Numeri 11
11
Probhu Isorakʼ seṅgel
1Israelko talare oka duk ar kosṭo hoyokʼkan tahẽkan onate onko do Probhu Isor samaṅreko karacʼ kurujokʼkan tahẽkana. Ona ańjomte Probhu Isor doe edreyena. Uniyakʼ seṅgel do onko talare jolokʼ ehopʼena ar ḍeraren thoṛa hoṛ doko lo gocʼena. 2Noa iạte onko do Mose ṭhenko rakʼkeda ar uni do Probhu Isor ṭhene koekeda. Ar onate seṅgel do ĩṛĩcʼena. 3Probhu Isorakʼ noa seṅgel onko talare jolokʼkan tahẽkante ona jaega reakʼ ńutum do Tabera#11.3: Tabera: Noa ńutum reakʼ Hebrew mane do “jolokʼ seṅgel.” hoyena.
Jel reakʼ bebosta
4Israelko sãote eṭakʼ eṭakʼ jạtren okoeko hoṛko tahẽkan onko do eṭakʼ lekan jomakʼ lạgitʼ laloc hecʼatʼkoa. Onko ńelte Israelko do rakʼate memenko ehopʼena, “Hae, jel baṛele jom ńamle khan! 5Ale do Misor disạmre begor damte hakole jometʼko tahẽkana. Ona chaḍa taher, tormuj, kaḍa peaj, peaj ar rạsun reakʼ katha hõle disạyeda. 6Menkhan nonḍe do jiwetʼ hoṛmo udạs cabayentalea. Manna chaḍa ar cetʼge bale ńeleda.”
7 #
Exo 16.31
Manna do ńelokʼte dhạniạ jaṅ ar guggul leka tahẽkana. 8#Exo 16.13-15 Ar hoṛko do onako halaṅ ạgujoṅkan tahẽkana ar jantere ar baṅ khan ukhuṛreko huṛuṅ gunḍạyetʼ tahẽkana. Onko do celaṅre ona andakʼkate piṭhạko benaoetʼ tahẽkana. Ona reakʼ sebeltetʼ do sunumte benaoakʼ piṭhạ leka tahẽkana. 9Ńindạ do ḍerakore sisir ar ona sãote Manna hõ ńurokʼkan tahẽkana.
10Moseye ańjomkeda mimitʼ gharońjren hoṛ do akoakʼ nij nij tạmbu ṭhenko rakʼjoṅ kana. Noa iạte Probhu Isor doe edreyena ar Mose hõ onkoreye ạṛisena. 11Uni do Probhu Isore metadea, “Iń amren golam do cedakʼ muhinrem paṛaokedińa? Am bekusi ocome leka do cetʼ iń ceka akatʼte, noko hoṛkoakʼ bojha iń cetanrem ladeakawạdińa? 12Iń do cetʼ noko hoṛko kukhireń ńam akawana? Noko do cetʼ iń janam akatʼkoa? Nokoren hapṛamko ṭhen okaṭakʼ disạm emokʼ reakʼem gokʼatʼko tahẽkan onḍe hobor nunu gidrạko leka cedakʼ idiko lạgitʼem mitạńkana? 13Noko hoṛko lạgitʼ jel do okareń ńama? Onko do iń ṭhenko rakʼeda ‘jelko joma.’ 14Onkoakʼ bojha do ạḍi hamalgea, iń eskarte ona do ohogeń gokʼ daṛelea. 15Iń cetanrem nonkae khan nonḍe ńitge baṛe gojeńme. Ar amakʼ dayań ńamakatʼ khan ińakʼ mẽtʼte nonkan bạṛicʼ dosa do alom ńel ocoyińạ.”
