Numeri 23
23
Biliamakʼ pạhil nạbi katha
1Ona tayom Biliam do Balake metadea, “Nonḍe iń lạgitʼ eae goṭecʼ pinḍ benaome ar onare samaṅko lạgitʼ eae goṭecʼ ḍaṅgra ar eae goṭecʼ bheḍa bondobosạńme.” 2Balak do Biliamakʼ katha lekageye kạmikeda ar unkin do mimitʼ pinḍre mimitʼ goṭecʼ ḍaṅgra ar mimitʼ goṭecʼ bheḍakin samaṅketʼkoa.
3Ona tayom Biliam do Balake metadea, “Okoe janwarkoante jeredokʼ samaṅokʼakʼem samaṅketʼ am do onko ṭhenge tahẽhataṛokʼme ar iń do onteń senlenge. Pasecʼ Probhu Isor do iń sãote ńapamokʼ lạgitʼgeye hijukʼkan. Ar iń ṭhen okae sodor onage amiń lạiyama.” Niạ katha menkate Biliam do nonkan mitʼṭecʼ burureye rakapʼena one onare jãhãn dare nạ̃ṛĩge baṅ tahẽkan.
4Unre Isor do uni sãoteye ńapamena. Ar Biliam doe menkeda, “Iń do eae goṭecʼ pinḍ iń benao akada ar mitʼke mitʼ pinḍ cetanre mitʼṭenkate ḍaṅgra ar mitʼṭenkate bheḍań samaṅketʼkoa.”
5Unre Probhu Isor do Biliamakʼ mocare katha dohoadeteye metadea, “Am do Balak ṭhen ruạṛ senkate noako katha lạiyaeme.”
6Unre Biliam do Balak ṭhene ruạṛ calaoena. Are ńelkeda, Balak do Moabren sanam mukhiyạko tulucʼ samaṅ akatʼko janwar ṭhene teṅgo akana. 7Unre Biliam do Isor emakʼ noa katha roroṛe ehopʼena:
“Balak do Aram disạm khon
ińe ạgukedińạ,
purub reakʼ buruko khon
Moab raj do ińe ạgukedińạ.
Uni doe menkeda, ‘iń ńutumte dela
Jakob sarapaeme,
Israelrenko upạrte bin bhạlạiyakʼ
katha baṛe lạiyạńme.’
8Isor bae sarap akatʼko hoṛ do,
cekateń sarapakoa?
Probhu Isor okoe upạrte bin bhạlại reakʼ
katha bae roṛakatʼ,
onko upạrte cekate iń do
bin bhạlại reakʼ katha doń roṛa?
9Iń do buru muthni khoniń ńelketʼkoa;
ar buru cetan khon onkoń
ạribạndhi akatʼkoa.
Nonkan mitʼṭen jạtrenkoń ńelketʼkoa
okoe do eṭakʼko khon pharakreko tahenkan;
onko do eṭakʼ sanam jạtrenko sãote
midokʼko lekako baṅkana.
10Jakob bõsrenko do
alekha dhuṛi leka
onko do okoeye lekha daṛekekoa?
Israelakʼ pon hạṭiń reakʼ mitʼ hạṭińhõ cetʼ
jãhãeye lekha daṛekekoa?
Onko dhorom hoṛko lekage
ińakʼ gujukʼ hõ baṛe hoyokʼtińma;
ar ińakʼ sesokʼ hõ onko lekage hoyokʼma.”
11Noa katha ańjomkate Balak do Biliame metadea, “Noa do cetʼem cekawạdińa? Iń do ińren bạiriko sarapako lạgitʼ iń ạguketʼmea ar am do onkom bhoratʼkoa.”
12Biliame roṛ ruạṛkeda, “Probhu Isor ińakʼ mocare okaṭakʼ kathae emadiń ona do cetʼ begor lạiyteń tahẽdaṛeakʼa?”
