Jesaea 60
60
Jerusalem reakʼ ṭhonok
1Probhu Isore meneda, “E Jerusalem,
Beretʼme, marsal emokʼme, ente amakʼ marsal do sor hecʼakana;
Probhu Isorakʼ mạhima do marsale emam kana.
2Ńelme, dhạrti do ńutte dapal akana
ar boṅgan hoṛ jạtrenko cetanre do kaṛaṅ ńutge,
menkhan Probhu Isor do am cetanre marsale emokʼa
ar uniyakʼ mạhima do am cetanre sodorokʼa.
3Jạt jạtrenko do amakʼ marsal ṭhenko hijukʼa;
ar rapajko do aṅga marsal ṭhenko hijukʼa.
4“Am do beṛhaete beṅgetʼ rakabme,
onko sanamkoge mitʼ domte am ṭhenko hijukʼkana;
amren hoponko do sạṅgiń khonko hijukʼkana
ar amren hoponerako doko heo ạgu ocokʼkana.
5Ona ńelte am do rạskạtem kharsalakʼa,
ar hulạstem perejokʼa;
jalapuri reakʼ dhon do am ṭhenko ạguiya,
ar jạt jạtrenkoakʼ dhon do am ṭhen hijukʼa.
6Amakʼ disạm do gạd gạd ũṭkote perejokʼa
Midian ar Epharen daṛean ũṭkotege.
Onko do sona ar kunduruwante Seba disạm khonko hijukʼa
ar Probhu Isorakʼ sabasiko jạhira.
7Kedarren pal bhiḍiko do am ṭhenko hecʼ jarwakʼa,
Nebayotren bheḍako do amakʼ kạmireko lagaokʼa;
ińakʼ pinḍre samaṅokʼakʼ lekate iń do onakoń ataṅa,
ar ińakʼ ṭhonokʼ reakʼ oṛakʼ do artetʼgeń ṭhonok ocoya.
8“Apnarakʼ tahen jaega secʼ parwa cetʼlekako uḍạu hijukʼ
onkage rimil lekako uḍạu hijukʼkan onko doko celekana?
9Sạrige sạṅgiń disạmren hoṛko do iń lạgitʼko koyokʼ horeda;
amren hoponko lạgitʼ sona rupạ reakʼ maraṅ maraṅ
Tạrsis jahajko do jotoko khon laha lahate hijukʼkana.
Israelren uni sonoticʼ do,
amren Probhu Isorakʼ ńutum sarhaotae lạgitʼ
amren hoponkoko hijukʼkana,
ente uni doe ṭhonok ocoakatʼmea.
10“Bidisiạko do arhõ amakʼ pạcriko gathao ruạṛa
onkoren rapajko doko sapʼ sorama.
Ar edrete amiń hạnletʼmere hõ
enhõ iń do amiń mãyãwama.
11 #
Sod 21.25,26 Amakʼ duạrko do jao okte jhicʼge tahena,
siń ar ńindạ tishõ onako do baṅ siń tahena
jemon boṅgan hoṛ jạtrenkoakʼ dhon am ṭhen ạgukʼ;
ar onkoren rapajko hõ onako soṅgete.
12Okoe jạtrenko ar rajosṭiko am bako sewawam onko doko jarkharokʼa,
arko marao utạrokʼa.
13“Lebanon reakʼ mạhima do am ṭhen hijukʼa;
ińakʼ sonotakʼ ṭhạ̃i sajao lạgitʼ
saro dare, jhao dare ar tạsur darekoge ạgukʼa;
ar iń do ińakʼ jaṅga reakʼ ṭhạ̃iyiń ṭhonok ocoytińạ.
14 #
Sod 3.9
Okoe amko santaoetʼme tahẽkan
onkoren hoponko do am ṭhen tumbutʼkateko hijukʼa;
ar okoeko nihạ̃tetʼme tahẽkan onko jotoge amko ḍobokʼama
ar Probhu Isorakʼ nagraha,
Israelren uni sonoticʼakʼ Sion menteko bikạumea.
15“Am do bạgi arem hirkhạ ocolen tahẽkanre,
am talate okoehõ bako calakʼkan tahẽkana,
menkhan am do jaejug ṭhonokạnicʼ iń hoyocomea
piṛhi cetan piṛhi sanamkoren rạskạwạnicʼge.
16Gogo cetʼleka acʼren hopone nunuae
onkage boṅgan hoṛ jạtrenko ar rapajko do akoakʼ bhage bhage jinisko emama.
Ar unrem baḍae daṛeakʼa, iń Probhuge amren babańcaoicʼ,
amren chakʼḍaoicʼ, ar ińge Jakobren uni daṛeanicʼ do.
17Iń do pitạl bodolte sonań ạguama
ar mẽṛhẽtʼ bodolte do rupạge.
Kaṭ bodolte pitạl
ar dhiri bodolte do mẽṛhẽtʼgeń ạguama.
Bhạlại do amren ḍanṭaoicʼ
ar dhorom do amren mukhyiạgeń hoeocoya.
18Amakʼ disạmre jor jobor reakʼ katha ar do baṅ ańjomokʼa,
ar amakʼ simạna talare
jãhãn jarkharokʼ ar maraokʼ reakʼ katha hõ baṅ ańjomokʼa.
Babańcao do pạcriko reakʼ ńutum hoyokʼa
ar sarhao do amakʼ duạrko reakʼ ńutumge.
19 #
Sod 21.23; 22.5 Sińre siń cando reakʼ marsal do ar baṅ jạruṛama,
ńindạ cando reakʼ terdecʼ marsal hõ baṅa,
ente Probhu Isorge amren jaejug reakʼ marsale hoyokʼa,
ar amren Isorge amakʼ ṭhonoke hoyokʼa.
20Amren siń cando do tisge ar bae hạsurokʼa,
ar amren ńindạ cando hõ ar bae adokʼa.
Probhu Isorge amakʼ jaejug reakʼ marsale hoyokʼa;
ar amakʼ hirdạukʼ reakʼ dinko do mucạdokʼtama.
21Unre amren sanam hoṛ do dhoromko hoyokʼa;
onko do jaejug lạgitʼ disạmko ạidạrijoṅa.
Onko do ińakʼ tite, rohoe akan kahle kanako,
onko hotetege ińakʼ mạhima do sodorokʼa.
22Ape modre huḍiń utạricʼ do hajar hajare saṅgekʼa,
ar kạṭicʼ utạricʼ do daṛean jạtgeye hoyokʼa.
Iń kangeạń Probhu Isor do; okte nạpitre ińge usạrateń hoeocoya.”
Santali Bible © Bangladesh Bible Society, 2021.