Numeri 14
14
Israelkoakʼ Hul
1Niạ katha ańjomkate Israelko do rarakʼko ehopʼena. Ar goṭa ńindạko rakʼ aṅgakeda. 2Onko do Mose ar Aron upạrteko karacʼ kurucʼena. Ar jotoko mitʼkate unkinko metatʼkinạ, “Misor disạmre se hahaṅkarregele gocʼlen khan bhage hoykokʼa. 3Probhu Isor do cedakʼ lạṛhạire gujukʼ lạgitʼ ona disạmteye idiyetʼlea? Onḍenko hoṛ do aleren bạhuko ar gidrạkoko recʼlea. Ona khon Misorte ruạṛ calakʼge cetʼ bhage baṅ tahẽkantalea?” 4Onko do ako akoreko mepenena, “Dela, mitʼṭen mukhiyạ bon teṅgoyea ar Misorte bon ruạṛ calakʼa.”
5Niạ obosta ńelte Mose ar Aron do Israelren goṭa dolrenko samaṅre otre kin taberena. 6-7Ar okoeko hoṛ do disạm cikʼyạ lạgitʼko senlen onko modren Nun hopon Josuạ ar Jephun hopon Kaleb do ạkinakʼ kicricʼkin oṛecʼkeda ar Israelren goṭa dolren hoṛkin metatʼkoa, “Okaṭakʼ disạm cikʼyạ lạgitʼle senlen ona do ạḍi napae disạm kana. 8Probhu Isor aboreye kusilen khan enḍekhan toa ar dumur rasa ạtukʼ ona disạmtegeye idibona, ar onageye emabona. 9#Ibr 3.16Menkhan ape do Probhu Isor upạrte alope hula. Ona disạmren hoṛ hõ alope botorakoa; ente onko do bon kedokʼ mańjan daṛeakogea. Onko do ohogeko rukhiyạ daṛelena. Alogepe botorakoa ente Probhu Isor do abo soṅgere menaea.”
10Menkhan onko do Josuạ ar Kaleb dhirite tiń gocʼkin lạgitʼko mepenena. Unre ńapamokʼ tạmbu khon Probhu Isorakʼ ṭhonok do sanam Israel hoponko samaṅre sodorena. 11Probhu Isor do Moseye metadea, “Onko do ar tinạkʼ din ińko nihạ̃tińạ? Onko talare cinhạkoń udukʼ akatʼrehõ ar tinạkʼ din ińre bepạtiạuko tahena? 12Iń do onkore mahamạriń paṛao ocoya ar onkoń gokʼ akawatʼko disạm reakʼ ạidạri do onko khoniń recʼ ocoya, menkhan onko khon hõ mitʼṭecʼ maraṅ jạtrenkoge am khoniń sirjạukoa.”
13 #
Exo 32.11-14
Niạ katha ańjomkate Mose do Probhu Isore metadea, “Amem onkae khan enḍekhan ona katha do Misorren hoṛkoakʼ luturre calakʼa. Ente amren hoṛ do onko tala khonge amakʼ daṛetem ạgu akatʼkoa. 14Unre Misorrenko do ona katha niạ disạmren hoṛko lạiyakoa. Ar E Probhu Isor, niạ disạmren hoṛko ańjomakada, am do Israelrenko sãotem tahenkana, ar E Probhu Isor, am do samna sạmnim sodorakana. Onkoko ańjom akada, amakʼ rimil khunṭi do onko cetanre menakʼa ar siń do rimil khunṭire ar ńindạ do seṅgel khunṭire onko laha lahatem calakʼkana. 15Onate sanamko mitʼ sãotem gocʼko enḍekhan eṭakʼ jạtrenko okoe do am reaṅ kathako ańjomakatʼ onkoko mena, 16Probhu Isor do kiriạ akawatʼko disạmte bae idi daṛe akokante hahaṅkarreye gocʼketʼkoa.
17“Ńitokʼ do E Probhu Isor, amakʼ daṛe baṛe udugtam. Cetʼlekam menakatʼ, baṅma, 18#Exo 20.5,6; 34.6,7; Bib 5.9,10; 7.9,10‘Probhu Isor do ạḍi anecʼ edrekʼicʼ ar dayateye kisạ̃ṛgea uni do behok ar hul ikʼkạyicʼ kanae menkhan dusiyicʼ doe sạjạiyea; ar apatkoakʼ kại do hoponko ṭhen pe pon piṛhi hạbicʼe pańja halayetʼkana.’ 19Misor disạm bạgiyakʼ khon ńitʼ hạbicʼ cetʼlekam ikạ akatʼko onkage amakʼ ona asambheṛ dayate onko hoṛakʼ ghạṭko ikạkatakom.”
