Numeri 24
24
1Biliam do tinreye ńelkeda, Probhu Isorakʼ sana do Israelko bhorako onate uni do eṭakʼ dhao leka gonokko reakʼ goṛo hatao do bae kurumuṭuleda. Uni do hahaṅkar secʼ mẽtʼãhãe samaṅketʼtaea. 2Uni doe ńelkeda, Israelko do akoakʼ khũṭ lekageko ḍera akana. Unre Isorren Jiu do uni cetanreye hecʼena, 3Ar uni do Isorakʼ noa katha lạlạiye ehopʼena:
“Bior hopon Biliam do
noa kathae meneda,
okoeyakʼ mẽtʼ do jhicʼge menakʼtae
uni do noa kathae meneda,
4Okoe hoṛ Isorakʼ kathae ańjometʼkan
ar sanam daṛeanicʼ reakʼ dorsone ńeletʼkan,
ar okoe do otreye ombakʼ hape akan
ar okoe do mẽtʼ jhicʼ akantae,
5uni do noa kathae meneda:
E Jakob, amakʼ tạmbuko do tinạkʼ mońj!
E Israel, tinạkʼ mońj amakʼ
tahen jaega do!
6Onako do buru tala otetko leka,
gaḍa aṛe reakʼ bagwanko leka,
Probhu Isore rohoe akatʼ Aguru dareko leka,
dakʼ aṛe reakʼ debdạru dareko lekage.
7Taren reakʼ kanḍa khon
dakʼ do dul oḍokokʼa,
ar uniren bõs do aema dakʼreko tahena.
Onkoren raj do Ogag khon hõe usulokʼa,
onkoakʼ rajosṭi do ṭhonokte
arhõ maraṅokʼa.
8Isor do Misor khon onkoe
oḍok ạgu akatʼkoa,
ar unige onkoren bir ḍaṅgrawakʼ
daṛe leka do.
Onko upạrte okoe jạtrenko teṅgona
onko doe utʼ cabakoa,
onkoakʼ jaṅ doe rạpudtakoa,
ar sarte onko doe tuńkoa.
9 #
Gen 49.9;
Gen 12.3
Dhạcri kul ar kul eṅgal leka onko doko burumokʼa
arko kunḍlạṅ hapekokʼa,
unre onko beretʼko reakʼ do okoeye dilkea?
Okoe apeko bhorape
onkage onkore hõ bhor paṛaokʼma;
ar okoe sarapko emape,
onkage onko cetanre hõ sarap paṛaokʼma.”
10Niạ katha ańjomkate Balak do Biliam cetanre ạḍiye raṅgaoena. Ar acʼakʼ tiye ghusiketʼteye menkeda, “Ińren bạiriko sarapako lạgitʼ iń hoho ạguletʼmea menkhan am do niạ ghalokʼ pe dhaoem bhoratʼkoa. 11Am do ńitge nonḍe khon amakʼ disạmte ruạṛ calakʼme. Iń do ạḍitetʼ manotmeyiń menleda menkhan Probhu Isor do bae ńam ocowatʼmea.”
12Biliam do Balake roṛ ruạṛadea, “Amem kolletʼko hoṛ do cetʼ bạń metatʼko tahẽkana, 13Balak do sona ar rupạte perecʼ raj oṛakʼe imạńre hõ enhõ ińakʼ sana leka bhage ar bạṛicʼ do bạń men daṛeakʼa se Probhu Isorakʼ hukum birud hõ bạń sendaṛeakʼa, menkhan Probhu Isor okae mitạń eken onageń roṛ daṛeakʼa? 14Iń do ńitokʼ ińren hoṛko ṭheniń ruạṛ calakʼ kana, menkhan ona lahare amiń sontor oṭokam kana noko jạtrenko do tayom daram amren hoṛko cetanre cetʼko cekaea mente.”
Biliamakʼ ponakʼ nạbi katha
15Unre Biliam do Isor emakʼ noa katha roroṛe ehopʼena:
“Beor hopon Biliam do
noa kathae meneda,
okoeyakʼ mẽtʼ beṅgetʼge menakʼtae
uni do noa kathae meneda,
16Okoe hoṛ Isorakʼ kathae ańjometʼkan
ar maraṅ Isor ṭhen khon
bud ar ạkile ńametʼ,
ar okoe do sanam daṛeanicʼ reakʼ dorsone ńeletʼ,
okoe do otreye ombakʼ hape akan,
ar okoeyakʼ mẽtʼ jhicʼ akantae,
uni do noa kathae meneda:
17‘ńitokʼ baṅre hõ iń do
uniń ńelńame kana,
ar iń sorrene baṅkanre hõ
enhõ uni doń ạritʼ edekana.
Mitʼṭecʼ ipil doe rakapʼa Jakobakʼ bõsre,
mitʼṭecʼ raj ṭheṅgage Israelko mod khon
rakapʼ hijukʼa.
Uni do Moab ar Setren hoponkoakʼ
bohokʼe gejertakoa.
18Bạiriko do Edom, metakʼme Seyirko
dokhol joṅa,
menkhan Israelko do birbanṭa hoṛ leka
ektiạriko hameṭ joṅa.
19Jakobakʼ bõs khon
mitʼṭen raje rakapʼ hijukʼa,
ar nagrahare sarecʼ akan Edomrenko
uni doe marao utạrkoa.’ ”
Biliamakʼ ses nạbi katha
20Amalekiko ńelte Biliam do Isorakʼ noa katha roroṛe ehopʼena:
“Eṭakʼ sanam jạtrenko modre
Amalekiko do maraṅko tahẽkana,
menkhan onkoakʼ sesokʼ do maraokʼge hoyokʼa.”
21Ona tayom Biliam do Keniko ńelte Isorakʼ noa katha roroṛe ehopʼena:
“Apeakʼ tahen jaega do kajakgetapea;
ente apeakʼ tukạ do huṭupʼ dhirire hạmbutʼ akana.
22Menkhan sesre E Kenirenko
ape dope marao utạrokʼa;
Ạsurrenko do ar tinạkʼ din
bondi kateko dohokapea?”
23Ona tayom Biliam do Isorakʼ noa katha roroṛe ehopʼena:
“Hae! Isor noakoe hoe ocoyre,
unre cetʼ jãhãe jiwetʼe tahẽdaṛeakʼa?
24Kitim dip aṛe khon
jahajko do hecʼkate
Ạsurrenko ar Eberrenkoe copotʼkoa;
menkhan Kitimren hoṛ doko
marao utạrokʼa.”
25Inạ tayom Biliam do beretʼkate oṛakʼ secʼe mohnḍayena ar Balak hõ acʼakʼ horteye ruạṛ calaoena.
Santali Bible © Bangladesh Bible Society, 2021.