ duạr ṭhene hijukʼa. 14Ar onḍe Probhu Isor ńutumte samaṅokʼakʼ lekate jeredokʼ samaṅokʼakʼ lạgitʼ mitʼ bochor umerren mitʼṭen niphuṭ utạricʼ bheḍa hopon, kại ńutumte samaṅokʼakʼ lạgitʼ mitʼṭen mitʼ bochor umerren niphuṭ utạricʼ bhiḍi hopon ar sulukren samaṅokʼ lạgitʼ mitʼṭen niphuṭ utạricʼ bheḍa ạguiye hoyokʼtaea. 15Niạko sãote jomakʼ samaṅokʼakʼ ar coḍorokʼ samaṅokʼakʼ jinis ar mitʼ ḍạlicʼ bin khạmiyanakʼ piṭhạ hõ lagaoea. Niạko piṭhạ do sunumre sipiyakʼ mĩhĩ holoṅ reakʼ piṭhạ ar sunum mesalakatʼ thapṛa piṭhạge hoyokʼ jạruṛa. 16Naeke do Probhu Isor samaṅre idikate noakoe dohoya ar kại ńutumte samaṅokʼakʼ ar jeredokʼ samaṅokʼakʼ reakʼe kạmiya. 17Ona chaḍa uni bheḍa do Probhu Isor samaṅre sulukren dãṛẽ ńutumte samaṅe jokhecʼ ḍạlicʼ reakʼ bin khạmiyanakʼ piṭhạ hõ samaṅ hoyokʼa ar jomakʼ samaṅokʼakʼ ar coḍor samaṅokʼakʼ hõe samaṅa. 18Ona tayom ńapamokʼ tạmbu reakʼ duạr ṭhen nạsri hoṛ do Probhu Isor ńutumteye dohoakatʼ acʼakʼ upʼe hoyo poṭor ocoytaea. Ar noa upʼ do sulukren samaṅokʼakʼ latarre seṅgelreye khadle giḍikakʼa. 19Probhu Isor ńutumte dohoakatʼ upʼ hoyo poṭor tayom naeke do bheḍawakʼ mitʼṭecʼ isinakʼ phạṛi ar ḍạlicʼ khon mitʼṭecʼ bin khạmiyanakʼ piṭhạ ar thapṛa piṭhạ hataokate uni nạsri hoṛe calaea. 20Ona tayom naeke do dolek samaṅokʼakʼ lekate Probhu Isor samaṅreye dolaoa. Noa do sonotakʼ jinis kana ar ona do naekeyakʼge hoyokʼa. Ona chaḍa dolao akatʼ koṛam reakʼ jel ar samaṅ akatʼ bulu hõ naekeyakʼ hoyokʼtaea. Noako hoylen tayom uni nạsri hoṛ do darkha rasae ńũ daṛeakʼa.
21“Noakangea nạsri hoṛ lạgitʼ niạm do. Probhu Isor ńutumte begar tahen reakʼ kiriạ lekate noako samaṅokʼakʼ reakʼ samaṅ hoyokʼtaea. Ona chaḍa uni do acʼakʼ daṛe lekate arhõ thoṛa emokʼ lạgitʼe kiriạlen khan ona hõ emokʼ hoyokʼtaea. Ar uniyakʼ kiriạ akanakʼ do Probhu Isor ńutumte begar tahen reakʼ niạm lekate emokʼ hoyokʼtaea.”
Naekeakʼ bhor
22Probhu Isor do Moseye galmaraoadea, 23“Am do Aron ar uniren hoponkom metakoa, jemon noa menkate Israel hoponko ạsirbadko emako.
24‘Probhu Isor do ame bhoram ma
are horho jaṅgeme ma;
25Probhu Isor do acʼakʼ mẽtʼãhã
am secʼe marsal ocoyma;
are dayawam ma.
26Probhu Isor do acʼakʼ mẽtʼãha am secʼe samaṅma
ar suluke dohoam ma.’
27“Nonkage onko do Israelko cetanre ińakʼ ńutumko ńuma, ar iń do onkoń bhorakoa.”
Santali Bible © Bangladesh Bible Society, 2021.