20Unre Probhu Isore menkeda, “Amakʼ katha lekage onkoakʼ kạiyiń ikạkatʼtakoa. 21#Ibr 3.18Menkhan ińiń jiwetʼge noa katha cetʼleka sạrikan onkage goṭa dhạrti hõ ińakʼ ṭhonokte perecʼgea ar noa cetʼleka sạrikan onkage, 22-23noko hoṛren mitʼ hoṛhõ ona disạm do bako ńela, one okaṭakʼ disạm lạgitʼ onkoren hapṛamko ṭheniń kiriạlen. Ente noko hoṛ do Misorre ar hahaṅkarre ńelakʼ ińakʼ hahaṛa kạmi ar cinhạ kạmiko ńelkate hõ ińko nihạ̃t akadińạ ar gel dhaoko biḍạu aṭkar akadińạ. Okoe ińko nihạ̃t akadiń onko do okoehõ ona disạm bako ńel tioga. 24#Josu 14.9-12 Menkhan ińren golam Kalebakʼ monre onkanakʼ do bạnukʼa uni do purạte ińakʼ kathakoe senakʼkana. Onate uni okaṭakʼ disạmteye senlen ona disạmiń idiyea ar uni bõsrenko do ạidạri lekate onako ńama. 25Onako buru tala otetre ńitokʼ do Amelekiko ar Kananrenko girobasokʼ kana. Ape do gapage ạcurokʼte Arakʼ dõreao reakʼ horte hahaṅkar secʼpe mohnḍakʼa.”
26Inạ tayom Probhu Isor do Mose ar Arone galmaraoatʼkinạ, 27“Noko bạṛicʼ jạtrenko do ar tinạkʼ din iń upạrteko karacʼ kurujokʼa? Iń do onkoakʼ karacʼ kurujokʼ iń ańjomakada.” 28Probhu Isor do Mose ar Aron Israelko memene metatʼkinạ, “Kiriạkateń meneda, iń Probhu Isor oka katha roroṛ iń ańjom akatʼpe onageń onkawapea. 29#Ibr 3.17Ape modren okoe do bargel bochor se ona khon ḍher umerrenko lekha ocolen, metakʼme okoe iń upạrteko karacʼ kurucʼlen, onkoakʼ mạ̃ṛĩ do niạ ṭoṭharege seyakʼtakoa. 30Ar girobasokʼ lạgitʼ oka disạm emapeyiń gokʼletʼ eken Jephun hopon Kaleb ar Nunren hopon Josuạ chaḍa ar okoe hõ ona disạmte bako bolo ńama. 31Aperen okoeko hopon ar hoponerako recʼ ocokʼ reakʼ kathape menletʼ onkoge iń do ona disạmteń idikoa. Onkoge onepe nindạu akatʼ disạmko ạidạri joṅa. 32Apeakʼ mạ̃ṛĩko do niạ hahaṅkarrege seyakʼtapea. 33#Apos 7.36Ar hahaṅkarre ạuripe gujukʼ arpe seyakʼ hạbicʼ apeakʼ bepạtiạu iạte aperen hopon ar hoponerako do pongel bochor hạbicʼ nonḍege bhiḍiko gupi baṛakoa. 34Disạm cikʼyạre oka pongel din lagaolen ona mimitʼ din reakʼ mitʼ bochorkate jotote pongel bochor hạbicʼ ape do apeakʼ behokakʼ lạgitʼ kosṭope joma arpe bujhạua daṛeakʼa, ape upạrteń teṅgolen khan oka hal hoyokʼtapea mente. 35Noko bạṛicʼ jạtren hoṛko okoe do iń upạrte dolko pakaoetʼ onko sanamkoge niạ hahaṅkarreń marao cabakoa. Iń Probhu Isorge noa katha doń meneda.”
36Disạm cikʼyạ ạgui lạgitʼ Moseye kolletʼko modren okoeko hoṛ do ạuṛiyakʼ kathako pasnaoletʼte Mose upạrte karacʼ kurujokʼ lạgitʼko uskurketʼko, 37metakʼme okoeko hoṛ do ona disạm reaṅ bạṛicʼ katha roṛ baṛae lạgitʼ dạyiko tahẽkan onko joto do Probhu Isor samaṅre mahamạriteko gocʼena. 38Eken Nun hopon Josuạ ar Jephunren hopon Kaleb jiwetʼkin tahẽyena.
39Mose do Probhu Isorakʼ sanam kathako Israelkoe baḍae ocoketʼkoa. Ar onate onko do ạḍiko bhabnayena. 40Dosar hilokʼ setakʼ jokhecʼ onko do ona buru ṭoṭha secʼ calakʼ lạgitʼ sapṛaoenteko menkeda, “Nõkʼõele teargea. Ale dole kại akada; ńitokʼ do Probhu Isore gokʼakatʼ disạmtegele calakʼa.”
41Menkhan Moseye metatʼkoa, “Cedakʼ ape do Probhu Isorakʼ hukum upạrtepe calakʼ kana? Apeakʼ noa kạmi do baṅ jo bahakʼ tapea. 42Alope rakapʼ calakʼa, ente Probhu Isor do ape soṅgere bạnuiya. Bạiriko ṭhenpe bhagao ocokʼa. 43Onḍe ape do Amalekiko ar Kananrenko samaṅrepe paṛaokʼa. Ar Probhu Isor khonpe sahaṛ akante uni do ape tulucʼ bae tahena. Onate ape do lạṛhạirepe gujukʼa.”
44Enhõ onko do dilkate ona buru ṭoṭha secʼko laha idiyena. Menkhan Mose do bae senlena ar Probhu Isorakʼ bondobos sinduk hõ ḍerarege tahẽyena. 45Onko ńelte buru ṭoṭharen Amalekiko ar Kananrenko do pheḍ hecʼkate onkoko jhuṭiạuketʼkoa ar Horma nagraha hạbicʼko laga idiketʼkoa.
Santali Bible © Bangladesh Bible Society, 2021.