Numeri 19
19
Saphakʼ reakʼ dakʼ
1Inạ tayom Probhu Isor do Mose ar Arone galmaraoatʼkinạ. 2“Niạ do iń emakʼ mitʼṭecʼ ạn-ạri kana: aben do Israelkoben metakoa jemon nonkan niphuṭ utạricʼ mitʼṭen arakʼ gạiko ạguam okoe do hoṛmore jãhãn dos bạnukʼtae ar uniyakʼ tarenre tishõ arãṛ baṅ lade akawade. 3Uni ạgukate naeke Eliasar ṭhenpe jimạyea. Ar ḍera bahre idikate uni samaṅrepe gurea. 4Ona tayom naeke Eliasar do acʼakʼ kạṭupʼte thoṛa mãyãm hataokate ńapamokʼ tạmbu samaṅre eae dhaoe irciya. 5Ar uni samaṅrege gạiyakʼ harta, jel, lacʼ ar gubriko sudhạpe atar giḍikakʼa. 6Uni gại tinreye atarokʼa unre naeke do debdạru reakʼ kaṭ, husopʼ ḍạr ar jeṅgetʼ arakʼ sutạm ona cetanreye khadlekakʼa. 7Inạ tayom naeke do acʼakʼ kicricʼko dakʼteye saphaetaea are ḍạbrạ saphakʼa. Ar inạ tayom do ḍera bhitriteye bolo daṛeakʼa, menkhan ạyupʼ hạbicʼ besapha akan tahen hoyokʼtaea. 8Okoe uni gạiye atare uni hõ acʼakʼ kicricʼko saphae hoyokʼtaea are ḍạbrạ saphakʼa ar ạyupʼ hạbicʼ besapha akane tahena. 9#Ibr 9.13Sapha menae nonkan jãhãe hoṛ uni gạiyakʼ torocʼko hạr samṭaokate ḍera bahre jãhãn sapha ṭhạ̃iteye oḍok idiya. Ar ona torocʼ do Israelkoakʼ saphakʼ reakʼ dakʼ benao lạgitʼe dohokakʼa. Noa do chut khon saphakʼ lạgitʼ beohar hoyokʼa. 10Okoe hoṛ uni gạiyakʼ torocʼe samṭao idiy uni hõ kicricʼkoe saphaetaea ar ạyupʼ hạbicʼ besapha akane tahena. Noage Israelko ar onare girobasokʼ kan eṭakʼ jạtren hoṛko lạgitʼ piṛhike piṛhi mitʼṭecʼ niạm do tahẽna.
11“Jãhãege jãhãn mạ̃ṛĩye joṭed enḍekhan uni do eae din hạbicʼ besapha akane tahena. 12Uni do tesar ar eae din hilokʼ saphakʼ reakʼ dakʼte saphakʼ hoyokʼtaea ar ona tayom doe saphakʼa. Menkhan tesar ar eae hilokʼ hõ apnar bae saphakʼ enḍkhan uni do besapha akangeye tahena. 13Jãhãege jãhãn mạ̃ṛĩye joṭed tayom apnarte bae saphakʼ enḍekhan uni do Probhu Isorakʼ sekʼwa tạmbui besapha ocoytaea. Ar onate uni hoṛ do Israelko tala khon meṭao utạre hoyokʼa. Uniyakʼ hoṛmore saphakʼ reakʼ dakʼ baṅ irci akawadete uni do besapha akangeye tahena ar uniyakʼ besapha do uni cetanrege tahẽ utạrokʼa.
14“Jãhãe hoṛ tạmbu bhitrireye gocʼlen khan noa niạmge manao hoyokʼa- ar okoe ona tạmbu bhitriteko bolokʼ ar okoe ona tạmbureko tahẽkan onko jotoge eae din hạbicʼ besapha akanko tahena. 15Ar onḍenakʼ okako bhajan do oṭakʼge tahẽkan onako hõ besapha akan hoyokʼa.
16“Lạṛhại iạte se ṭạnḍireye gocʼakan nonkanicʼe joṭetʼ akade hoṛ hõ eae din hạbicʼ besapha akane tahena. Jãhãege topa se manwa jaṅe joṭed uni hõ eae din hạbicʼ besapha akane tahena.
17“Nonkan hoṛkoakʼ chut meṭaokʼ lạgitʼ do okoeṭakʼ gạiye atar ocoakan uniyakʼ thoṛa torocʼ miṭen celaṅre dohokate onare jharna dakʼ dulakʼ hoyokʼa. 18Ar ona tayom sapha menae nonkan mitʼṭecʼ hoṛ do husopʼ reakʼ ḍạr ona dakʼreye topoya ar ona tayom do tạmbu ar ona bhitri reakʼ jinisko ar hoṛko cetanreye irciya. Manwa jaṅ se topa se mạ̃ṛĩye joṭetʼ akatʼ hoṛ cetanrehõ ona dakʼ do irciyae hoyokʼa. 19Sapha menae hoṛ do chut hoṛ cetanre tesar ar eae din hilokʼre ona dakʼe irciaya ar eae din hilokʼ do uniye saphakʼa. Ar okoeye sapha ocokʼkan uni do acʼakʼ kicricʼkoe saphaetaea are ḍạbrạ saphakʼa ar enhilokʼ ạyupʼ khon doe saphakʼa. 20Besapha tayom jãhãe apnarte bae saphakʼ enḍekhan uni do acʼakʼ somaj khone meṭao ocokʼa, ente apnarte sapha baṅkate uni do Probhu Isorakʼ sonot tạmbui besapha ocoyeda. Saphakʼ reakʼ dakʼ unire baṅ irci akante uni doe besaphagea. 21Israelko lạgitʼ noa do mitʼṭecʼ tahẽ utạrakʼ niạmge hoyokʼa.
“Okoe hoṛ noa saphakʼ reakʼ dakʼe irciy uni hõ acʼakʼ kicricʼkoe saphaetaea. Ar jãhãege noa saphakʼ reakʼ dakʼe joṭed enḍekhan uni do ạyupʼ hạbicʼ besapha akane tahena. 22Besapha akan hoṛ jãhãnakʼgeye joṭed onage besaphawakʼ hoyokʼa ar uni joṭetʼakʼ jinis okoeye joṭed uni hõ ạyupʼ hạbicʼ besapha akane tahen.”
Santali Bible © Bangladesh Bible Society, 2021.