Jesaea 59
59
Israelakʼ ghạṭ
1Ńelpe, Probhu Isorakʼ ti do baṅ khaṭotaea abo bańcao bon lạgitʼ; uniyakʼ lutur hõ baṅ goṛdhotaea aboakʼ ańjomta bon lạgitʼ. 2Menkhan apeakʼ kạige aperen Probhu Isor ṭhen khone begar akatʼpea. Apeakʼ ghạṭ iạtege uni doe dea giḍiakatʼpea; ar onatege bae ańjometʼtapea. 3Ente apeakʼ tiko do mãyãmte bhõnḍakana ar apeakʼ kạṭupʼ do ghạṭkote perecʼ akana. Apeakʼ moca do eṛe kathae roṛeda ar apeakʼ alaṅ do dusṭạmigeye phuṭạu akada. 4Okoe hõ hok reakʼ do bako mamblakʼ kana, okoe hõ dhorom salakʼ do bako okalotikʼ kana. Onko do ạuṛiyakʼregeko bhorsa joṅkana ar eṛe kathako roṛeda; onko do kukhire dusṭạmiko omon ocoyeda ar bạṛicʼakʼko jamaneda. 5Onko do bisan bińakʼ beleko oboreda ar bindi ganakʼko gakʼeda. Ar ona bele okoeye jom uni doe gujukʼa; ar onako reakʼ mitʼṭecʼ posakʼlen khan ona khon bisan biń doe oḍokʼ hijukʼa. 6Onkoakʼ bindi ganakʼte kicricʼ do baṅ hoyokʼa; ar okako horokʼetʼkan onate apnartetʼ hõ bako aḍ daṛeakʼa. Onko do joto kạmige bạṛicʼgetakoa, onkoakʼ tire do jor julumge menakʼa. 7#Rom 3.15-17 Onkoakʼ jaṅga do kại secʼge ńir calakʼtakoa; onko do bindusạnkoakʼ mãyãm joro ocoytako lạgitʼko usạrayeda. Onkoakʼ joto hudiskoge bạricʼgetakoa; onkoakʼ horre do jarkhar ar harkhetge menakʼa. 8Onko do suluk reakʼ hor bako baḍaea; onkoakʼ horre do hok reakʼ bicạrge bạnukʼa. Onko do akoakʼ horko konḍea akada; ar ona horte calakʼko do sulukokʼ bako baḍaea.
Kại aṅgoc
9Ona iạte hok reakʼ bicạr do abo ṭhen khon sạṅgińre tahen kana ar dhorom do abo hạbicʼ baṅ seṭerokʼ kana. Abo do marsal bon khojkana, menkhan jotoge ńutgea; ḍig ḍig marsal bon khojkana, menkhan kaṛaṅ kucạṅ ńutre bon dãṛãnkana. 10Abo do kãṛãko leka bhit bon ṭạmḍạu baṛayetʼkana; hẽ mẽtʼ bạnukʼtako hoṛ lekage hor bon ṭạmḍạu baṛayeda; abo do tikinge bon tohodokʼ kana; ar jiwetʼko talare gocʼko leka menakʼ bona. 11Abo sanamkoge bana leka bon hukạueda, ar parwa leka bon bak bạkureda. Abo do dhorom reakʼ bicạr ar bańcaoge bon khojkana, menkhan ona do ḍher sạṅgińre tahenkana.
12E Probhu Isor, amakʼ mẽtʼre alaeakʼ behokakʼ do ḍhergetalea; aleakʼ kại do ale upạrte gohae emetʼkana. Aleakʼ bedhoromtetʼ do ale sãorege menakʼa ar aleakʼ ghạṭko reaṅ dole baḍaekangea. 13Onako do hoyokʼkana, aleakʼ hul ar am baṅ aṅgocme, aleren Isor ṭhen khon sạṅgińte calakʼ, sasantao ar luṭ lạgitʼ uskạu ar mon khon eṛe katha phuṭạukate roṛ. 14Ona iạte hokʼ reakʼ bicạr do pạc ruạṛ akana ar dhorom do sạṅgińre teṅgo akana; sạriyakʼtetʼ do horreye tohodokʼ kana, ar sojheteakʼ do baṅ bolo daṛeakʼ kana. 15Sạriyakʼtetʼ do okare hõ baṅ sendra ńamokʼa, ar okoe bạṛicʼakʼe bạgiyakʼ uni doe santao ocokʼa.
Israelakʼ chaḍao
Probhu Isor do noakoe ńelkeda ar hok reakʼ bicạr bạnukʼte uni doe edreyena. 16#Jes 63.5 Uni doe ńelkeda are bhaṛoyena, ente hok reakʼ bicạr secʼ teṅgokʼ lạgitʼ do okoe hõ bạnukʼkoa; ar onatege uni do acʼakʼ daṛeanakʼ tite babańcao reakʼe kạmikeda ar uniyakʼ dhoromgeye teṅgo ṭarhaoadea. 17#Eph 6.14,17; 1 Th 5.8 Uni do koṛam aḍtae lạgitʼ dhoromgeye horokʼana ar bohokʼre do babańcaoge. Uni do hala hạli reakʼ kicricʼe horokʼkeda ar edre do kicricʼ leka hoṛmoreye oyowana. 18Ar hoṛ okako ceka akatʼ onage uni doe ruạṛakoa; ar okoe acʼ secʼrenko baṅkan onko cetanre acʼakʼ edreye dulakoa ar bạṛicʼ kạmi reakʼ sạjạiye emakoa. Uni do sạṅgiń disạmren hoṛkoakʼ kuṛại hõe emkatakoa. 19Pạchim secʼren hoṛko do Probhu Isorko botoraea ar purub secʼren hoṛ do uniyakʼ mạhima ńelteko botorokʼa, ente Probhu Isor do acʼakʼ sahẽtʼteye laga ńiretʼkan ḍubạ dakʼ lekae hijukʼa. 20#Rom 11.26 Probhu Isore meneda, “Jakobren okoeko kại khon monko ạcur akatʼtako onkoren chaḍaoicʼ do Sionreye hijukʼa. 21Onko lạgitʼ ińakʼ bondobos do noage: ińren Jiu okoe do apere menae ar ińakʼ okako katha apeakʼ mocareń emakatʼ ona do ape, aperen hoponko ar onkoren hoponkoakʼ moca khon baṅ adokʼa; ona do ńit khon jaejug hạbicʼ tahẽ akae tahena. Iń Probhu Isorge noa katha doń meneda.”
Santali Bible © Bangladesh Bible Society, 2021.