Numeri 12
12
Mạriạme sạjại ocokʼkan
1Mose do Kus jạtren mitʼṭen maejiue baplaledea. Nui Kus jạtren maejiu iạte Mạriạm ar Aron do Mose upạrte katha roroṛkin ehopʼena, 2“Probhu Isor do cetʼ eken Mose tulucʼe galmaraoeda? Ạliń tulucʼ do cetʼ bae roṛakada?” Probhu Isor do noako katha reakʼe ańjomkeda. 3Mose do ạḍi mạ̃hir hoṛe tahẽkana, uni do dhạrtiren sanam manwako khon hõ mạ̃hirge.
4Aron ar Mạriạmakʼ katha ańjom sãote Probhu Isor do Mose, Aron ar Mạriạm takoe metatʼkoa, “Pe hoṛge ńapamokʼ tạmbu ṭhen oḍok hijukʼpe.” Niạ katha ańjomkate onko do pe hoṛge onḍeko oḍok hecʼena. 5-6Unre Probhu Isor do rimil khunṭi khon ńapamokʼ tạmbu reakʼ duạr ṭhen teṅgo akan Aron ar Mạriạme hohowatʼkinạ. Arkin hecʼ soren khan Probhu Isor doe metatʼkinạ, “Ińakʼ katha ańjom ben. Ape talare jãhãege nạbiye tahen khan iń Probhu Isorge dorson hotete uni ṭheniń sodorokʼa ar kukmũ talate uni sãoteń galmaraoa. 7#Ibr 3.2Menkhan ińren golam Mose sãote do bạń onka akada. Uni do ińakʼ gharońj reakʼ kạmireye pạtiạrgea. 8Iń do uni tulucʼ samna sạmni kathań roṛeda, jãhãn kukmũ talate do baṅ. Probhu Isor oka lekae ńel ocokʼ uni do onkae ńeleńkana. Inạ tayom hõ ińren golam Mose upạrte katha roroṛ do baben botorlena?”
9Aron ar Mạriạm upạrte Probhu Isorakʼ pit do caṛhaoentaea. Ar uni doe calaoena. 10Ona rimil khunṭi tinre ńapamokʼ tạmbu bạgikate cetante rakabokʼ ehopʼena unre ńelena, Mạriạmakʼ hoṛmore murhucʼ jom rog do him leka ponḍge rakapʼena. Ar Aron hõ Mạriạm secʼe beṅgetʼketʼ khan hoṛmore murhucʼ jom roge ńelketʼtaea. 11Ona ńelte uni do Moseye metadea, “E ạlińren kisạ̃ṛ, bebuj iạte okaliń kại akatʼ ona do alom sabtạlińa. 12Okoe gidrạ do eṅgat kukhi khon adha jelge jomakantaye janam akan Mạriạm do onka alom hoeocoya.”
13Unre Mose do ãṭ aṛaṅte hohoate Probhui metadea, “E Isor, uni baṛe bogeyeme.”
14 #
Num 5.2,3 Probhu Isor do Moseye metadea, “Uniren apattetʼ uniyakʼ mẽtʼãhãreye thoae khan enḍekhan uni do cetʼ ona eae din lajao paṛare bae tahẽkokʼa? Uni do eae din ḍera bahrere dohokae hoyokʼa, ar ona tayom doe ruạṛ ạgu ocokʼa.” 15Ona iạte Mạriạm do eae din hạbicʼ ḍera bahrete idikateye doho ocoyena. Ar uni ạuri ruạṛ ạguiye hạbicʼ hoṛko do bako uṭhạulena.
16Inạ tayom Israelko do Hasoret bạgikate Paran hahaṅkarte senkateko ḍerayena.
Santali Bible © Bangladesh Bible Society, 2021.