Biliamakʼ dosar nạbi katha
13Tayomte Balak do Biliame metadea, “Dela iń sãote ar mitʼ jaegare hijukʼme. Onḍe khon am do Israelkom ńelkoa. Onkoren sanamkogem ńelńamkoa ona do baṅ, eken onkoren mitʼ mucạtʼrengem ńelńam daṛeakoa. Ar onḍe khon iń ńutumte onkom sarapakoa.” 14Niạ menkate Balak do Pisga buru muthnire okare Sophim ṭạnḍi menakʼ onḍe uniye idikedea. Onḍe uni do eae goṭecʼ pinḍ benaokate mimitʼ goṭecʼ cetanre mitʼṭenkate ḍaṅgra ar mitʼṭenkate bheḍae samaṅketʼkoa.
15Ona tayom Biliam do Balake metadea, “Am do jeredokʼ samaṅokʼ lạgitʼ janwarko sorrege tahẽhataṛokʼme, ar iń do Probhu Isor sãoteń ńapam hecʼlenge.”
16Probhu Isor do Biliam sãoteye ńapamente uniyakʼ mocare kathae dohoadea, “Am do Balak ṭhen ruạṛ senkate noa katham lạiyaea.”
17Khan Biliam do Balak ṭhene ruạṛ senena. Uni doe ńelkeda Balak do Moabren mukhiyạkoante samaṅakatʼko janwar ṭhengeye teṅgo akana. Balak do uniye kulikedea, “Probhu Isor do cetʼe metatʼmea?”
18Biliam do unre Isor emakʼ niạ katha lạlạiye ehopʼkeda:
“E Balak raj ma beretʼme, ar ańjomme;
E Sipor hopon,
ińakʼ katha baṛe luturakʼme.
19Isor do manwae baṅkana
onate uni do eṛe kathae roṛa;
uni do manwa khon hõ bae janam akana,
onate moneye bodoltaea.
Uni okae men ona do hoyokʼgea,
ar acʼakʼ gokʼakʼ do jaogeye purạueda.
20Iń do onko ạsirbadako lạgitʼ
hukum iń ńam akada.
Uni do Israelkoe bhor akawatʼkoa,
iń do bạń bodol daṛeakʼa.
21Uni do Jakobre cetʼ ghạṭge
bae ńel akada,
ar Israelkoakʼ bhạgre jãhãn dukge bae dohoakada.
Onkoren Probhu Isor do
onko sãorege menaea,
ar onkoren rajakʼ sạhnạs do
onko ṭhenge menakʼa.
22Uni do Misor khon
onkoe oḍok ạgu akatʼkoa,
bir ḍaṅgrawakʼ daṛe leka
onkoakʼ daṛe do.
23Jakob cetanre jãhãn gonokko do
ohoge cahṭao daṛelena;
Israelko cetanre jãhãn
mantar hõ ohoge cahṭaolena.
Jakob, metakʼme Israel reaṅ do
ńitokʼ noa katha menogokʼa,
‘Isor okae ceka akatʼ ona ńelme.’
24Noko hoṛko do kul eṅga lekako
teṅgo rakapʼa,
ar dhạcri kul lekage
onko doko beretʼa.
Sendra gocʼko reakʼ mãyãm ar jel
ạuriko jom hạbicʼ
onko do bako jirạukʼa.”
25Niạ katha ańjomkate Balak doe menkeda, “Thirokʼme, onko do sarap hõ alom sarapakoa ar bhor hõ alom bhorakoa.”
26Biliame roṛ ruạṛkeda, “Iń do cetʼ bạń lạiyatʼmea, Probhu Isor okae mitạń onage roroṛ hoyokʼtińạ mente?”
Biliamakʼ tesar nạbi katha
27Tayomte Balak do Biliame metadea, “Dela, ar mitʼ jaegateń idimea. Pasecʼ Isor do kusite onḍe khon iń ńutumte onkoe sarapako.” 28Niạ menkate Balak do Piạr burute one onḍe khon hahaṅkar reakʼ Jisimon ńel ńamokʼ onḍe Biliame idikedea.
29Unre Biliame menkeda, “Nonḍe iń lạgitʼ eae goṭecʼ pinḍ benaome ar eae goṭen ḍaṅgra ar eae goṭen bheḍa samaṅko lạgitʼ bondobosạńme.” 30Biliamakʼ katha lekage Balak doe onkakeda. Uni do mimitʼ pinḍre mimitʼ goṭen ḍaṅgra ar mitʼṭenkate bheḍae samaṅketʼkoa.
Santali Bible © Bangladesh Bible Society, 2021.