16Probhu Isor do Moseye metadea, “Israelko talare okoe do mukhiyạ arko lekman hoṛkan onko modren nonkan eaegel murubbiko iń ṭhenem ạgukoa. Onko do ńapamokʼ tạmbu ṭhen hecʼkate am sãote teṅgokʼ lạgitʼem metakoa. 17Iń do onḍeń pheḍ hijukʼa ar am tulucʼ iń galmaraoa. Am cetanre okoe Jiu menae uni do onko cetanre hoń emokʼa. Hoṛkoakʼ bojha gog lạgitʼ onkoge amren gokʼṛokoko hoyokʼa. Onate am eskar bojha gogokʼ do baṅ lagaoama. 18Am do hoṛkom metakoa, ‘ape do gapage Probhu Isor ńutumte begarokʼ lạgitʼ sapṛaokʼpe, ente gapage jelpe joma. Ape do Probhu Isor ṭhen rakʼte jel reakʼ kathape menleda ar noa hõpe roṛleda, noa khon Misor disạmrege bhagepe tahẽkana. Onate ńitokʼ uni do jele emapea arpe joma. 19Ona jel do eken mitʼ din, bar din, mõṛẽ din, gel din, se bargel dinpe joma ona do baṅ, 20menkhan goṭa candoge mũ moca khon hirkhạge ạuri oḍokokʼ hạbicʼpe joma. Noako hoyokʼa ente okoe ape talare menae uni Probhu Isorpe nihạ̃t akadea ar uni samaṅre rakʼatepe menakada, Misor disạm bạgiyakʼ do ṭhikakʼ baṅ hoylentalea.’ ”
21Noa katha ańjomte Moseye menkeda, “Lạṛhại daṛeakʼ lekan nonkan turui lakh hoṛ iń sãore menakʼkoa, ar am dom meneda goṭa mitʼ candoge jelem jom ocokoa. 22Onkoren sanam mĩhũ-meromem gur lekore hõ onko lạgitʼ do cetʼge oho hoylena. Ar jalapuriren sanam hako sapʼkate ạgulekore hõ onko do ohoko anṭaolena.”
23Probhu Isor do Moseye roṛ ruạṛadea, “Probhu Isorakʼ daṛe do cetʼ komgea? Ińakʼ katha amre sạrikana se baṅa ona do ńitgem ńela.”
24Noa katha ańjomkate Mose do bahrete senkate Probhu Isor okae menketʼ hoṛko onae baḍae ocoketʼkoa. Uni do Israelkoren eaegel murubbiko ạgukate ńapamokʼ tạmbu samaṅreye teṅgoketʼkoa. 25Unre Probhu Isor do ona rimilreye pheḍ hecʼente Mose sãoteye galmaraokeda. Ar Mose cetanre okoe Jiue tahekan uni do onko eaegel murubbiko cetanre hõe emena. Ar tinre uni Jiu onkoreye hecʼena unre onko do thoṛa ghạṛicʼ lạgitʼ nạbi lekate kathako roṛkeda.
26Unre Eldad ar Medad ńutuman bar hoṛ do ḍera bhitrire kin tahẽkana. Unkin hõ bachao akan murubbiko modre kin tahẽkana, ar ńapamokʼ tạmbu ṭhen bạkin sen akan tahẽkana. Enhõ unkin cetanre uni Jiue hecʼena. Unre unkin hõ ḍera talare nạbi lekate katha roroṛkin ehopʼena. 27Unre mitʼṭecʼ juạn hoṛ do dạṛ idikate Moseye metadea, “Eldad ar Medad do ḍerare nạbi lekate kathakin roroṛkana.”
28Unre Nun hopon Josuạ do Moseye metadea, “E baba Mose, unkin thirokʼ baṛe metakinme.” Josuạ do juạn okte khon Moseren mitʼṭecʼ gokʼṛoyicʼe tahẽkana.
29Moseye roṛ ruạṛkeda, “Ińakʼ manotge am ṭhen do maraṅena? Ińiń khojogokʼakʼ do noage Probhu Isorren sanam hoṛge jemon nạbiko hoyokʼ ar Probhu Isor do acʼren Jiu onko cetanreye emokʼ.” 30Inạ tayom Mose ar Israelren murubbiko do ḍerateko ruạṛ senena.
31Tayomte Probhu Isor do mitʼṭecʼ hoeye ạgukeda. Ar ona hoe do jalapuri khon gunḍri cẽṛẽkoe oṭaṅ ạguketʼkote ḍera beṛhaete mitʼ din reakʼ hor hạbicʼ nonkae ńurhạketʼkoa, onko do ot khon bar moka hạbicʼ lade ghuguko aṭetʼ tahẽyena. 32Enhilokʼ siń ar ńindạ ar ona dosar din hạbicʼ hoṛko do bahrete oḍok senkate gunḍri cẽṛẽko halaṅ ạguketʼkoa. Onko mimitʼko do mitʼ hajar irạl sae keji kateko halaṅketʼkoa. Ar onko do ḍera beṛhaeteko aṛetʼkatʼkoa. 33Menkhan onkoakʼ jelko togocʼ akatʼ ar ạuriko udrege Probhu Isor do hoṛko cetanre pit caṛhaoentaea. Ar onkoe ńẽtʼketʼkoa. 34Ona iạte ona jaega reakʼ ńutum do Kebrot-Hattawako ńutumkeda (mane do “Lalockoakʼ topa”), ar laloc iạte gocʼen hoṛ do onḍeko topaketʼkoa.
35Inạ tayom hoṛko do Kebrot-Hattawa bạgikate Hasoretre senkateko tahẽyena.
Santali Bible © Bangladesh Bible Society, 2021.