Jesaea 57
57
1Dhorom hoṛko maraokʼkan ona secʼ do okoehõ bako moneyakʼ kana. Isor bhokto hoṛ doko idi ocokʼ kana, menkhan okoege bako bujhạu daṛeakʼ kana, bạṛicʼ hoṛkoakʼ ti khon rukhiyạ ńam lạgitʼge onko doko idi ocokʼ kana mente. 2Okoe sojhe horteko calakʼkan onko do sulukko ńama; onko do gujukʼ hotete jirạuko ńama.
3Probhu Isore meneda, “E gunidar ạimạiren hoponko, laṭghaṭicʼ ar kusumbiren hoponko, dela nonḍe hijukʼpe. 4Ape do okoepe landa dhutʼae kana? Ar okoepe isiṛae kana ar alaṅpe totʼae kana? Ape do cetʼ sasantaoicʼ ar ekʼṛeyicʼren hopon dope baṅkana? 5Ape do Elon dare buṭạkore, mitʼke mitʼ hạriạṛ dare buṭạkore herel reakʼ sanatepe jal jalaokʼkana; ape do buru nala ar huṭupʼ buru ciritʼkore aperen hoponpe teṅgenetʼkoa.
6“E Israel, am do buru nala reakʼ cĩkạ̃ṛ dhirikom sewawakʼ kana; ar onakoge, hẽ onakoge amakʼ sompottikana. Am do onako ṭhengem coḍoreda ar anajkom samaṅeda. Iń do cetʼ niạko ńelte hape akangeń tahena? 7Am do usul buru cetanre amakʼ aṭetʼem beleda, ar amakʼ samaṅokʼ reakʼ porob lạgitʼ onḍegem rakapʼ akana. 8Amakʼ oṛakʼ reakʼ cạukaṭ ar silpiń danaṅre amakʼ cinhạm dohoakada. Iń bạgikate eṭakʼkom ńam akawante kicricʼ bhạnduṛkate aṭetʼtem rakapʼ akana, ar amakʼ aṭetʼem osar akatʼtama ar onko tulucʼ tahen lạgitʼem bondobos akada; ar onko sãote tahengem kusiyakʼ kana, ente onkoakʼ uluṅtetʼem ńelakatʼtakoa. 9Am do jạitun sunum ojokʼkate raj ṭhenem senlena, ar ḍher mahkaokʼ sunumem beoharleda. Amren paṭhaonako do sạṅgiń disạmtem kol akatʼkoa, hẽ, Sheolte hõm kol akatʼkoa. 10Am do dãṛã dãṛãtem laṅga caba akana, enhõ ‘as do bạnukʼa,’ niạ katha do bam menleda. Menkhan sewakate nãwã daṛem ńam idikeda, onate bam laṅgalena.
11“Okoeyem botoraekante iń ṭhen eṛe katham roṛkeda, ar ińem hiṛińkedeńạ ar bam moneyạń kana? Ḍher din khon hape akae minạńte cetʼ bam botorạń kana? 12Ńitokʼ do ińge dhoromiń sodortama; ar amakʼ kạmiko hõ; onako do cetʼ porhowanakʼge baṅ hoyokʼtama. 13Goṛo ńam lạgitʼ tinrem raga unre amem jarwa akawan boṅga murhutʼkogeko rukhiyạ mema! Hoe do onkoe oṭaṅ idikoa; ar hisitʼ hoe doe idi tapʼkoa. Menkhan okoe hoṛ iń ṭhen asraye hatao uni do disạmre ar ińakʼ sonot burure ạidạriye ńama.”
14Probhu Isore mena, “Sạriạupe, sạriạupe, hor tearpe. Ińren hoṛkoakʼ hor khon mitʼke mitʼ tokʼhotʼakʼko ocokʼ giḍikakʼpe.”
15Ente usulicʼ ar coṭicʼ, okoe do jaejug tahẽakane tahenkan, uni sonoticʼ doe meneda, “Iń do usulakʼ ar sonotakʼreń tahẽnkana, ar nindhạnicʼ ar talga tạuạkʼicʼ sãote hõń tahenkana jemon nindhạnicʼ ar talga tạuạkʼicʼ hoṛakʼ ontoriń jiwetʼ ruạr ocoytae. 16Iń do jaejug hạbicʼ manwa do bạń dusiyea se ińakʼ edre unre bạń dohoya. Ente iń khonge jiu do oḍokokʼ kana ar ińge jiu reakʼ sahẽtʼ doń benao akada. 17Onkoakʼ lob laloc reakʼ ghạṭ iạteń edre sạngińlena, ar onkoń sạjạiletʼkoa ar edre iạteń dea giḍiletʼkoa; enhõ onko do akoakʼ kusi leka calakʼko ehopʼena. 18Manwakoakʼ hor doń ńelakatʼgea, ar enhõ onko doń bogekoa. Iń do onkoń ạyurkoa ar hirdạukʼkanko hõ jiwi raṛecʼiń danakoa. 19#Eph 2.17 Onko do onateko mena, ‘sor ar sạṅgińren sanamko lạgitʼge suluk baṛe hoyokʼma.’ Iń Probhugeń meneda, onko do ińgeń bogekoa.”
20Menkhan bedhoromko do kuṭlạ kuṭlikʼkan jalapuri lekanako; ente ona do thol baṅ tahẽdaṛeakʼa. Ar ona reakʼ dakʼko do losotʼ ar mạilạkoe heola rakaba. 21#Jes 48.22 Ińren Isore meneda, “Bedhoromko lạgitʼ do jãhãn sulukge bạnukʼa.”
Santali Bible © Bangladesh Bible Society, 2021.