Numeri 15
15
Dãṛẽ Samaṅokʼakʼko reaṅ
1-5Probhu Isor do Mose Israelko noa katha galmaraoakoe metadea, “Okaṭakʼ disạm do apeakʼ disạm menkateń emape lạgidokʼkan onḍe sen tayom kusi ocoyiń lạgitʼ jut so lekate apeakʼ palren ḍaṅgrako, bhiḍiko se meromko ạgukate iń ńutumte seṅgelteakʼ jeredokʼ samaṅokʼakʼpe samaṅa. Ar samaṅokʼren mimitʼ janwarko sãote jomakʼ samaṅokʼakʼ ar coḍor samaṅokʼakʼ- baṅ do jeredokʼakʼ samaṅokʼakʼ baṅ do bises manotakʼ samaṅokʼakʼ baṅ do apnarakʼ kusiteakʼ samaṅokʼakʼ baṅ do jãhãn porob reakʼ samaṅokʼakʼkan. Samaṅokʼicʼ janwar do bheḍa hopone hoylen khan uni sãote jomakʼ samaṅokʼakʼ lạgitʼ sunumre sipiyakʼ holoṅ hõ jạruṛa. Ona holoṅ do mitʼ keji irạlsae gram ar sunum do mitʼ liṭar lagaokʼa. Ar coḍor samaṅokʼakʼ lạgitʼ do mitʼ liṭer darkha rasa ạgui hoyokʼa. 6Janwar doe bheḍakan khan jomakʼ samaṅokʼakʼ lạgitʼ sunumte sipiyakʼ holoṅ ạgu darae hoyokʼa. Ar pe keji turuisae gram holoṅ ar soa liṭar sunum ạgui hoyokʼa. 7Coḍor samaṅokʼakʼ lạgitʼ do soa liṭer darkha rasa ạgui hoyokʼa. Ona tayom Probhu Isor kusi ocoye lạgitʼ jut so menkate Probhu Isor ṭhen samaṅ hoyokʼa. 8Jeredokʼ samaṅokʼakʼren se bises manotakʼ samaṅokʼakʼ se sulukren samaṅokʼakʼ lạgitʼ iń ṭhen ḍaṅgrape ạguye khan, 9enḍekhan ona sãote jomakʼ samaṅokʼakʼ lạgitʼ sunum mesalakatʼ holoṅ hõ ạgui hoyokʼtapea. Ona holoṅ do mõṛẽ keji ponsae gram ar sunum do mitʼ liṭer pe poa lagaokʼa. 10Niạ sãote coḍor samaṅokʼakʼ lạgitʼ mitʼ liṭer pe poa darkha rasa hõ ạgui hoyokʼa. Noa do seṅgelteakʼ mitʼṭecʼ samaṅokʼakʼ kana one ona reakʼ jut so iń doń kusiyakʼkan.
11“Mimitʼ ḍaṅgra se bheḍa, ar mimitʼ bheḍa hopon se merom boda nonkage dãṛẽko hoyokʼa. 12Jãhãtinạkʼ janwargepe samaṅko mitʼke mitʼ janwar do niạ niạm lekage samaṅko hoyokʼa. 13Probhu Isor khusi ocoye lạgitʼ jut so menkate seṅgelteakʼ samaṅokʼakʼ oktere mitʼke mitʼ Israelko do noa niạmtege samaṅ hoyokʼtakoa. 14Eṭakʼ jạtren jãhãe hoṛ se ape talareko girobasokʼ kan eṭakʼ jãhãe hõ Probhu Isor kusi ocoye lạgitʼ jut so lekate seṅgelteakʼ samaṅokʼakʼe samaṅ enḍekhan uni do ape leka jotowakʼge korao hoyokʼtaea. Ar niạ niạm do piṛhike piṛhi tahena. 15Ape somajre sanamko lạgitʼ niạ niạmge tahẽyena-baṅ do apere ar baṅ do ape talareko girobasokʼ kan eṭakʼ jạtrenko talare. Piṛhike piṛhi niạ niạm do tahẽidikʼa. Ona babotre Probhu Isor samaṅre ape cetʼleka onkage eṭakʼ jạtrenko hõ. 16#Lev 24.22Ape lạgitʼ ar ape talareko girobasokʼ kan eṭakʼ jạtren hoṛko lạgitʼ inạ mitʼ hukum ar inạ mitʼ ạn-ạrige tahẽyena.”
17-19Inạ tayom Probhu Isor do Mose Israelko niạ katha galmaraoakoe metadea, “Okaṭakʼ disạmteń idiyetʼpe onḍe senkate disạm reakʼ phosolpe jomre ona phosol do Probhu Isor ńutumte tulokʼ samaṅokʼakʼ mentepe samaṅa. 20Pạhil rakabokʼ phosol reakʼ holoṅte do piṭhạ benaokate khạrại reakʼ tulokʼ samaṅokʼ lekage onape tul samaṅa. 21Pạhilre rakapʼakʼ anaj reakʼ noa samaṅokʼakʼ do piṛhike piṛhi iń ńutumte samaṅ hoyokʼtapea.
