Jesaea 56
56
Sanam jạtrenko lạgitʼ bańcao
1Probhu Isore meneda, “Dhorom reakʼ bicạr teṅgoepe ar hok reakʼ kạmipe, ente ińakʼ babańcao do hare pharege hecʼ godokʼa, ar ińakʼ rurukhiyạ do sodorokʼa. 2Bhạgangeae uni hoṛ, okoe do onae kạmikan; bhạgangeae uni manwa do, okoe do onakoe moneyakʼkan. Jirạukʼ mãhã okoeye manaoetʼkan, ar bae besonotetʼ ar bạṛicʼ kạmi khon acʼakʼ tiye sontoretʼtae, uni doe bhạgangea.”
3Probhu Isore dewa sewawae kan bidisiạ hoṛ do aloe menma, “Probhu Isor do khạṭige acʼren hoṛko tala khone begarińạ.” Ar mạ̃yạ̃ṛi hõ aloe menma, “Iń do mitʼṭen rohoṛ dare kạnạń,” 4Ente Probhu Isor do niạ kathae meneda, “Mạ̃yạ̃ṛiko okoe do ińakʼ jirạukʼmãhãko manaoetʼ, ar iń okań kusiyakʼ onako bachao joṅ ar ińakʼ bondobos kajakteko sapʼ dohoy, 5enḍekhan onkoakʼ ńutum do hopon ar hoponerako khon hõ sorosge ińakʼ oṛakʼre ar ińakʼ pạcri bhitrireń bạisạukea mitʼṭecʼ cinhạ lekate. Ar jaejugakʼ ńutumgeń emkekoa oka do baṅ maraokʼ.
6Ona chaḍa okoe bidisiạko do iń sewawạń lạgitʼ ar iń dulạṛiń ar ińren golamko hoyokʼ lạgitʼ apnartetʼ iń ṭhenko emokʼ ar okoe do Jerusalem bako besonot bickom onako manao ar ińakʼ bondobos kajakteko sapʼ dohoy, 7#Mat 21.13; Mrk 11.17; Luk 19.467 onko do ińakʼ sonot buruteń idikoa ar ińakʼ oṛakʼre, metakʼme koejoṅ oṛakʼre onkoń rạskạ ocokoa. Ińakʼ pinḍ cetanre onkoakʼ jeredokʼ ar eṭakʼ samaṅokʼakʼ koń ataṅtakoa. Onate ińakʼ oṛakʼ do sanam jạtrenkoakʼ koejoṅ oṛakʼ mente ńumogokʼa.”
8Probhu Isor, okoe do chirchạtur akan Israelkoe jarwako uni do noa kathae meneda, “Okoe lahareko samṭao ocoakan onko sãote iń do eṭakʼ jạtren hoṛko hõń samṭao jarwakoa.”
Israelren ạyurko doko bicạr dusikʼ kana
9E ṭạnḍiren ar birren sanam janwarko, jom lạgitʼ dela hijukʼpe. 10Israelren pahradarko doko kãṛãgea, onko do cetʼge bako baḍaea. Onko do guṅgạ seta lekanako, bako bhokʼ daṛeakʼa. Onko do giticʼkateko kukmũya ar jạpitʼko kusiyakʼa. 11Onko do lebṛa seta lekanako, onko do bikʼ bako baḍaea. Onko do bebuj gukʼpiko lekanako; jotokoge apan ạpin horteko ruạṛ calao akana ar apnarakʼ lab reakʼko kurumuṭu kana. 12Onkoko meneda, “Dela hijukʼpe, darkha rasa bo ạgujoṅa; dela, bubulakʼkote bon ńũ turedokʼa. Teheń khon gapa do arhõ mońj hoyokʼa.”
Santali Bible © Bangladesh Bible Society, 2021.