Bhulte behok reaṅ
22-24“Bhul iạte Mose hotete emakʼ Probhu Isorakʼ noako hukum reakʼ jãhãṭakʼ bape manao ar ona hukum emokʼ hilokʼ khon piṛhike piṛhipe onkae ar ona bhul do sanamkoakʼ bin baḍaege tahen, enḍekhan ona baḍae tayom Probhu Isor kusi ocoye lạgitʼ jut so lekate goṭa Israel jạtrenko do mitʼṭen ḍaṅgra ạgukate jeredokʼ samaṅokʼakʼko samaṅa. Ona sãote jaoge jomakʼ samaṅokʼakʼ ar coḍor samaṅokʼakʼ samaṅ hoyokʼa ar kại ńutumte mitʼṭen merom boda hõ samaṅe hoyokʼa. 25Naeke do goṭa Israel jạtrenko lạgitʼ ona behokakʼ reakʼe puruchuna. Onate onko do ikạko ńama, ente baḍaekate do bako onka akada ar onkoakʼ bhul iạte Probhu Isor ńutumte seṅgelteakʼ samaṅokʼakʼ ar kại ńutumte samaṅokʼakʼko samaṅa. 26Noate goṭa Israel jạtrenko ar onko talareko girobasokʼ kan eṭakʼ jạtren hoṛ hõ ikạko ńama, ente sanamkoge bhulreko tahẽkana.
27 #
Lev 4.27-31
“Menkhan eken mitʼ hoṛ bhulkate behokakʼe kạmi akatʼ khan enḍekhan uni do kại ńutumte samaṅokʼakʼ lạgitʼ mitʼ bochor umerren merom pạṭhi ạguiye hoyokʼtaea. 28Okoe hoṛ bhulkate nonkanakʼe ghạṭ khan naeke do Probhu Isor samaṅre uni hoṛakʼ ghạṭ reakʼ puruchun lạgitʼe kạmikataea. Ar ona puruchun tayom uni do ikạye ńama. 29Andhateye ghạṭ akatʼ nonkan mitʼke mitʼ hoṛ lạgitʼ hõ inạ niạmge tahẽyena. Uni do baṅ doe Israelkan baṅ doe eṭakʼ jạtren kan.
30“Menkhan Israelko se onko talareko girobasokʼ kan eṭakʼ jạtren hoṛko modren jãhãege baḍaekateye ghạṭ enḍekhan uni do Probhu Isore nindạuede kana. Onate uni do acʼ jạtrenko khone marao ocokʼa. 31Uni do Probhu Isorakʼ kathae nihạ̃t akatʼte ar uniyakʼ hukume bebatao akatʼte khạṭigeye marao ocokʼa, ar uniyakʼ dos do unirege paṛaokʼa.”
Jirạukʼ mãhã bebatao reakʼ sạjại
32Israelko hahaṅkarreko tahekanre mitʼ hoṛ do jirạukʼ mãhãre sahan ńam bakʼṛakane ńelena. 33Ar okoe uni sahan halaṅko ńelkede onko do Mose, Aron ar sanam Israelko ṭhenko idikedea. 34Menkhan nonkan hoṛ do cetʼ cekaye hoyokʼa ona reaṅ jãhãnakʼ baṅ men akante uni doko bondi dohokadea. 35Unre Probhu Isor do Moseye metadea, “Uni hoṛ do goje hoyokʼa. Israelko ḍera bahrete uniko idiyema ar dhiriteko tiń gojema.” 36Onate Israelko do Mose hotete emakʼ Probhu Isorakʼ hukum leka ḍera bahrete idikate dhiriteko tiń gocʼkedea.
Oyonakʼ reakʼ ańcar dạsi
37-38 #
Bib 22.12
Ona tayom Probhu Isor do Mose Israelko niạ katha galmaraoakoe metadea, “Ape do apeakʼ oyonakʼ reakʼ ańcarpe dạsiytapea ar mitʼke mitʼ dạsi do nil sutạmte kicricʼ sãotepe ḍuriyạkakʼa. Noa do piṛhike piṛhipe onkaea. 39Dạsikope ḍuriạwakʼa jemon onakope ńellere ińakʼ sanam hukumko reakʼ kathape disại ar onape manao. Enḍekhan ape do ińre bepạtiạukʼte apeakʼ ontor ar mẽtʼ reakʼ rij roṅre bape ạkhrińokʼa. 40Unre ińakʼ sanam hukumko manao reakʼ kathape disạya ar aperen Isor ńutumte begar akan hoṛpe tahena. 41Iń doń aperen Probhu Isor kana. Ar aperen Isor hoyokʼ lạgitʼge Misor disạm khoniń oḍok ạguakatʼpea. Ar ińkangeạń aperen Probhu Isor do.”
Santali Bible © Bangladesh Bible Society, 2021.